¹ Malaika wakasano akabigha igunda, nikavona ntondo yefuma uko wanga, ikagwa he isanga; naye akainkwa funguo ya itonga la gehena. ² Akajuvua lila ikonga la gehenam; hakatumburika moshi hala he lila ikongo sa moshi wa ng’anzo mbaha; izuva na wanga vikagerwa kija vuntu vwa ula moshi wa gehena. ³ Nzighe jikafuma he ula moshi, jikatonga he isanga jikainkwa nzinya sa vuntu vishusha vya isanga vyena nzinya. ⁴ Jikatiwa jisikonde mani a isanga, neri kintu chochose cha mani, neri mti wowose, esire vala vantu vesina kisimbiko cha Mrungu he vizngo vyavo. ⁵ Teveinkiwe kuvakoma, esire kuvarisha vwasi mieji misano. Na kuwajwa kwavo kweikie sa kwa kuuwa ni kishushe, chekimuma mntu. ⁶ He misi iyo vantu veneenda kifwa, mira tevekakivone neri, veneketa nkwina na kifwa mira kifwa kinevaaha. ⁷ Na fwani ya ijo nzighe jeikee sa farasi jeringanywe kutonga he nkondo, na he mitwi yajo ne sa ngoki, yeikee sa dhahabu kangi mavusho ajo eikee sa mavusho a vantu. ⁸ Najo jekina nywi sa ywii ja vache na majegho neki sa majegho a simba. ⁹ Najo jekina kibao he mpafu sa kibao cha kighera. Na mrurumo wa mazaghu ajo neki sa mrurumo wa magari a farasi nyingi jesarisha kutonga he nkondo. ¹⁰ Najo jina vitizye sa vya vishushe, na mivwa na nzinya yujo ya kuvaororija vantu mieji misano yekiho he vitizye vyajo. ¹¹ Jina Mfumwa wajo naye ni malaika wa gehena, izina lakwe he kiebrania niye Abadoni, na he kigiriki izina lakwe niye Apolioni. ¹² Vwasi vwa kuvoka vwakenja kuvecha. Rereha, mavwasi meri eneza uko nyuma. ¹³ Malaika wa katandatu akabigha igunda, nikasikia izii imwe lefuma he jila pembe ne ja meza ya mtaso ya dhahabu yeho mozya he Mrungu. ¹⁴ Lekimtii ula malaika vane vechungiwe he mweta mbaha wa frati. ¹⁵ Vala vamalaika vane vakachunguiwa, navo vekiringanywe he ila saa msi na mweji na mwaka, nesa vakome ifungu la katatu itaro lavo. ¹⁶ Na itaro la irivati vevekiwe ni farasi neki viku makumi meri kantu viku ikumi; nesikie itaro lavo. ¹⁷ Huvo nivwo vuntu nevonie ijo farasi he kuvonyeshwa kimpeho, na vala vevekiwe nijo, vena vubao vwa kighera he mpafu, sa vwa moto, na vwa kibuluu, na vwa kibiriti; na mitwi ya ijo farasi neki sa mitwi ya simba, na he myomo yajo hefuma moto na moshi na kibiriti. ¹⁸ Ifungu la katatu la vantu vakakomwa ni ao mabigho matatu, kwa uo moto na moshi na icho kibiriti, vyefumie he miomo yajo. ¹⁹ Ambu nzinya ja farasi jiho he myomo yajo, na he vitizye vyajo; ambu vitizye vyajo vyeikee sa nyoka, vina mitwi ya kuumia. ²⁰ Na vantu vala veshele, vesikomiwe ni ao mabigho, tevechwie mti he ndima ja mikono yavo, iti vashighe kudunkutia mashetani na mirungu ya dhahabu, na ya fedha na ya ng’andu na ya matwe na ya miti, yesiidima vona neri kusikia neri kutonga. ²¹ Neri tevechwie mti he vukomi vwavo, kana vuswi vwavo, kana kushinda kwavo, kana vukea vwavo.