¹ Na uko wanga hakavoneka luvengo lubaha; mche edokie izuva, na mweji wekiho kijusi he maghu akwe, na wanga he mtwi wakwe ngoki ya ntondo ikumi na mbiri. ² Naye ekina ndeni, ekiiagha, ena lubegho lwa ivoo la kumogha. ³ Hakavoneka luvengo lungi uko wanga; rereha ijoka ibaha la moto, lekina mitwi mfungate na mpembe ikumi, na wanga he mtwi walo ngoki mfungate. ⁴ Na mtizye walo ukahurura ifungu la katatu la ntondo ja uko wanga, na kujivirinta he isanga. Na lila ijoka likaimuka mozya he ula mche eenda kumogha nesa ekimogha lile ula mwana. ⁵ Naye akamogha mwana wa kibwange eye enerisha vaisanga vose na nzata ya kighera. Na ula mwana akapekulwa mhaka ha Mrungu, na he kichumbi chakwe cha kifumwa. ⁶ Ula mche akaaha noko nyika, hantu Mrungu ehaharehe, nesa vamrere uko ikenda la kisi kikukimwe na maghana meri na makumi mtandatu. ⁷ Hekina nkondo uko wanga; Mikaeli na vamalaika vakwe vakaomana na lila ijoka, lile ijoka nalo likaomana navo hamwe na vamalaika valo; ⁸ Navo tevevotie, neri hantu havo teherevonwa narini uko wanga. ⁹ Lila ijoka ibaha likaviritwa, nyoka ya kae, yaitangwa Mrenge na shetani, eisha si ii yose; akaviritiwa na he isanga, na vamalaika vakwe vakaviritiwa hamwe nayo. ¹⁰ Nikasikia izii ibaha uko wanga, lekiti: Iki haketa tukio na nzinya na vufumwa vwa Mrungu wetu na vubaha vwa Kristo wakwe. Ambu ula mrenge wa vandughu vetu agushwa, ula ekivarengeha mozya he Mrungu wetu msi na kio. ¹¹ Navo vakamvota kwa sakame ya Mwana Ng’onji na kwa kiteto cha vuonwa vwavo; evo vesikundie moo wavo mhaka he kifwa. ¹² Heicho ng’areni unywi wanga, na unywi mwetue ho. Vwasi vwa isanga na bahari! Ambu ula Mrenge asea henyu ena oro mbaha emanyije iti ena igheri ipuhi. ¹³ Na lila ijoka lekinavone iti laviritwa na he isanga likamrisha ula, mche vwasi, ula emoghie mwana wa kibwange. ¹⁴ Ula mche akainkwa mazaghu meri a ngwirizi mbaha nesa aparatike, atonge noko nyika hala hantu hakwe eho hantu ereriwa igheri na magheri, na nusu ya igheri, hae na ila nyoka. ¹⁵ Ila nyoka ikafunya he momo wayo mpombe yeikee sa mweta, nesa imtike ula mche. ¹⁶ Isanga likamghenja ula mche; isanga likaasama, likamija ula mweta lila ijoka leufuyije he momo walo. ¹⁷ Ijoka likamsikia ula mche oro, likatonga kuraomanya lukolo lwakwe lwechele, vefurisha maazero a Mrungu na kumtetia Yesu vuonwa. ¹⁸ Kisha joka alisimama juu ya mchanga ufukwe wa bahari.