¹ Tukubha Sauli, ghakaendeleanga kutenda fitisyo kuminefya lufu kubhanafunsi bhake Bwana, ghakajanga kwa kuhani mukulu ² ne kumusegha lupapulo kujili jya bhasinagogi koko ku Dameski, hakubha kubha ghamupata muntu alimujilya abhahambe ne kubhaleta ha Yerusalemu. ³ Ninga bhwakabhele inekusafiri, jyakalolekanga kubha hoghakasoghelanga ku Dameski, bhwangu bhwangu jyamulanga kokonse ilangasi kufuma mwighulu,' ⁴ nagho ghaghwa hasi ghanahulika silongo sikumubhalila, "Sauli, Sauli, mbona ulikusafya une?" ⁵ Sauli ghahendula, Uli ghanyi ughwe? Bwana ghatenda, "Une gho Yesu ulikumbihya; ⁶ Tukubha bhuka, ujingile mumujini noghwe ulobhalilwa ghoheselwe kwila ⁷ Bhalya bhantu bhakosafiringi hamwi na Sauli bhabhatamila na kale, bhekuhulikisya silongo, bhasiloli muntu. ⁸ Sauli ghabhuka musihugho no bhogha kasisukanga menso ghaje, teghakakobholanga kulola sintu, bhamunyigha kubhoko bhamuleta ku Dameski. ⁹ Kufuku itatu bhusila kulola, bhusila kulya ninga kunywa. ¹⁰ Kundi hakabhele mwanafunzi ha Dameski isina lyaje Anania, Bwana ghakatendanga naje kumaono, "Anania." Na ghanatenda, "Kunga ndi haha, Bwana. ¹¹ "Bwana ghamubhalila, "Bhuka uje kumutaa ghitilwe nyofu, ne munyumba jyake Yuda ukabhasye muntu kufuma Tarso ajitilwe Sauli; tukubha kunga alikusegha; ¹² ghakamulolanga mumaono muntu isina lyaje Anania ghajingila ghanamubhikila mabhoko kulughulu kumwaje hakubha apate kulola. ¹³ Kundi Anania ghamuhindila, "Bwana, nahulika lwa ghoghu muntu kubhantu bhengi, kukyasi si bhoghabhelila mabhi bhatakatifu bhakulya ku Yerusalemu; ¹⁴ Haha alina mamlaka kufuma kumakuhani mukulu kunyigha kila ghumwi alikulita isina lyobhe. ¹⁵ Kundi Bwana ghambhalila, "Kaje, bhoghabha nyene ni syombo tateule leumwane, alitwale isina lyane hambele jya mataifa ne bhafalme nebhana Bhaisraeli. ¹⁶ Kasi ndomuanga ghali mengi ghwahesilwe kusafibhwa kujili jya sina lyane." ¹⁷ Anania ghaja, ghajingila mulya mulya munyumba; ghamubhikila mabhoko ghatenda, Ghwane Sauli, Bwana Yesu, ghaka kufumilanga musila hokabhele no kwisa, ghandaghila upate kulola kabhili na ubhumbike mwegho mulafu. ¹⁸ Bhwangu bhwani fyahona halya hameso kobhe magha, ghanalola, ghahaghalala, ghabatizwa; ghalya fyakula ghanapata managha. ¹⁹ Ghajikala hamwi na bhanafunzi bhaku Dameski kufuku singi. ²⁰ Ikunka lyelyoe ghana mutangasya Yesu kumasinagogi, nalikutenda kubha nyene ni mwana ghwake Kabhumba. ²¹ Na bhonse bhakahulikanga bhakelolelanga bhanatenda, "Te muntu ghoghu ghaka bhabhinyanga bhonse bhaketanga isina leli koko ku Yerusalemu? Ne haha ghakesanga kulusoko lwa kubhaghila no kubhafela kumakuhani." ²² Tukubha Sauli ghakakobholanga kuhubili ne kubhela Bhayahudi bhekeleku Dameski bhachanganyikiwe ne kuswa jya kubha ghoghu gho Kristo. ²³ Syahita fuku singi, Bhayahudi