¹ Ivi vyekiveka nikavona vamalaika vane veimuke he pembe ne ja isanga, vekikindija nkungu ne ja isanga, iti nkungu isifefete he isanga, neri he bahari neri he kila mti. ² Nikavona malaika ungi ekwea uko kibuka izuva, ehete visimbiko vya Mrungu mwenye moo, akavaiaghia na izii ibaha, vala vamalaika vane vaezerwe kukonda isanga na bahari: ³ "Ekiti: Musikonde isanga neri bahari, neri miti, mhaka turongekenja kuvika vazoro va Mrungu wetu kisimbiko he vizango vyavo." ⁴ Nikasikia itaro la avo vevikiwe kisimbiko he kila mbari ya vaisrael, vantu viku ighana na makumi mane na vine. ⁵ Va mbari yakwe Yuda vevikiwe kisimbiko viku ikumi na viri, va mbari yakwe Rubeni viku ikumi na viri, va mbari yakwe Gadi viku ikumi na viri. ⁶ Va mbari yakwe Aseri viku ikumi na viri, va mbari yakwe Naftali viku ikumi na viri, va mbari yakwe Manase viku ikumi na viri. ⁷ Va mbari yakwe Simioni viku ikumi na viri, va mbari yakwe Levi viku ikumi na viri, va mbari yakwe Isakari viku ikumi na viri. ⁸ Va mbari yakwe Zabuloni viku ikumi na viri, va mbari yakwe Yosefu viku ikumi na viri va mbari yakwe Benyamini viku ikumi na viri, vevikiwe kisimbiko. ⁹ Ivi vyekivecha, nikavona, rereha, mzomano mbaha mno hesina mntu eidima kuutara, vantu va kila isanga, na mbari, na malukolo, na vitetire, veimuke mozya ya kila kichumbi cha kifumwa, na mozya ya Mwana Ng’onji vedokiwe suke nyewa, vehete matambi a misala he mikono yavo; ¹⁰ Vakaitanga na izii ibaha vekiti: Lukio lufuma he Mrungu wetu ula eikae he kichumbi cha kifumwa, na Mwana Ngonji!" ¹¹ Na vamalaika vose vekiimuke myondo yose he kila kichumbi cha kifumwa, na he valo vaghosi, na jila nyama ne, navo vakagwa vakasoma vusho si mozya he kila kichumbi cha kifumwa, vakamdunkutia Mrungu. ¹² Vekiti," Amen, ntogolo na ngazo na kiugho na kuvika mvera na shima na kifumwa na nzinya, ni vya Mrungu wetu kae na kae. Amen!" ¹³ Mmwe wa vala vaghosi, akagharusha, akaniti: Hamao! Ava vantu vedokiwe suke nyewa ni vani, navo vefuma nahi? ¹⁴ Nikamti," Mfumwa wangu, niwe wemanyije. Akaniti: Avo nivo vefumwa he vula vwasi vubaha, navo veojije suke javo na kujighosha nyewa kwa sakame ya Mwana Ng’onji. ¹⁵ Heicho veho mozya he kichumbi cha kifumwa cha Mrungu, navo vemrongia ndima msi na kio he nyumba yakwe ya mtaso, na ula eikae si he kichumbi cha kifumwa enejenga ihemo lakwe wanga hevo. ¹⁶ Tevekaresikia nza narini, neri tevekasikiewa nkini, neri izuva telikavashote, neri kiruke chochose. ¹⁷ Ambu ula Mwana Ng’onji eye eho ghati he kichumbi cha kifumwa, enevarisha, naye enevatonja he visima vya mpombe ya nkalamo na Mrungu enehanguja masoji ose he meso avo."