¹ Aho ekirochungue kisimbiko cha kafungate, uko wanga hakahuja chwi sa kakenda ka nusu saa. ² Name nikavona vala vamalaika mfungate veimuke mozya ya Mrungu, navo vakainkwa magunda mfungate. ³ Na malaika ungi akaza akaimuka mozya he meza ya mtaso, ehete kadende kadhahabu akainkwa uvumba mungi, nesa augeranye na maombi a vezerire vose wanga he meza ya mtaso ya dhahabu, yeho mozya he kichumbi cha kifumwa. ⁴ Na moshi wa ula uvumba ukakwea mozya he Mrungu hamwe na maombi a vezerire, kufuma he mkono wa malaika. ⁵ Na ula malaika akaghuha kala kadende, akakaizuja moto wefuma he meza ya mtaso akakavirita na he isanga hakaketa ba maize a luimiji na kididimo. ⁶ Na vala vamalaika mfungate vena magunda mfungate vakakuringanya nesa vaabighe. ⁷ Malaika wa kuveka kabigha igunda, hakaketa mvua ya mabwe na moto vyesankanyike na sakame, vikaviritwa na he isanga; ifungu la katatu la isanga likatikimira, na ifungu la katatu la miti likatikimira, na ere mani mavisi ose akatikimira. ⁸ Malaika wa keri akabigha igunda, kintu chefwababe ba atuvi mbaha yeaka moto kikaviritwa na he bahari; ifungu la katatu bahari likaoka sakame. ⁹ Ifungu la katatu la virumbe vyena moo vyeho he bahari vikafwa, ifungu la katatu la meli jikakondika. ¹⁰ Malaika wa katatu akabigha igunda, ntondo mbaha ikagwa kufuma uko wanga yekiaka sa taa, ikagwa ifungu la katatu la mieta na he visima vya mpombe. ¹¹ Na izina la iyo ntondo iitangwa Msuvavi, ifungu la katatu la mpombe likaoka msuvavi, na vantu vajini vakakomwa ni iyo mpombe, he kuvana kwayo. ¹² Malaika wa kane akabigha igunda, ifungu la katatu la izuva likabighwa, hata ifungu la katatu la mweji na ifungu la katatu la ntondo, nesa ao mafungu a katatu akete kija msi usiangaje ifungu lakwe la katatu, na kio nirehuvo. ¹³ Kangi nikavona na kusikia, ngwirizi mwe yeparatika uko wanga, yekiteta na izii ibaha: Vwasi, vwasi, vwa vala veikaa he isanga! He vuntu vwa maizii eshele a magunda a vamalaika vatatu, venebigha iki."