¹ Ilawiia mda mjihi baadaye kwamba Yesu nee kavoka kutamba mwe mzi najiji mbaimbai ekatibii na kubii kiambui ntana za uzumbe wa Muungu na wada kumina waidi hamwe naye, ² viavia wavywee nganya wekuwao wahonywa kulawa kwa loho wachama na ntamu mbaimbai. Nee ni Maliamu mwekuwa aketangwa Magdalena ambae nee kaavigwa npepo saba. ³ Yoana mkaza kuza na meneja ywa Helode Susana na wavywee watuhu wangi wekuavyao mai zao kwa ajii yao wenye. ⁴ Nabaada ya ulifii wa wantu wekumemaho hamwe wakawamo na wantu wekwezao kulawa mizi mbaimbai akatamua nao kwa mifano. ⁵ ''Mhasi kenda kuhanda mbeyu, ekuwaho akahanda mbeyu zekumwe zikagwiya nkandankanda ya sia zikagatwa sii ya miundi na wadege wa uwanga wakazidi. ⁶ Mbeyu zekumwe zikagwiiya uwanga ya bawe na zekulawaho na kugosoka miche zikahoowa kwakuwa nkazekuwa na mazimazi. ⁷ Mbeyu ntuhu zigwiiya mwe miti ya miwa nayo iyo miti ya miwa ikakuwa hamwe na zia mbeyu zikazizongomeza. ⁸ Akini mbeyu ntuhu zigwa mwe uwongo ntana zikavywaa kaidi zaidi. ''Baada ya Yesu kugombeka mbui izi akakema,''Yoyose mwenye magutwi ya kusikia na asikie.'' ⁹ Vituhu wanafunzi wakwe wakamuuza mfano uo maana yakwe ni mbwai, ¹⁰ Yezu akawamba, ''Mwenkwa upendeeo wa kumanya sii za uzumbe wa Muungu, akini wantu watuhu wenda wahinywe kwa mifanodu, ili kwamba wakaoa wasekuoa na wasikia wasekweewa.' ¹¹ Nainu nee maana ya mfano unu. Mbeyu ni mbui ya Muungu. ¹² Mbeyu zia zekugwazo nkandankanda ya sia ni wada wantu waisikiao mbui ya Muungu na baadae yuda mbaya shetani aidodoa hae kulawa kwe moyo ili kwamba asekuamini na kuhonywa. ¹³ Nazia zekugwazo mwe bawe ni wantu wada waisikiao mbui ya Muungu na kuihokea kwa kutamiwa akini nkawana mazindo yoyose waamini kwa mda mjihi na ukati wa kugeezwa wanywa. ¹⁴ Nazia mbeyu zekugwazo mwe miwa ni wantu wasikiao mbui, akini wakaendekea kwakuwa wazongomezwa ni kuduma na utaajii na ubada wa maisha nkawavyaa matunda. ¹⁵ Akini zia mbeyu zekugwazo mwe uwongo ntana ni wada wantu ambao ni wazizitizi na myoyo mitana baada ya kusikia mbui waitozeeza na yawa saana na kuvywaa matunda ya kuzizimiza. ¹⁶ Sasa, nkakuna hata yumwe muwasha taa akaigubika na bakui au akaiika mzungui badii ya kuitungika he kinala cha taa ili kwamba kia yumwe mwenda engie apate kuiona. ¹⁷ Kwakuwa nkakuna ndicho chefise ambacho nkanina kimanyike au chochose che mwe sii ambacho nkakina kimanyike kikawa mwe mngao. ¹⁸ Kwa iyo uwe meso ukategeeza kwa sibabu mwenacho kwakwe enda aomeewe zaidi, akini mwesenacho haka kia kidodo enacho chenda kidoigwe.'' ¹⁹ Baadaye mami yakwe da Yesu na nduguze wakeza kwakwe nkawekudaha kumsogeea kwa ajii ya umati wa wantu. ²⁰ Nee ambiwa mami yako na nduguzo wahada chongoi wonda kukuona wewe. ²¹ Akini, Yesu akatambaisa akamba ''Mma na wandugu wangi ni wada wasikia mbui za Muungu na kuzitii.'' ²² Ikawia siku mwenga mwe siku zia Yesu na wanafunzi wakwe nee kakwea mwe mtumbwi nee awamba, ''Natidumweseja ya kaidi ya ziwa wakagosoa mashua yao. ²³ Akini wekuvokaho kuhauka Yesu akagona usisiza na zaluba nkai yenayo nkusi na mashua yao akavoka kumema mazi nee wawa mwee hatai nkuu sana. ²⁴ Baaadaye wanafunzi wakwe wakeza kwakwe wakamwenua wakamba, ''Bwana mkubwa! Bwana mkubwa! Tiheti nakufa!''Akenuka akaifokea nkusi na mawimbi na mazi vikatubaa na kukatenda kutuia. ²⁵ Naho akawambia, ''Imani yenu ihahi?'' Wakaogoga wakehewa wakatamwiia kia yumwe na mweziwe, ''Uyu nndai kiasi kwamba agombeka hata npeho na mazi yamtii?'' ²⁶ Wakabua kwe mzi wa Gerasini ye upande wa nyuma ya Galilaya. ²⁷ Yesu ekuseeyaho na kujata mwe alizi muntu nganya kulawa mjini akadugana nae na muntu uyu nee ema nguvu za kiza. Kwa mda mrefu