bhajila syauli hamwi hakubha bhamwihaghe. ²⁴ Tukubha mupango ghwabho bhaghumanya Sauli. Ghamuhembela hamusigho isyubha ne bhufuku bhalole kumwihagha. ²⁵ Kundi bhanafunzi bhaje bhamutwala bhafuku bhamusosya kuhitila bhukutani, bhamusosya hansi mwikapu. ²⁶ Ne Sauli bhoghakafikanga ku Yerusalemu, ghakaghemanga kwiunga na bhanafunzi tukubha bhakabhele bhalikumughubhala bhasesadiki kubha nyene ni mwanafunzi. ²⁷ Kundi Barnaba ghamutwala ghamufela kumitume, ghanabhabhalila Sauli bhoghakamulolanga Bwana bhoghakatendanga naje, no bhoghakahubilingi kubhujasiri kwi sina lya Yesu koko Dameski. ²⁸ Ghakasangananga naje bhobhakengila nga ne kufuma ku Yerusalemu. Ghatenda kubhujasili kwisina lya Bwana Yesu, ²⁹ alikwibhyasya na Bhayahudi bha Kiyunani tukubha bhalikughema kualwisye kumwihagha. ³⁰ Bhaghwaje bhobhakamanyanya ighambo lelyo, bhamutwala mpaka ku Kaisaria, bhanamufela aje Tarso. ³¹ Kundi kanisa lyonse kubhuyahudi, Galilaya ne Samaria, likabhele na amani, lya najengwa, ne kulyata ne kughubhaha Bwana ne faraja jya mwegho mulafu, lyakula likughungilika kana. ³² Bhoghakalolekanga Petro bhwakabhele ne kunyengela nyengela hande syonse sya mukoa, ghabhasokela bhaumini bhekele kulugho lwa Lida. ³³ Ghamulola koko muntu ghumwi isina lyaje Ainea, muntu ghogho akabhele habhulili mika munane; akabhele ghakahola. ³⁴ Petro ghamubhalila, "Ainea, Yesu Kristo akusisye; halamuka ulighasile bhulili bhobhe," Kundi ghahalamuka. ³⁵ Ne bhantu bhonse bhakojikala Lida ne Sharoni bhobhakamulolanga muntu ghogho, bhakamuhindukilanga Bwana. ³⁶ Hakabhele mwanafunzi Yafa ajitilwe Tabitha, lyakatafasiliwanga kobhe "Dorcas" Ghoghu mukema ghaka bhumbikanga milimo misoghane maghambo ghake rehema ghog ghakelanga kubhupina. ³⁷ Jyakafumanga kufuku sesyo ghakalwalanga gha nafwa; bhobhakamusafisyanga bhakamutasyanga syumba sya halughulu bhana mulasya. ³⁸ Bho jyabha Lida jikabhele hehi na Yafa, ne bhanafunzi bhakahulikanga kubha Petro akabhele koko, bhakabhatumanga bhantu bhabhili kumwaje, bhalikumulesya, "Jinsa kumwentu bhusila kukelelwa." ³⁹ Petro ghaharamuka ghanaja hamwi nabho. Bhoghakafikanga bhakamuletanga musyumba sya mulughulu ne bhajane bhonse bhakahaghalalanga hehi naje bhekulila bhekumulanga ikoti ne myenda ambazo Dorcas ghakabhasonelanga nali hamwi nabho. ⁴⁰ Petro ghabhafumya bhonse hanse na syumba, ghasukama ghaomba, kundi ghaghu hindukila mutumba ghatenda, "Tabitha, lalamuka". Ghasisuka bhoghakamulolanga Petro ghajikala hansi. ⁴¹ Kundi Petro ghamuha kubhoko kwaje gha mubhusya no bhoghabhetanga bhaamini bhafulwa ghabhakabidhi kumwabho nali bhupanga. ⁴² Ighambo leli lya julikana ku Yafa ghonse, ne bhantu bhengi bhakamwaminingi Bwana. ⁴³ Jyakatokeanga Petro ghakekalanga ku Yafa hamwi na muntu ajitilwe Simoni, mujojya sabha.