¹ Muntu ghumwi isina lyajye Lazaro akabhele mulwele. Ghakafumilanga Bethania, lugho lwa Mariamu na ilumbu lyajye Martha. ² Akabhele ni Mariamu ghulya ghakamusighanga Bwana Marhamu no kumulonda mumaghulu ghajye kunyele syajye, wamughana ghwajye Lazaro akabhele mlwele. ³ Haho ilumbulyajye hawa bhakalaghisyanga sikula kwa Yesu no kutenda, "Bwana, kunga ghulya ghoonyomilwe alwele." ⁴ Yesu haghakahulikanga ghatenda, "Bhulwele bhobhu tebhwakufwa, lakini, tukubha badala jyaje ni kusabhabhu jya bhulafu bhwa Kabhumba ili mwana ghwa Kabhumba apate kukusibhwa katika bhobho bhulwele." ⁵ Yesu ghakamunyomwanga Martha nwe lumbulyajye na no Lazaro. ⁶ Hoghakahulikanga kubha Lazaro ni mulwele Yesu ghakekalanga fuku ibhili kusumba mahala kwa kabhele. ⁷ Haho bhaada jya lelyo ghabhabhalila bhanafunzi bhajye, "Tujye kubhayahudi kabhili." ⁸ Bhanafunzi bhamubhalila, "Rabhi, Bhayahudi bhakabhele bhakughema kukuponda mabhwe nogwe uhensile kuhelela koko kabhili?" ⁹ Yesu ghabhahindule, "Nonwe syesyubhe tesya ikumi ne bhili? Muntu kubha nakulyata isyubha teanaghema kukumpa, kusabhabhu abhwene kunulu jya isyubha. ¹⁰ Nasi tetyo kubha ghalyata bhufuku, alokumpa kusabhabhu nuru tejili mukati jyaje." ¹¹ Yesu ghatenda maghambo ghagha, no baada jya maghambo ghagha, ghabhabhalila, munywanywi ghwetu Lazaro amelala, lakini njile ili kubha mpante kumuhalamusya kufuma mutulo." ¹² Haho bhanafunzi bhakamubhalilanga, "Bwana, kubhaghahgona alokubhuka. ¹³ Bhwakati bhobho Yesu akabhele na kusahulila habhali sya kufwa Lazaro, tukubha bhene bhakamanyanga kubha akusahulila babali sya kughona tulo. ¹⁴ Haho Yesu ghakasahulanga nabho kubhuwazi kubha Lazaro ghafwa. ¹⁵ Ndina fulaha kusabhu jenyu kubha sebhele ko kulya ili kubha mupate kuamini tujye kumwajye." ¹⁶ Tomaso, akabhele ihasa, ghakabhabhalilanga bhanafunzi bhenajye, nofwe tuje tukafwe hamwi na Yesu." ¹⁷ Bhwakati Yesu hoghekesanga, ghakasanganga Lazaro leyali ghakazikwa mukabhuli fuku inne. ¹⁸ Nagho Bethania jikabhele hehi na Yerusalemu kobhe kilomita makumya nne ne tano teti. ¹⁹ Bhengi kati jya Bhayahudi bhajisa kwa Martha no Mariamu kubhafaliji kusabhabhu jyawa mughana ghwabho. ²⁰ Martha hoghakahulikanga kubha Yesu ajisile ghakajanga kasangana najye, tukubha Mariamu ghaendeleanga kwikala halugho. ²¹ Tukubha Martha ghakamubhalilanga Yesu, "Bwana, kubha unabhe haha, ikololyane teanafwe. ²² Nansi nonwe manyile kubha lyolyonse lyo nasegha kufuma kwa Kabhumba akobhwele kukuha." ²³ Yesu ghamubhalila ikolyobhe akufufuka kabhili." ²⁴ Martha ghamubhalila, manyile kubha alokafufuka katika bhufunuo lufuku lwa mwisho." ²⁵ Yesu ghamubhalila, "Une ni bhufunu no bhupanga; nyenye aamini, ingawa alokafwa, nansi tetyo alobha nakuishi; ²⁶ no nyene ajikele no kuamini une leghakafwe. Uamini leli?" ²⁷ Ghamubhali ni bhwene, "Bwana aamini kubha ughwe ni Kristo, Mwana wa Kabhumba nyene ajisile katika bhwelelo." ²⁸ Hoghakahwanga kutenda lelyo, ghakajanga no kumwita ilumbu lyajye Mariamu hambali, ghatenda, "Mwalimu aliho haha akukwita." ²⁹ Mariamu hoghakahulikanga ghagha, ghakabhukanga kuhalaka no kujya kwa Yesu. ³⁰ Haho Yesu akabhele nasyali kwisa mulugho lwa kijiji sesyo, ila akabhe nasyali mahali hoghakasananga na Martha. ³¹ Bhayahudi bhakabhele no Mariamu katika nyumba no bhalya bhakabhele bhakumufaliji, hobhakamulolanga na kubhuka bhwangu kufuma