¹ Bhukohela bhotwapandilwa hala kusila jya imani tuli naamani jyake Kabhumba kunsila jyake Bwana ghwetu Yesu Kristo. ² Kuhitila nyene ufwe tuli na fursa kunsila jya imani kuneema jeji jyalinajyo mukati jyaje tuhaghalele. Twanyomwa kubhujasili bhwalikutuha Kabhumba kujili jya bhujasiri bhotulikushiliki kubhutukufu bhwake Kabhumba. ³ Telelyo tuwe tulikunyomwa kumateso ghetu tujinsi kubha mateso ghakofyala bhuvumilivu. ⁴ Bhuvumilivu bhukofyala kubatilika nekakuswa bhukofyala bhujasiri kujili jya haho. ⁵ Bhujasiri bhobhu tebhukotatisha tamaa, bhebhwa bhupendo bhwake Kabhumba bhwalighonwa kumwegho jyetu kuhitila mwegho mulafu, ghobhakafumyanga kumwetu. ⁶ Bhotukabhele tulibhusila masala kughulya mwafaka Kristo ghakafwanga kujili jya bhuovu. ⁷ Bhofyabha filokabha fikake ghumwi kufwa kujili jya muntu ali na haki. Jyi ni kubha handi muntu anakatubu kufwa kujili jya muntu musogha. ⁸ Kansi Kabhumba ghahakikisya bhupendo mwaje nyene kumwetu kusababu bhotukabhele na dhambi, Kristo ghakafwanga kujili jyetu. ⁹ Kundi kusumba ghonse, bhotohewa kupandwa haki kumalaso ghaje tulokasisibwa mukufuma kuadhabhu jyake Kabhumba. ¹⁰ Bho fyabha tukabhele nsika twakapatanishwanga na Kabhumba kunsila jya lufu lwake mwanaje, kusumbakana bhotukabhele twakwisya, kutupatanisya tulokasisibhwo kumaisya ghaje. ¹¹ Tetetyo tue tufwe nagho tulikunyomwa Kabhumba kuhitila Bwana Yesu Kristo, kuhitila nyene akebhele lo twapokela bhupatanisho bhobho. ¹² Kundi lo tentyo kobha ni kuhitila mwundu ghumwi dhambi jyakengilanga habhwelelo kusila jeji lufu lwakangelanga kunsila jya dhambi ne lufu lwasambala kubhantu bhonse bhukohe bhonse bhakelanga dhambi. ¹³ Bhofyabha syeria jya dhambi jikabhele kubhwelelo tukubha dhambi tejikopandwa jikabhele kutuhu syeria. ¹⁴ Ninga tetyo lufu lwakakawalanga kufuma kwa Adamu ne kwa Musa ninga kubhalya bhasyakelanga dhambi kobhe kubhula kutii kwa Adamu ghogho ghomufano ghwaje anakese. ¹⁵ Tukubha ninga tetyo zawadi jya bulete kobhe kosa bhalyabhani kosa lya ghumwi bhengi bhahafwanga kusumba kana bhusogha bhwake Kabhumba ne zawadi kubhusogha bhwa muntu ghumwi, Yesu Kristo bhwasumba kughungilika kubhengi. ¹⁶ Bho jyabha zawadi te kobhe matokeo gha ghulyu akalenga dhambi bhofyabha luhande lundi hukumu jya adhabhu ghakesanga, kusababu jya ikosa lyamu muntu ghumwi tukubha kuluhande lundi kipawa sya bure silikufuma mukapandwa haki jakesanga baada jyamakosa mengi. ¹⁷ Kubha fyabha kwikosa lya ghumwi lufu lwakatawalanga kuhitila ghumwi kusumba kana bhalya bhalopokela neema singi hamwi na kipawa sya haki bhalotawala kuhitila maisha gha ghumwi, Yesu Kristo. ¹⁸ Tetyo kansi kuhitila ikosa limwi bhantu bhonse bhakesanga kuhukumu, ninga kuhitila ighambo limwi lya haki twajisanga kupandwa haki jyamaisha gha bhantu bhonse. ¹⁹ Kubha fyabha kuhitila kubhula kutii kwa muntu ghumwi bhengi bhakelwanga bhali na dhambi, tetyo kuhitila bhutii kughumwi bhengi bhalokelwa bhali na haki. ²⁰ Kundi syeria jyajingila kamwi hakubha ikosa likobhele kumufindamisya. Tukubha hojyakasumbanga dhambi kubha singi, bhusogha bhwakaghungilikanga mpaka kana. ²¹ Jeji jyakalolekanga, hakubha dhambi bhojya katawalanga mulilutu bhofili ninga bhusogha bhuna kobhola kutawala kuhitila haki kujili jya maisha gha milele kuhitila Yesu Kristo Bwana ghwetu.