¹ Ivi vyekivecha nikavona malaika ungi, ekisea kufuma uko wanga, ena nzinya mbaha na isanga likaangajwa ni ngazo yakwe. ² Akaamberija na izii ibahisha, ekiti “Wagwa Babeli, wagwa ula muzi m’baha” waoka kikalo cha mashetani, na iboma la kila mpepo mbiri na iboghoso la madeghe ase mavivi evihija. ³ Ambu vaisanga vaso venwie mvinyo wa oro ya mashindo akwe, na vafumwa va msanga veshindie naye, na vasusuriji va masanga vevonie mari he nzinya ya kukufakakasha kwake." ⁴ Kangi nikasikia izii lingi lefuma uko wanga lekiti “Fumani hakwe unywi vantu vangu, musikete sanga na mabanu akwe, neri musighushe mabigho akwe. ⁵ Ambu mabanu akwe akwea mhaka uko wanga, Mrungu naye akumbuka vivivi vyakwe. ⁶ Mwiheni sa vuntu naye eihie, mumwihe kantu keri he kiringanyo cha mihiro yakwe. He kikombe kila ekirunganye mrunganyijeni kantu keri. ⁷ Sa vuntu ekikukazie na kukugera he msirmayo, munkeni misulumiro na lusayoyo he kiringanyo icho. Ambu eteta he ngoro yakwe “Mi neikee si Mfumwa wa kicho, neri sifwiiwe ni mme, neri sikasononoye narini. ⁸ Heicho mabigho akwe eneza msi mmwe kifwa na kusononoya na nza, naye eneshotwa atikimire he moto. Ambu Mfumwa Mrungu emlahie ni mwenye nzinya." ⁹ Na vafumwa va masanga veshindie naye vesirimoya hamwe naye, verieia na kumchwia ntiro; vekivona moshi wa kutikimira kwakwe; ¹⁰ Vekiimukia hae he vuntu vwa fole ya kuorora kwakwe, vekiti “Vwasi vwasi, muzi ula e m’baha, Babeli, muzi ula wena nzinya ambu he saa mwe mlaho wako waza." ¹¹ Na vasusuriji va masanga veia na kuuchwia ntiro, ambu tehena mntu ezora mbuso jawo kangi. ¹² Mbuso ja dhahabu na fedha na mabwe a zora mbaha, na lulu na bafuka yedi, na suke ja zurungi, na hariri, na suke nkunde, na kila mti wepupuntika, na ntanu jose ja mpembe, na kila ntanu ya mti wa zora mbaha, na ja ng’andu na ja kighera, na mtoto. ¹³ Na mdalasini, na iliki, na uvumba, na, marashi, na ubani na mvinyo, na mafuta a mzeituni, magonji, na farasi na magari na miri na ngoro ja vantu. ¹⁴ Na ntunda jena sereser he ngoro jako jakusovekia, na vintu vyenyutume, na vintu vya nguma vyakutekera, neri vantu teveka zevivona kangi. ¹⁵ Na vasusuriji va vintu ivyo vemazie hewo, veneimukia hae he vuntu vwa fole ya kuorora kwawo. Vekiia na kuchwa ¹⁶ ntiro. Vekiti “Vwasi, vwasi muzi ula e m’baha! Wedokiwe bafuta yedi na suke ya zurungi na nkundu na kuhambwa na dhahabu na mabwe ena zora mbaha na lulu. ¹⁷ Ambu he saa mwe vuzuri vujinki vweri ngane huvu vwasia. Na kila m’baha wa meli, na ula etonga hose kwa matango na vabaharia, na vose veronga ndima he bahari, vakuimukia hae. ¹⁸ Vakaia mno vekinavone moshi wa kutikimira kwao, vekiti “Ni muzi ani wefwanane na uu muzi m’baha! ¹⁹ Vakagera teri he mitwi yavo, vakaia vekifumwa ni masoji na kuchwa ntiro, vekiti vwasi, vwasi muzi ula e m’baha! Ewo hewo vose vena meli he bahari veshumie mari he vuzuri vwawo; ambu he saa mwe wasia. ²⁰ Izihirwani vuntu vwawo, unywi wanga, na unywi vezerire na ntume na varoti, ambu Mrungu alaha mlaho wenyu hewo. ²¹ Na malaika mwe ena nzinya akavusha ibwe sa ibwe ibaha la loa, akalivirita na he bahari ekiti “Huvu nivwo vuntu ula muzi m’baha wa Babeli weneviritwa na nzinya, neri teukavoneke narini. ²² Kangi izii la vazebigha vinanda na lamitoriro, na la Filimbi na la magunda, telika zesikiwa hewe narini, neri fundi wowose wa ndima jojose tekazenoneka hewe narini neri izii la loa telikasikiwe hewe narini. ²³ Kangi kianga cha taa tekikaomike hewe narini, neri izii la mzalondola na la mzalo ndolwa telikasikiwe hewe narini, ambu avo vasusuriji vako neki vabaha va isanga ambu vaisanga vose vekiishijwe ni maghanga ako. ²⁴ Na hewo hevoneke sakame yan varoti na ya vezerire na ya vala vose vekomiwe he isanga.