¹ Ivi vyekivecha nikasikia izii sa izii la mavungano majinki, izii ibaha uko wanga, lekiti Haleluya, lukio, na ngazo na nzinya ni vya Mrungu wetu. ² Ambu milaho yakwe ni ya idi na ya kitea, ambu amlaha ula mche mreshinda m’baha ekondanye isanga kwa mashindo akwe, na kuchwa sire he sakame ya vazoro vakwe he mkono wakwe." ³ Vakateta ka keri “Haleluya. Na moshi wawo utururika na wanga kae na kae. ⁴ Na vala vaghosi makumi meri na vane, na jila nyamane vakadunkuta, kumtasa Mrungu eikaie kila kichumbi cha kifumwa, vekiti. Amen, Haleluya!" ⁵ Izii likafuma he kila kichumbi cha kifumwa lekiti “M’bumijeni Mrungu wetu, unywi vazoro vakwe vose, unywi mwe mfoleka, vadori na vabaha." ⁶ Nikasikia izii sa izii la mavungano majinki na sa kughona kwa mpombe mbaha na sa mrurumo wa kikwakwara cha nzinya, lekiti “Haleluya! Ambu Mfumwa Mrungu mwenye nzinya jose aghuha vufumwa. ⁷ Tuizihirwe tungare, tumuinke shiman, yakwe, ambu mlondolo wa Mwana Ng’onji wafika, na mwai wakwe naye akuringanya. ⁸ Naye ainkwa kudoka suke nyewa yedi yemekenisa, yezerire; ambu (suke iyo nyewa ni mihiro ya kitea ya vezerire). ⁹ Naye akaniti “Andika” Varela vwedi ni vala verarikwe he mbao ya mlondolo wa Mwana Ng’onji. Akaniti “Viteto ivi viteto vya idi vyakwe Mrungu. ¹⁰ Name nikagwa mozya ya maghu akwe, nesa nimdunkutie, akaniti “Rereha, usikete huvo, mi ni mzoro mgenji wako na wa vandughu vako vena na vuonwa vwakwe Yesu. Mdunkutie Mrungu! Ambu vuonwa nwakwe Yesu nivwo mpeho wa vuroti." ¹¹ Kangi nikavona wanga hejuvuke, rereha farasi nyewa, na ula evekiwe niyo eitangwa mkitengo na wa idi naye echwa masa na kubigha nkondo kwa kitea. ¹² Na meso akwe neki sa luverevere lwa moto, na he mtwi wakwe ena ngoki nyingi; kangi ena izina leandikwe, hesina mntu elimanyije esire ye mwenye. ¹³ Naye edokiwe suke yeshofekwe he sakame, na izina lakwe eitangwa, kiteto cha Mrungu. ¹⁴ Na marivati eho uko wanga vakamratera vevekiwe ni farasi nyewa na kudokwa suke nyewa jedisha. ¹⁵ Na he momo wakwe hefuma mhandwi wekehe, nesa ateme nawo vaisanga. Naye enevarisha na nzata ya kighera, naye evata ikamio la mvinyo wa oro ya kuvihiwa kwa Mrungu mwenye nzinya jose. ¹⁶ Naye ena izina leandikwe he suka yakwe nahe fae yakwe “MFUMWA WA VAFUMWA NA M’BAHA WA VABAHA. ¹⁷ Kangi nikavona malaika ungi eimuka he izuva, akamberija na izii ibaha ekivwira madeghe ose eparatika wanga “Nzoni muzane he mbao ya Mrungu e mbahisha” ¹⁸ Nesa mule nyama ja vafumwa na nyama ja vaakida vabaha, na nyama je venye nzinya, na nyama ja farasi na ja vala vevekiwe nijo, na nyama ja vantu vose, nkombolwa na vazoro, vadori na vabaha." ¹⁹ Nikavona iyo nyama na vafumwa va isanga na marivati avo, vezomane kuomana na ula eikae ila farasi hamwe na marivati akwe. ²⁰ Ila nyama ikagurwa hamwe na ula mroti wa mongo, ula eketie maluvengo mozya heye eo eishije nao vantu vala veghuhie kila kisimbiko cha iyo nyama na vala vedunkutie fwanyanyi yayo, avo very vakataghwa verho he ila ndiwa ya moto yeaka kwa kibiriti. ²¹ Na vala vangi vakakomwa na mhandwi wa ula eikaie ila farasi mhandwi wefuma he momo wakwe. Madeghe ose akaighuta nyama javo.