¹ Nikainkwa mjungu weikee sa nzata: mmwe akaniti; vuka urepima nyumba ya mtaso ya Mrungu, na meza ya mtaso na avo vedunkuta aho. ² Na lukuta lweho nze ya nyumba ya mtaso wushighe, usilupime, ambu vaisanga veluinkiwe navo venevata muzi wezerire mieji makuni manena miri. ³ Name ninevaazera vaonwa vangu very varote misi kiku kimwe na maghana meri na makumi mtandatu, vedokie magunia. ⁴ Avo nivo ila mizeituni mira na vinara viri vyeimuka mozya ya Mfumwa wa si ii . ⁵ Mntu ekienda kuvakonda, moto ufuma he miomo yavo na kushota vanzo vavo. Na mntu ekienda kuvakonda, nivwo vuntu chenemtara kukomwa. ⁶ Avo vena nzinya ya kufinga uko wanga nesa mvua isingwe he igheri la vuroti vwavo. Navo veveiwa kugharusha mpombe ioke sakame, na kubigha isanga na kila ibigho aho vekikunda. ⁷ Aho vekinekenja vuonwa vwavo, ila nyama yefuma he gehena ineomana navo, nayo inevavota na kuvakoma. ⁸ Na vimba vyavo vinevoneka he nzia ya ula muzi (m’baha, weitangwa kimpeho sodoma na Misri)niho hantu na Mfumwa wavo evambiiwe he msalaba. ⁹ Na vantu va malukolo ose na mbari na vitetire na vaisanga venerereha vimba vyavo misi mitatu na nusu, neri tevekundije vimba vyavo vijikwe. ¹⁰ Na vala vetue he isanga veizihirwa he vuntu vwavo na kung’ara. Navo vetumiana vitumulilo vyenye na venye, ambu avo varoti very vekivarishije vwasi vala vetue he isanga. ¹¹ Misi mitatu na nusu yekivecha mpeho ya moo yefuma ha Mrungu ikavaingia, vakaimuka na maghu avo, kipea kibaha kikavagura vala vekiva rerehe. ¹² Vakasikia izii ibaha kufuma uko wanga he ijumbi, vanzo vavo vevarerehe. ¹³ Na je saa ila hakaketa kididimo kibaha he isanga, ifungu la ikumi la muzi likagwa; mazina a vantu viku mfungate vakakomwa ni kila kididimo. Na vala veshele vakaingiwa ni vogha, vakamkaza Mrungu wa uko wanga. ¹⁴ Vwasi vwa keri vwakenja kuvecha. Rereha vwasi vwa katatu vuza fia. ¹⁵ Malaika wa kufungate akabigha igunda, hakaketa maize mabaha uko wanga ekiti vufumwa vwa ili isanga vwaoka vufumwa vwa Mfumwa wetu ne Kristo wakwe, naye enetetia kae na kae." ¹⁶ Na vala vaghosi makumi meri na vane veikaa mozya ha Mrungu he vichumbi vya kifumwa chavo, vakagwa vakasoma vizango si; vakamdunkuntia Mrungu, ¹⁷ Vekiti,"Tukuanjela we Mfumwa Mrungu mwenye nzinya jose, wewaha kangi wekihoho ambu waghuha nzinya jako mbaha na kutetia. ¹⁸ Na vaisanga vakasikia oro, oro yako nayo ikaza, kangi igheri la kulahia vefwie likaringana, na la kuvainka vazoro vako varoti na vezerire mhako, na vala vefoleka izina lako, vadori na vabaha; na igheri la kuvakondia vala vekonda isanga." ¹⁹ Niho nyumba ya mtaso ya Mrungu yeho uko wanga ikajuvuwa, na sanduku ya kiaghano chakwe ikavoneka cha ndeni he nyumba yakwe ya mtaso. Hekaketa maluimiji, na maizii na vikwakwara, na vididimo, na mvua mbaha ya mabwe.