¹ Kangi nikavona, rereha, Mwana Ng’onji eimuke wanga ya ntuvi ya Sayuni ena na vantu viku ighana na makumi mane na vine izina lakwe, na izina la vavee leandikwe he vizango vyavo. ² Name nikasikia izii lefuma na uko wanga, sa kughona kwa mpombe nyingi, na sa mrurumo wa kikwakana kibaha. Na ilo izii nelisikie, neki sa izii la vazabigha mazeze vekibigha mazeze avo. ³ Na vekiimba wimbo mshaa mozya ya kila kichumbi cha kifumwa, na mozya ya jila nyama ne, na vala vaghosi, neri tehema mntu eidime kukucheja ula wimbo, esire vala viku ighana na makumi mane na vine, evo vezorirwe he si ii. ⁴ Ava nivo vesijirajwe ni vache, ambu ni vabova hivyo. Ava nivo vemratere Mwana Ng’onji kila hantu etonga. Ava vezorirwe he vantu, vaoke va kuvoka he Mrungu na he mwana Ng’onji. ⁵ Na he myomo yavo tehevoneke mongo. Ambu tevena madamaro. ⁶ Kangi nikavona malaika ungi ekiparatika ghati he wanga, ena mburi yedi ya kae na kae evabirikire vala veikaa he isanga, na kila vaisanga, na mbari na vitetire na malukolo. ⁷ Akateta na izii ibaha," Mfolekeni Mrungu na kumkaza, ambu saa yakwe ya mlaho yafika. Mdunkutieni ye erumbie wanga na si na bahari na visima vya mpombe ⁸ Kangi wa ula malaika ungi wa keri akaratera, ekiti: wagwa, Babeli wagwa, ula muzi m’baha, ambu niwo wenweshije vaisanga vose mvinyo wa oro ya mashindo awo. Ng’onji. ⁹ Na malaika ungi wa katatu akaratera, akateta na izii ibaha: Mntu wawose enedunkutia ila nyama na fwanyanyi yayo, na kughuha luvengo he kizange chakwe kana he mkono wakwe. ¹⁰ Enevanwa he ula mvinyo wa oro yakwe Mrungu werongiwe kinguri, he kikombe cha oro yakwe; naye enerishwa vwasi he moto na kibiriti mozya ya vamalaika vezerire na ya Mwana. ¹¹ Na moshi wa kuwajwakwavo utururika na wanga kae na kae, neri vala vedunkutia iyo nyama na fwanyanyi yayo, na kila mntu eghugha luvengo lwa izina layo, tevena kutundana msi na kio. ¹² Aho niho hena kugumirija kwa vezerire, vala vegurisha maazero a Mrungu na kumwitikija Yesu. ¹³ Nikasikia izii lefuma uko wanga lekiti: Andika varela vwedi ni vala vefwia he Mfumwa kuvokia iki yee Mpeho eti. Nesa vaheme he kubinuka kwavo; ambu mihiro yavo itanjanya navo. ¹⁴ Kangi nikavona, rereha, ijumbi ijewa, na wanga he io ijumbi hena mmwe eikae ho, efwanane, kangi he mkono wakwe ehele ihandwi lekehe. ¹⁵ Na malaika ungi akafuma kula he nyumba ya mtaso akamteha ula eikae wanga he lila ijumbi na izii ibaha gura ihandwi lako ufindike, ambu saa ya lufindika yafika; ambu mafundiko a isanga akua. ¹⁶ Na ula eikaa wanga he ijumbi akajuta ihandwi lakwe he isanga, isanga likafindikwa. ¹⁷ Kangi wa malaika ungi akafuma he nyumba ya mtaso yeho uko wanga, uo na ye erehete ihandwi lekehe. ¹⁸ Hakafuma malaika ungi he meza ya mtaso, eye ena nzinya ya moto, naye akavremwitanga ula ehete ilo ihandwi lekehe na izii ikaha ekitii kota ihandwi lakwo lekehe na izii ibaha, ekiti kota ihandwi lako lekehe uchwe vilengele vya mabibu wa isanga, ambu zabibu jakwe jobwibwa mno. ¹⁹ Ula malaika akakota ihandwi lakwe na he isanga akachwa mzabibu wa isanga akavirita zabibu na he la oro ya Mrungu. ²⁰ Lila ikamio likavatiwa uko nze ya muzi, sakame ikafuma he lila ikamio mhaka he hatamu ja farasi, sa hantu ha kutonga maili maghana meri.