¹ Kukabhele ne muntu ghundi kuulgho lwa Kaisaria, isina lyaje akabhele najitilwe Kornelio, akabhele mukulu ghwa kikosi sya Kiitalia. ² Akabhele muchamungu ne kumwabudu Kabhumba ne nyumba jyaje jyonse; ghakafumyanga makela mengi kubhayahudi ghakaseghanga kwa Kabhumba fuku syose. ³ Ikunka lya saa mukagha isyubha, ghalola maono malaika ghwake Kabhumba najisile kumwaje. Malaika ghamubhalila Kornelio! ⁴ Kornelio ghamukunga malaika akabhele ne kughubhaha kana ghatenda "Sesi nisi mukuu?" Malaika ghabha bhalila "Maombi ghobhe ne zawadi syobhe kubhapina syatanda halughulu kumbukumbu kubhaho kwa Kabhumba." ⁵ Nonwe tuma bhantu kuja kulugho lwa Yafa kumuleta muntu ghumwi ajitilwe Simoni ghogho akojitwa Petro. ⁶ Ajikele na mujyojya sabha ajitilwe Simoni nyene nyumba jyaje jilihambuli na bahari." ⁷ Baada jya malaika ghwakabhele nekutenda naje ghabhuka ku Kornelio ghabhojita bhakola milimo bha kunyumba jyaje bhabhili, ne musikale akabhele ne kuabudu Kabhumba kati jya bhasilikale bhakabhele bhekumutumikia. ⁸ Kornelio ghakabhabhalilanga ghonse ghakalolekanga ghanabhatuma ku Yafa. ⁹ Iku lyakalondanga ikunkalya saamukagha bhokabhele musila ne bhakolela hamujini Petro ghatenda halughulu mwi dari ne kusegha. ¹⁰ Akabhele na sala ghakahesunga kulya situ syosyonse tukubha ikunka bhantu bhalikuteka fyakulya, ghalangwa maono, ¹¹ ghalola bhwelelo jyajighuka nesyombo sikusoka ne situ fulani kobhe mwenda mukulu jikusoka hansi haaridhi kukona syaje syonse ine. ¹² Mukati mumwaje akabhele na aina syonse manywele gha maghulu ane ne bhakoghafula hansi ne manyonyigha mwighulu. ¹³ Kabhili silongo syahulikika jatenda "Halamuka, Petro usinse ulye". ¹⁴ Kundi Petro ghatenda "Tetetyo, Bwana kusababu sinalya situ syosyonse ndikwisi bhuchafu. ¹⁵ Tukubha silongo syajisa kumwaje kabhi lwa bhubhili" Syoghakalafyanga Kabhumba usisijiti ne jisi wala kichafu". ¹⁶ Jeji jyakalolekanga lwa bhutatu, nesilya syombo syabha syatwalwa kabhili mwighulu. ¹⁷ No bhwakabhele Petro kuhali jya kuchanganyikiwa kulughulu jya ghagho maono ghali kumanisha si, Kunga, bhantu bhakabhele bhatumwa ne Kornelio bhahaghalala hambele jya lango, bhalikubhasya sila jya kunyumba. ¹⁸ Bhabhetu bhanabhasya kobhe Simoni nyene ghaketwanga Petro akabhele najikele halya. ¹⁹ Ikunka lelyo Petro akabhele nekulanganya kulughulu jya ghagho maono, jya mwegho ghatenda naje, "Kunga bhantu bhatatu bhali kukuhensa. ²⁰ Hatamuka usoke hansi uje nambo. Usighubhahi kuja nabho kusababu namilaghisya." ²¹ Petro ghasoka hansi kumwabho ghutenda "Une ndighulya ghomulikuhensa. Ni nasi bhomwajisa?" ²² Ghatenda, "Akida ghumwi isina lyaje Kornelio, muntu ghwa haki na kotehe kumwabudu Kabhumba, ne bhantu bhuko mutenda fisogha kutaifa lya kiyahudi, ghabhalilwa na malaika bhake Kabhumba kukulaghila hakubha kuja kunyumba jyaje, hakubha ahulike bhujumbe kufuma kumobhe." ²³ Petro ghabhakalibhisya kwingila mukati ne kwikala hamwi naje, mulabho ghwakalondandanga ghahalamuka ghaje hamwi naje na bhaghwaje bhase kufuma ku Yafa bhalondekana naje. ²⁴ Ifuku lya kalondanga bhakasanga ku Kaisaria. Na Kornelio akabhele na bhahembele, akabhele ghabhajita hamwi, bhaghwaje ne bhanywanyi bhaje bha hehi. ²⁵ Kobhe Petro ghajingila munyumba, Kornelio ghamulaki ghajinama paka hansi hamaghulu