¹ Kangi nikavona aho cha Mwana Ng’onji ekivachungua kimwe cha vila visimbiko mfungate, nikasikia mwehe jila nyama ne yekiteta sa izii la mvurumo," Nzoo!" ² Nikavona, rereha farasi nyewa, na ula evekiwe niyo ena vula, akainkwa ngoki, naye akafuma sa mveti nesa avote. ³ Ekinachungue kisimbiko cha keri nikasikia ila nyama ya keri ye kiti," Nzoo!" ⁴ Farasi ingi ikafuma, inkundu twa, na ula evekiwe niyo echunguwe kuvusha mporere he isanga, nesa vakomane venye na vyenye, naye akainkwa mhandwi m’baha. ⁵ Ekinachungue kisimbiko cha katatu, nekasikia ila nyama ya katatu yekiti: Nzoo! Nikavona, rereha farasi nyiru, na ula evekiwe niyo ehete ngero ya kuemea he mkono wakwe. ⁶ Nikasikia sa izii ghati ya jila nyama ne lekiti: Ngero ya ngano ni dinari mwe, ngero ntatu ja ngano nyiru ni dinari mwe, neri usikonde mafuta kana mvinyo." ⁷ Ekinachungue kisimbiko cha kane, nikasikia ila nyama ya kane yekiti,"Nzoo!" ⁸ Nikavona, rereha farasi ya ivu, na ula evekiwe neyo izina lakwe niye kifwa, na he nkoma hakatonjana naye. Navo vekainkwa nzinya he ifungu la kane la isanga, bakome na mhandwi na nzota na ihumpa na kwa nyama mbivi jeho he isanga. ⁹ Ekinachungue kisimbiko cha kasano, nikavona kijusi he meza ya mtaso ngoro je vala vekomiwe vuntu vwa liteto cha Mrungu, na he vuntu vwa vuonwa vwavo. ¹⁰ Vakaiagha na izii ibaha, vekiti: oe Mfumwa, wezerire mwenye idi, mhaka rini wesilaha neri wesichwia sakame yetu sire he vala vetue he isanga? ¹¹ Navo, kila mmwe akainkwa suke nyewa, vakatiwa vanongehema kakenda kadori, mhaka itaro likoloke la vandima vaghenji na vandughu vavo, venerakomwa huvo savo. ¹² Name nikavona ekinachungue kisimbiko cha katandatu hakaketa kididimo kibaha cha isanga; nuva likajirara sa igunia la nywii, mweji wose ukaoka sa sakame, ¹³ Ntondo uko wanga jikagwa he isanga so vuntu so vuntu mkuu wegusha ntunda jawo, wekikushwa ni nkungu mbaha. ¹⁴ Uko wanga hakavushwa sa karatasi ja kitabu jekomw, na kila ntuvi na kirua vikasamijwa hantu havyo. ¹⁵ Na vafumwa ii si na vabaha, na vazuri, na venye nzinya, na kila mzoro na kila esi mzoro, vakakuvisa he mpanga na kijusi ya makamba a ntuvi, ¹⁶ Vakavwira ntuvi na makamba: Tagwieni, tuviseni he vusho vwa ula eikae si he kichumbi cha kifumwa, na he oro ya Mwana Ng’onji. ¹⁷ Ambu msi m’baha wa oro yakwe waza; ni ani eneidima kuimuka?"