¹ Kangi nikavona wanga shaa na isanga ishaa; ambu wanga ya kuvoka ma isanga la kuvoka, vyakenja kuvecha, neri tehena bahari kangi. ² Name nikavona ula muzi wezerire, Yeresalemu mshaa, wekisea kufuma uko wanga he Mrungu, veringanywe sa mwai elondolwa ehambiiwe mme wakwe. ³ Nikarikia izii ibaha lefuma he kila kichumbi cha kifumwa, lekiti: Rereha kikalo cha Mrungu hamwe na vantu, naye enetua hamwe navo, navo veneikajanya navo. ⁴ Naye enehanguja kila isoji he meso avo, neri kifwa tekikazevoneka narini, kana ntire, kana kiio kana kusulumira, tekukazevoneka wa, ambu vila vya kuvoka vyavecha. ⁵ Na ula eikaie kila kichumbi cha kifumwa akati” rereha, naghosha vyose vishaa. Akaniti “Andika iti viteto ivi ni vya kuitikijwa na vya idi. ⁶ Akaniti “vyakoloka, Mi ni alfa na omega, wa kuvoka na wa kukenjija, ninemunka ula ena nkiru mpombe ya kisima cha nkalamo sutwa. ⁷ Ula enevota, enepala ivyo, name nineoka Mrungu wakwe, naye eneoka mwana wangu. ⁸ Mira vafole na vala vesina mwitikijo, na vevihija na vakomi na vareshinda na vasavi na vala vetasa mirungu, na vamongo vose ifungu lavo ni he ila ndiva yeaka moto na kibiriti icho nicho kifwa cha kevi." ⁹ Hakaza mmwe wa vala vamalaika mfungate veihete vila vidende mfungate vyeuzue ala mabigho mfungate a mkengelejo, naye akateta name, ekitu: Nzo na kunu, name ninekuvonya ula mwai wa mlondolo, mwai wa mwana Ng’onji. ¹⁰ Akanitika kimpeho na he mtuvi mbaha ndeza akanivonyesha ula muzi wezerire, Yerusalemu, wakisea kufuma uko wanga hakwe Mrungu. ¹¹ Wena ngazo ya Mrungu kangi kianga chawo chefwanane na ibwe la zora mbaha, sa kabwe ka yaspi keshononote sa kiyoo. ¹² Wekina lukuta lubaha lueza lwena mivera ikumi na miri, na miri, na he ila mivera vamalaika ikumi na very, kangi heandikwe mazina a mbari ikumi na mbiri ja vana Israeli. ¹³ Mondo wa kibuka izuva mivera mitatu; na mondo wa ughu mivera mitatu; na mondo wa ishi mivera mitatu; na mondo wa kigwa izuva mivera mitatu. ¹⁴ Na lukuta lwa muzi lwekina misngi ikumi na miri na he ila misngi mazina ikumi na meri a jila ntume ikumi na very va Mwana Ng’onji. ¹⁵ Ula ekiteta name ekihete mjungu wa dhahabu nesa aidime kupima uo muzi, na mivera yawe na lukuta lwalo. ¹⁶ Na ula muzi una pembe ne vueza vwavo na vuaramu vweringane. Akapima muzi na ula mjungu: ukakoloka maili kiku kimwe na maghana masano, vueza vwa na vuaramu na kueha na wanga weringanane. ¹⁷ Akapima lukuta lwalo, lukakoloka mikono ighana na makumi mane na mine, he kiringanyo cha kimntu, (nikwo kuti cha malaika). ¹⁸ Na mijengire ya lalwo neki ya yaspi, kangi ula muzi neki wa dhahabu yedisha, sa kiyoo cheelile. ¹⁹ Na misingi ya lukuta lwa muzi yekihambiwe a mabwe a zora mbaha a kila mbare. Misingi wa kuvoka neki wa yaspi; wa keri neki wa safari; wa katatu neki kalkedoni wa kane neki zumaridi. ²⁰ Wa kasano neki Sardoniki, wa katandatu neki yakiki, wa kafungate neki krisoliti wa kanane neki zabarajadi, wa kenda neki topaso wa ikumi neki krisopraso wa ikumi na kamwe neki kiakinto; wa ikumi na keri neki ametisto. ²¹ Na ila, mivera ikumi na miri ni lulu ikumi na mbiri; kila mvera ni lulu mwe, kangi nzia ya muzi neki dhahabu njenye, yevona sa kiyoo. ²² Name sivonie nyumba ya mtaso hewa; ambu Mfumwa Mrungu mwenye nzinya jose na Mwana Ng’onji nivo nyumba ya mtaso hevo. ²³ Uo muzi teuenda izuva kana mweji kuungaja, ambu ngazo ya Mrungu iugera kianga, na taa yawo ni Mwana Ng’onji. ²⁴ Vaisanga venetongia he kianga chavo, na vafumwa va isanga veete ngazo yavo hewo. ²⁵ Na mivera yawo treikafingwe he musi neri; ambu aho tehena kio. ²⁶ Navo veneete ngazo na shima ja vaisanga hewo. ²⁷ Na hewo tehekaingie kintu chochose ekisoka, kana ula evonga vyevihija na mongo, mira nire vala veandikwe he kitabu cha nkalamo cha Mwana Ng’onji.