¹ Nikavona he mkono wa kume wa ula eikae wanga he kila kichumbe cha kifumwa, kitabu cheandikwe ndeni na nze, chevikiwe visimbiko mfungate. ² Nikavona malaika mwenye nzinya, ekibirikira na izii ibaha: Ni ani eveiwa kutambavua kitabu, na kuchungua visimbiko vyacho?" ³ Tehevoneke mntu uko wanga, neri ha si ii, neri kijusi ya isanga eidime kuchungua icho kitabu, neri kukirereha. ⁴ Name nikaia mno, ni hala hesivoneke mntu chemfwenye kutambavua icho kitabu neri kukirereha. ⁵ Na mmwe wa vala vaghosi akaniti: Usirie; rereha, simba e wa mbari yakwe Yuda, Kikolo chakwe Davidi, ye avota aidime kutambavua kila kitabu na vila visimbiko vyaihe mfungate." ⁶ Nikavona ghati he kila kichumbi cha kifumwa na jila nyama ne, na ghati ya vala vaghosi, Mwana ng’onji eimuke, eikee sa ekomiwe, ena mpembe Mfungate na mesi mfungate, ejo Mpeho mfungate je Mrungu jetumiwe he si ii yose. ⁷ Akaza akaghuha kila kitabu he mkono wa kume wa ula eikae si he kila kichumbi cha kifumwa. ⁸ Ekivaghuha kila kitabu, jila nyama ne na vala vaghosi makumi meri na vane vakagwa si mozya he mwana Ng’onji, vose vekina mapango na vidende vya dhahabu vyeizue mafukijo, eo maombi a vezerire. ⁹ Navo vekiimba lwazi lushaa vekiti: chekufwenye we kughuha icho kitabu na kuchungua visimbiko vyacho; ambu wekikomwe uka mzorira Mrungu vantu kwa sakame yako, va mbari jose na viterire na malukolo na vaisanga. ¹⁰ Ukavaghosha kuoka vufumwa na vatari he Mrungu wetu; navo venetetia ili isanga." ¹¹ Nikavona, niasikia maize a vamalaika vajinki miondo yose ya kila kichumbi cha kifumwa, na ya jila nyama, na ya vala vaghosi, na itaro lavo neki viku ikumi na kiku ka kiku. ¹² Vekiteta na izii ibaha: chemfwenye Mwana Ng’onji ekomiwe, kughuha kifumwa na vuzuri na kiugho na nzinya na shima na ngazo na ntogolo. ¹³ Na kila kirumbe cheho uko waanga na he isanga na kijusi ya isanga na wanga he bahari, na vyose vyeho ndeni heyo, nikavisikia vyekiti: Ntogolo na shima na ngazo na vubaha ni vya ula ekae si he kichumbi cha kifumwa, na Mwana Ng’onji, kae na kae. ¹⁴ Na jila nyama nejikati, Amen na vala vaghosi vakagwa si vakamdunkutia.