¹ Kangi nikavona malaika ungi mwenye nzinya ekisea kufuma uko wanga, edokiwe ijumbi, na mkindi kindi wanga he mtwi wakwe; kangi vusho vwakwe vwekiikee sa izwa, na maghu akwe sa ngwijo ja moto. ² Na he mkono wakwe ekihete kitabu kidori chetambarurwe; kughu kwakwe kwa kume evatie wanga he bahari kula kwa kumuso wanga he isanga. ³ Naye akaiagha na izii ibaha sa vuntu simba yeruruma kangi aho ekiiagha ila mirurumo mfungate ikafunye maize ayo. ⁴ Aho ila mirurumo mfungate ikanafunye maize ayo nikakuringanya kuandika. Nami nikasikia izi lefuma uko wanga, kekiti: ivyo viteto vyetetiwe ni iyo mirurumo mfungate, vivike kisimbiko usireviandika." ⁵ Na ula malaika nemvonie eimuke wanga he bahari isanga, akavusha mkono wakwe wa kume akaurongaja na uko wanga. ⁶ Akakurigha na ula ekalama kae na kae, ula erumbie uko wanga na vintu vyose vyehoho, na isanga na vintu vyehoho, na bahari na vintu vyosevye vyehoho, ekiti: tehekakete igheri kangi; ⁷ Esire he misi ya izii la malaika wa kufungate ekinekuringanya kubigha igunda; aho niho mpiso ya Mrungu yenekoloshwa, sa vuntu evabirikire vazoro vakwe vala varoti." ⁸ Kangi lila izii nelisikie lefumie uko wanga likateta wa name, lekiti: Heriko, uveghuha kila kitabu chetambaruwe cheho he mkono wa ula malaika, eimuke he bahari na he isanga. ⁹ Nikamswia ula malaika niikamti aninke kila kidori. Akaniti: kighughe, ukile, nacho kinekubegha he ndeni yako, mira he momo wako kinenona sa nzoke." ¹⁰ Nikaghuho kila kitabu kidori he mkono wa ula malaika, nikakila; nacho kikanona sa nzoka he momo wangu, nekinakile nikabeghwa. ¹¹ Vikaniti Kikutara kurota kangi, “he malukolo na he vaisanga, na he viterire na he, vafumwa vajinki.”