¹ Hakaza mmwe wa vala vamalaika mfungate, vehete vula vudende mfungate, akateta name, ekiti: Nzo na kunu, ninekuvonyesha mlaho wa ula mche mreshinda m’baha eikaa he mpombe nyingi. ² Eye vafumwa va msanga veshindie naye na vala vetue he masanga veengejwa ni mvinyo wa mashindo akwe." ³ Ahanitika kimpeho noko nyika, nikavona mche evekiwe ni nyama nkundu twa, veizue mazina na faraja, yena mitwi mfungate na mpembe ikumi. ⁴ Kangi ula mche ekidokiwe suke ja zurungi na nkundu, ehambiwe na dhahabu, na mabwe ena zora mbaha na lulu, naye ekiihete kikombe cha dhahabu he mkono wakwe cheizue mavihijo, na maikwe a mashindo akwe. ⁵ Na he kizango chakwe ekina izina leandikwe la mpiso” BABELI M’BAHA MLALA WAVO VARESHINDA NA MVIHIJO A II SI." ⁶ Nikamvona ula mche eengee sakame ya vezerire na sakame ya vaonwa vakwe yesu nikinamvone nikamaka kimako kibaha. ⁷ Na ula malaika akaniti “Hanini wemaka? Ninekuvwira mpiso ya uu mche, na ii (nyama yemtikie yena mitwi mfungate na mpembe ikumi). ⁸ Ila nyama weivonie yekihoho, nayo teiwaho, nayo yekururinganye kukwea kufuma he gehena itonga he kukondika. Na vala vetue he isanga vesiandikwe mazina avo he kitabu cha nkalamo too aho si ii yekidungwa kurumbwa, venemaka vekivona ila nyama, iti yekihoho, nayo teiwaho, nayo inereoka aho. ⁹ Aho niho hena kucha kwena kiugho. Iyo mitwi mfungati ni ntuvi mfungate uo mche ejiikaie. ¹⁰ Najo ni vafumwa mfungate. Vasano vakenja kugwa na mmwe echeri aho, na ula uni tenaza naye ekiza kimtara aikae kamtungo kadori. ¹¹ Na ila nyama yekihoho kangi teiwaho, nayo niyo ya kanane, nayo niyo mwe na jila mfungate, nayo itonge he kukondika. ¹² Na jila mpembe ikumi wejivonie ni vafumwa ikumi evo vesinaghuha kifumwa, mira veghuha vubaha sa vafumwa, hantu ha saa mwe, hamwe na ila nyama. ¹³ Ava mburi yavo ni mwe, navo veinka ila nyama nzinya yavo na nguju javo. ¹⁴ Ava venelwana na Mwana Ng’oji, na Mwana Ng’onji enevazima ambu ye ni mfumwa wa vafumwa na m’baha wa vabaha na vala ena navo nivo veitangwe na veseghurwe, na vakitengo. ¹⁵ Kangi akaniti “ila mpombe weivonie, hantu ula mche eshinda eikae si, ni malukolo na mavungano, na vaisanga na vitetire. ¹⁶ Na jila mpembe ikumi wejivanie, na iyo nyama, ijo jinemvihiwa ula mche mreshinda najo jinemghumba na kumshigha kituhu, jine mla nyama jakwe, jinemshota atikimire he moto. ¹⁷ Ambu Mrungu ejiinkie he ngoro jojo kuringanya mburi yakwe, na kuchwa mburi mwe na kuinka ila nyama vufumwa vwajo mhaka viteto vya Mrungu vikoloshwe. ¹⁸ Na ula mche wemvonie ni ula muzi m’baha wena vufumwa vwa kutetia vafumwa va si ii."