ne nkavaa nguo ne nkekaa mwe nyumba ekaa mwe makabui. ²⁸ Ekumuonaho Yesu akaia kwa sauti na akagwasii mbele yakwe kwa sauti nkuu akamba nkigosoa mbwai kwako, Yesu mwana ywa Muungu mwe uwanga? Nakuhembeeza usekuniazibu mimi'' ²⁹ Yesu akaamulu npeho mchama imlawe muntu yuda kwa kuwa maa nyinyi akwewa hata kama nee kafungwa minyololo na kubwana na kuikwa si ya ulinzi, avibonda vifungo na kuendeshwa na mapepo kiamuo kwa wangwa. ³⁰ Yesu akamuuza, ''Wetangwa ndai?'' Ekatambaisa, ''Legioni'' kwa maana mapepo mangi yengia kwakwe. ³¹ Wakasongwa ni kumhembeeza wesekutiamulu tite tite npanga. ³² Kundi da nguuwe nee dikaiswa uwanga ya kiima, wakahembeeza awanke uhusa wakengie kwe ao nguuwe akawaamulu kugosoa ivyo. ³³ Kwa iyo yada mapepo yakamlawa yuda muntu na kwengia kwa wada nguuwe na dikaguukia kwe mwenuko wa kiima kiamuo kwe ziwa wakadidimia umo. ³⁴ Wada wantu wekuwao wakaisa wada nguuwe wekuonaho chekuawiiacho wakaguuka na kuavya taalifa hada he mzi na chongoi mwa mizi yekuzungukayo. ³⁵ Wantu wekusikiaho ayo wakaita kuona chekulawiiacho na wakeza kwa Yesu wakamwona muntu ambaye mapepo yamlawa nee kavaa vitana na wenye akii ntana, ekaa mwe miundi ya Yesu ne waogoha. ³⁶ Nee yumwe ywao mwekuona chekuawiiacho akavoka kuwatamwiiza wantu watuhu nmna uyu muntu ekuwavyo akaongozwa ni mapepo ekuhonywavyo. ³⁷ Watu wose wa mkoa wa Wagerasi na maeneo yekuzungukayo wakamhembeeza Yesu ahauke kwao kwaajii nee wanawoga mkuu. Nee engia mwe mtumbwi ili auye. ³⁸ Yuda mntu mwe kulawigwa ni npepo akamhembeeza Yesu kuita naye, akini Yesu akamwamba aite na kutamwiiya, ³⁹ ''Uya nyumbai kwako na utaazie yada yose ambayo Muungu kakugosweea'' Uyu mntu akahauka akabiikia kose mwe mzi wose yada yose ambayo Yesu ekugosoayo kwa ajii yakwe. ⁴⁰ Na Yesu akauya, madugano wakamkaibisha kwaajii wose nee wakamgoja. ⁴¹ Kauwa akeza muntu yumwe atangwa Yailo ni yumwe mwe viongozi mwe masunagogi. Yailo akagwa he miundi ya Yesu na kumhembeeza aite nyumbai kwakwe, ⁴² kwakuwa nee ana mwana yumwe ywa kivywee mwenye miaka kumi na miidi na nee akaumwa naho ana hali mbaya ya kufa. Na akawaho akaita madugano nee wakamveveea. ⁴³ Mvywee mwekuwaakalawigwa ni npome miaka kumi na miidi ne yuhada na nee kabananga hea zose kwa waganga, akini nkakuna mwe kumhanya hata yumwe, ⁴⁴ akeza nyuma ya Yesu na kudonta pindo da nguo yakwe na agfyla kulawa npome kukaeka. ⁴⁵ Yesu akamba, ''Nndai mwe kunidonta?'' Wakaemea wose, Petro akamba Bwana Mkubwa, umati wa wantu wasindikiana na wakuveevea.'' ⁴⁶ Akini Yesu akamba, ''Muntu yumwe kanaidonta, maana nkimanya nguvu zilawa kwangu.'' ⁴⁷ Mvyee ekuonaho kuwa nkadaha kufisa ekugosoayo akavoka kuzingiza, akagwa si mbele za Yesu akabiikia mbele za wantu wose vywekweekavyo akamdonta na via ekuhonywavyo gafla. ⁴⁸ Naho akamba kwakwe, ''Mndee imani yako ikugosoa uwe mgima, itita npeho.'' ⁴⁹ Ekuwaho akasongwa ni kugombeka, mntu yumwe akeza kulawa nyumbai kwa mkuu wa sunagogi akamba, ''Mwano kafa. Usekumpisha mwaimu.'' ⁵⁰ Akini Yesu akusikiaho akamtambaisha, ''Usekuogoha aminidu na enda ahonywe.'' ⁵¹ Ekubindaho kwengia mwe iyo nyumba nkee kukunda muntu yoyose kwengia hamwe naye iya Petuo, Yohana na Yakobo, tatiakwe yuda mndee na mamiakwe. ⁵² Sasa wantu wose nee wakasiniinika na kuavya sauti kwa ajii yakwe, akini akamba, ''Mwesekutawa vuzo nkazati kufa kagona tu.'' ⁵³ Akini wakamseka kwa zeleu, wakamanya kuwa kafa. ⁵⁴ Akini Yeye, akamtoza mndee mkono, aketanga kwa sauti akamba, ''Mwana enuka'' ⁵⁵ loho yakwe ikamuwia ekenuka ukati uouo, akaavya amli ekwe kintu chochose ade. ⁵⁶ Wavyazi wakwe wakehewa akini akawafingiza wose kumhinya muntu chekuwacho kiawia.