hanse, bhakamulonda; bhakamanyanga kubha ajile kukabhuli ili bhakalilile kokoe. ³² Haho Mariamu, hoghakafikanga halya Yesu hoghakabhanga ghakamulolanga no, kughwa hansi jya maghulu ghajye no kumubhalila, "Bhwana kubha unabhe haha wamughana ghwane teanafwe." ³³ Yesu hoghakamulolanga na kulila, no Bhayahudi bhakesanga hamwi najye bhakabhele bhakulila nagho ghakaombolesyanga katika mwegho no kufazaika; ³⁴ nakutenda, mumalasisyehe? Bhamubhalila, Bhwana jisa ukunge." ³⁵ Yesu ghalila. ³⁶ Haho Bhayahudi bhakatendanga, "Kunga bho ghakamunyomwanga Lazaro!" ³⁷ Lakini bhandi jyabho bhatenda, "Teghoghu muntu ghakaghafumbuwa menso ghaghulya muhofu, teghakakubhola kumwila mutu ghogho na sifwi?" ³⁸ Haho Yesu, na kuombolesya mwegho ghwajye kabhili ghakajanga kukabhuli haho likabhele ipango, nebhwe libhikilwe halughulu jyaje. ³⁹ Yesu ghabhala, "Libhusye leli ibhwe," Martha, ilumbu lyajye no Lazaro, nyene afwile, ghamubhalila Yesu, "Bhwana kwa muda ghogho mubhili ghulobha ghabhihanga kusabhabhu janakobha maiti kumfuku nne." ⁴⁰ Yesu ghamubhalila, "Une syakubhalilanga ja kubha, kubha waamini ulolola bhulafu bhwa Kabhumba?" ⁴¹ Tukubha bhakalibhusyanga ibhwe. Yesu ghabhusya menso ghajye kulughulu no kutenda, "Baba, kukushukuru bhukobha uhulikisye. ⁴² Manyile kubha uhulikisye muda ghonse, lakini ni kusabhabhu jya ikusanyiko lelyo lihaghelele haho kusyunguluka kubha nantenda ghagha ilikubha bhapate kuamini ughwe undaghisisye." ⁴³ Baada jya kutenda ghagha ghakalilanga kusauti nkulu Lazaro, fuma hanse!" ⁴⁴ Mufu ghakafumanga hanse na hambilwe mabhoko no maghulu kusanda sya kuzikila, no bhusyu bhwajye bhwakafimbilwanga kubhusyu, Yesu ghabhabhalila, mfumbulule mumuleke ajye." ⁴⁵ Haho Bhayahudi bhengi bhakesanga kwa Mariamu no kulola Yesu syonghakelanga, bhamuamini; ⁴⁶ tukubha baadhi jyabho bhakajanga kwa Mafarisayo no kubhabhalila maghambo ghakelanga Yesu. ⁴⁷ Haho bhakuu bhamakuhani no Mafarisayo bhakusanyika hamwi katika ibalasya no kutenda, "Tulakwila isi? Muntu ghoghu akwila isyala nyingi. ⁴⁸ Bhukobha lukubhaleka teti bhongwa, bhonse bhalomuamini; Bharumi bhalojisa no kutwala fyonse hamwetu no taifa lyetu." ⁴⁹ Nansi tetyo muntu ghumwi kati jyabho, Kayafa, akabhele kuhani mkulu mwaka ghogho, ghabhabhalila, "Temumanyile syosyonse kabisa. ⁵⁰ Temukufikilia kubha jifwile kuajili jya bhantu kusumba itaifa lyonse kuangamia." ⁵¹ Ghagha teghakaghatendanga kusabhabhu jyajye nyene, tukubha bhwakabhele kuhani mukulu mwaka ghogho, ghatabhi kubha Yesu alokafwa kusabhabhu jya taifa; ⁵² nofwe tekwitaifa nyene ghwengwa bali Yesu apate kubhakusanya bhatwana bha Kabhumba bhalya bhatawanyike sehemu mbali mbali. ⁵³ Tukubha kusapila lufuku lolo no kuendelea bhapata namuna jya kumwihagha Yesu. ⁵⁴ Yesu teghakalyata kabhili wazi wazi katu jya Bhayahudi, ila ghakabhukanga haho no kujya katika lugho lulinesina lya Efraimu. Haho ghakekala nu bhanafunzi. ⁵⁵ Pasaka jya Bhayahudi jikabhele hehi, no bhaghanyi bhatanda kujya Yerusalemu hanse jya lugho kabla jya Pasaka ili bhapate kwilafya bhene. ⁵⁶ Bhakabhele bhakumuhensa Yesu, no kusahula kila ghumwi hubhakabhele bhahaghalele hekaluli, "Mukulanganya isi? Kubhateghakese katika sikukulu?" ⁵⁷ Bhwakati bhobho waku bhamakohani no Mafarisayo bhakabhele bhefumya amuri kubha jabha ghumwi amanyile Yesu huwali, ahensilwe kufumya talifa ili kubha bhapate kumunigha.