¹ Tulokatenda si kabhili kubha Abrahamu, ² tata ghwetu kujinsi jya kumutumba, ghapatikana? Kubha fyabha Abrahamu ghakapandilwanga haki jya maghambo, akabhele na sabhabhu jya kwitapa, tukubha te hambele jyake Kabhumba. ³ Kwani bhunyeghe bhubhalite bhuti? "Abrahamu ghakamwaminingi Kabhumba, jyana panda kumwaje kubha haki." ⁴ Kansi kumuntu alikukola milimo, kulihwa kwaje tekukopandwa kubha tinifisogha likobha ideni. ⁵ Tukubha muntu asikokola milimo bhuhohela amwani nyene kubha amupandile haki asyakabhe mlokehagha, imani jyeje ghogho muntu jipandilwe kuhaki. ⁶ Daudi nagho akotenda masogha kumuntu ghagho Kabhumba ghwali kupanda haki hasili maghambo. ⁷ Ghakatendanga bhabharikiwa bhalya mabhi ghabho ghasamehewa ne bhalya dhambi syabho syafimbilwa. ⁸ Ghabarikiwa muntu ghulya nyene Bwana asya mupandile dhambi." ⁹ Kansi mbya baraka sesi ni kubhalya bhakaputwanga kopatue, amaninga kubhalya bhasiputilwe kopa? Kubha ni tentyo twatenda. Abrahamu imani jyaje jyaka pandwanga kubha ni haki." ¹⁰ Tentyo ghakapandilwanga bhuti kansi? Akabhele Abrahamu akabhele tohara ama nasyali kuputa kopa? Tyakabhele mukaputa, akabhele nasyali kuputa. ¹¹ Abrahamu ghakapokelanga alama jyakuputwa. Ghoghu ghukabhele muhuri ghwa jilya haki imani jya jilya haki jya imani jya kabhele najyo tayari nasyali kuputwa leopa. Jeji jili namana kubha haki jiolkapandwa kumwabho. ¹² Jeji nagho jilikuloleka kubha Abrahamu ghakelwanga tata ghwatohara te kubhalya bhali kusilonda pambala syake tato ghwa tohara tekubhala bhatumile mutohara sumbwa bhalondile pambala syake tata Abrahamu. Ne jeji gho imani jyakabhele najyo kubhasyakaputwanga kopa. ¹³ Jeji tejikabhele syena kubha ahadi jya kafuma kwa Abrahamu ne bhutyalo bhwaje, ahadi jeji ni kubha bhalobha bhalyangi bha bhwelelo bhukohela jikabhele kuhitila haki jya imani. ¹⁴ Kubha bhalya bhasyeria gho bhahyani imani jyabho bure ne ahadi jahinduke. ¹⁵ Bhajyabha syeria jikolata ghadhabhu tukubha halya hatuhu syeria nagho hatuhu kuhaswa. ¹⁶ Bholyabha leli likafuma ku imani hakubha libhe lya bhusogha. Matokeo ghajo ahadi ni dhahiri kubhufyalo bhonse na bhafyalwa bhabhatebhalya bhajinsi syelia tukubha bhalya ni bha imani jya Abrahamu. Tukubha nyene nisifwe fwense, ¹⁷ kobhe bhojyakanyeghwanga nakwila ughwe kubha tata ghwa mataifa ghonse. Abrahamu akabhele naliho ho kughulya ghakamwaminingi Kabhuumba, nyene akobhaha bhafu bhupanga no kugheta maghambo ghasiliho hakubha ghakobhole kubhaho. ¹⁸ Kusumbula jya maghambo ghonse ghahanse Abrahamu kubhujasili ghakwamwaminingi Kabhumba kufuku silokesa tetyo ghabha tata ghwa mataifa mengi kulingana na silya syakatendwanga tetyo bhobhulokabha bhufyalo bhobho." ¹⁹ Nyene takabhele mungalangala kuimani Abrahamu ghakatendanga kubha mutumba ghwaje nyene ghwakahwa kufwa akabhele na bhumuni bhwa myaka ighana tetyo ghaswanga na hali jya kufwa kwanda la Sara. ²⁰ Tubhofyabha kuahadi jyeke Kabhumba, Abrahamu teghakasita. Kutuna kuamaini tukubha ghakapatanga managha kuimani ghakamunyomwanga Kabhumba. ²¹ Akabhele najinsi kubha silya syalikwila Kabhumba ghaaidi akebhele nagho nakobhwele kukumilisya. ²² Nejeji nagho jyakapandwenga kumwaje kubha ni haki. ²³ Kundi tejya kaghandikwanga tu kufaida jyaje kubha jyakapandwanga kumwaje. ²⁴ Jyakanyeghwanga kujili jyetu no kobhakabhikilwanga kupandwa, ufwe tukuamini kubha nyene ghakamuhembulanga Bwana ghweu Yesu kufuma kubhafu. ²⁵ Ghoghu ni ghulya ghobhakafumyanga kujili jya makosa ghetu ne kuhembulwa hakubha tukubhale kupandilwa haki.