ghaje mukumuheshimu. ²⁶ Tukubha Petro ghamubhusya, ghatenda "Haghalala; une nenyene ndi mwanadamu." ²⁷ Bhwakabhele Petro nekusahula naje, ghakajanga munyumba ghasanga bhantu bhakomekene hamwi. ²⁸ Ghabhabhalila, "Umwe bhene mujisi kubha te syeria jya Kiyahudi kushirikiana ama kwilyatila na muntu asilighwe taifa leli. Tukubha Kabhumba ghandanga une kubhusihesitulwe kumwita muntu ghoghonse ndinajisi ama muchafu. ²⁹ Hasumwa najisa bhusila kutuna, bho nakalaghilwanga kujili jya lelyo. Kundilo ke mibhasye ni nasi bho mwakalaghilwanga kujili jyane." ³⁰ Kornelio ghatenda, "Ifuku ine syakahite, bhwakati kobhe bhobhu mbele ne kusegha ikunka lya masa mukagha isyubha mukati na nyumba jyane nandola hambele jyane; muntu na haghalele nafute myenda jyaswe, ³¹ ghambalila "Kornelio kusegha kobhe kwa hulikwa na Kabhumba, ne zawadi syo bhe kubhapina bhwabha bhukumbusyo hambele jyake Kabhumba. ³² Kasi laghila muntu ku Yafa akamwite muntu ghumwi ajitilwe Simoni ajise kumobhe, nyene akojitwa Petro. Ghogho ajikele kumujojya sabha ghumwi ajitilwe Simoni nyene nyumba jyaje jilihambali na bahari. ³³ Ghangalila: mustali ghoghu, "Nonyene hwalokesa alokasahula henyu, tyolimo mubhuneghe bhwa kale. ³⁴ Haho Petro ghafungula mulomo ghwaje ghatenda, "Fyene, naamini kubha Kabhumba tyanakobhola kubha na bhupendeleo. ³⁵ Badala jyaje kila itaifa muntu ghoghonse alikumwabhudu ne kwila maghambo gha haki akoswebhwa kumwaje. ³⁶ Ubhwinsi lupola loghwakafumyanga kubhantu bha Kuisraeli, hwakubhele ne kutangasya habali sogha jya amani kuhitila Yesu Kristo nyene ni Bwana ghwa bhonse- ³⁷ umwe mwenyene mwinsi itukio lya katokeanga Yudea ghonse lya kasumbula Galilaya, baada jya bhubatizo bhobho Yohana ghakatangasyanga. ³⁸ Tukio likabhele likumuhusu Yesu Kristo kubha Kabhumba bhoghahamujilanga mafuta gha mwegho mulafu ne kumanagha. Ghakajanga nekwiha fisogha ghanasisya bhonse bhukasafisibhwanga na ibilisi bhukohela Kabhumba akabhele hamwi naje. ³⁹ Ufwe tulibhasyahidi bhamaghambo ghonse ghogha kelanga kusihugho sya Bhuyahudi ne Kuyerusalemu- ghoghu ni Yesu ghebhakehaghanga ne kumughanika mutini. ⁴⁰ Ghughu muntu Yesu ghakamuhembulanga ifuku lya bhutatu ne kumuha kumanyika, ⁴¹ te kubhatu bhonse tukubha kubhasyahidi bhakasaghulibhwanga kabha Kabhumba- ufwe bhene twakulyanga naje ne kunywa naje ghahwa kuhembuka kufuma ku bhafu. ⁴² Ghatulaghila kuhubiri kubhantu ne kusyudia kubha ghogho gho Kabhumba ghakasaghulwanga kubha mwamuzi ghwa bhali bhupanga ne bhakafanga. ⁴³ Ku nyene bhanabii bhonse bhashudie, hakubha kila akoamni kwa nyene alopokela musamaha ghwa dhambi kuhitila isina lyaje." ⁴⁴ Bhwakabhele Petro ne kutenda ghagha mwegho mulafu ghwabhabhumba bonse bhakabhele bhahulikisye lupola lwaje. ⁴⁵ Bhantu bhahusike na sikundi sya bhaamini bhabhuputwe kopa- bhalya bhonse bhakesanga na Petro- bhakasyangazwanga, kusababhu jya karama jya mwegho mulafu ghakaghonwanga nagho kimataifa. ⁴⁶ Bhobhabha bhakahulikanga bhabha bhakumataifa bhekusahula kulughasindi ne kumwabhudu Kabhumba. Petro ghahindula, ⁴⁷ "Kuli muntu ghoghonse anakobhola kulesya mansi hakubha bhantu bhasibatizwe bhantu bhabha bhamupokela mwegho mlafu kobhe ufwe?" ⁴⁸ Hogha kaamurungu bhabatizwe kwisina lyake Yesu Kristo. Mwinkuka bhamusegha ajikale nabho fukusingana.