¹ Kangi akanivonyesha mweta wa mpombe ya nkalamo, wemekenisa sa kiyoo wekifuma he kila kichumbi cha kifumwa cha Mrungu na cha Mwana Ng’onji. ² Ghati he nzia mbaha yawo mondo uu na uu wa ula mweta, hekina mti wa nkalamo wegera ntunda mbare ikumi na mbiri, wefunya ntunda jawo kila mweji; na mahungo auo mti ni a kubanjinja vaisanga. ³ Kangi tehekazeketa kiraro chochose narini; na kichumbi cha kifumwa cha Mrungu na cha Mwana Ng’onji kineikaa aho, na vazoro vakwe venemtumikia. ⁴ Navo venemvona vusho vwakwe na izina lakwe linevoneka he vizango vyavo. ⁵ Neri tehekazeketa kio narini, kangi tevekareenda taa, neri kianga cha izuva, ambu Mfumwa Mrungu evaangaje, navo venetetia kae na kae. ⁶ Akaniti “viteto ivi ni vya kuitikija na vya idi; na Mfumwa Mrungu wa mpeho ja varoti emtumie malaika wakwe kuvavonyesha vazoro vakwe vila vyeneoka fia. ⁷ Rereha, niza fia, mrela vwedi ni ula egurisha viteto vya vuroti vwa iki kitabu. ⁸ Name Yohane nimi nesikie na kuvona ivyo. Aho nekisikia ivyoi na kuvivona, nekagwa si iti nidunkute mozya he maghu a malaika ula enivonyesha ivyo. ⁹ Naye akaniti “Rereha, usikete huvo, mi mzoro mghenji wako na wa vandughu vako varoti, na wa vala vegurisha viteto vya iki kitabu. Mdunkutie Mrungu!" ¹⁰ Akaniti “Ivi viteto vya vuroti vwa iki kitabu usivigere isimbiko, ambu igheri lavyo lazengelela. ¹¹ Mkibonda nazike keta kibonda; ejirare nazike kukujiraja; na mkitea nazike keta kitea; na ezerire nazike kukuzerija. ¹² Rereha niza fia, na mhako wangu nirena nawo kumriha kila mntu sa vuntu ndima yakwe yeikee. ¹³ Mi ni Alfa na Omega, kivoko na msio wa kuvoka na wa kukenjija. ¹⁴ Varela vwedi n vala veoja suke javo, vakundijwe kutonga he uo mti wa nkalamo, na kuingia he mivera yawo vafikie muzi. ¹⁵ Uko nze hena maguro, na vaswi, na vareshinda, na vakomi na varetasa mirungu na kila mntu ekunda mongo na kuuketa. ¹⁶ Ni mi Yesu nemtumie malaika wangu kimutetia vonwa kwa ivyo he makanisa. Mi nimi ne kikolo na mbereko yakwe Davidi; ila ngalekere yeangaja cheheyavo. ¹⁷ Na Mpeho na Mwai ebridolwa vati: Nzoo! Na ula esikia nati: Nzoo! Ula ena nkiru naze; na ula eenda, naghuhe mpombe ya nkalamo sutwa. ¹⁸ Nimetetia vuonwa kila mntu esikia viteto vya vuroti vwa iki kitabu, mntu wowose eneviongeja, Mrungu enemwongejija ao mabigho eandikwe he iki kitabu. ¹⁹ Na kila mntu evusha chochose he vioteto vya vuroti vwa iki kitabu, Mrungu enemvushija ifungu lakwe he ula mti wa nkalamo, na ula muzi wezerire ewo mburi jawo jeandikwe he iki kitabu. ²⁰ Ula etetia ivi vuonwa eti “Yee niza fia, Amen Nzoki Mfumwa Yesu” ²¹ Mbonea ya Mfumwa Yesu na iikae na unywi vose .Amen.