¹ Hekinache vabaha va vatasi vose na vaghosi va vantu, vakamlia njama Yesu iti vamkome. ² Vakamchunga, vakamtika, vakamwinkija ha mlao Pilato. ³ Niho Yuda ula mremwinkija ekivona iti akenja kuchwiiwa mburi, akawajwa he ngoro akavahunduiya vabaha va vatasi na vaghosi jila hela makumi matatu. ⁴ Ekiti, “Nateshanya hala nekiinkija sakame yesina nzune”. Vakati, “Tunani na iyo mburi irerehe mwenye”. ⁵ Akatagha jila hela he nyumba ya mtaso akavuka akatonga kukurengesha. ⁶ M’baha va vatasi akaghuha jila hela akati, “Tekive kujivika he sanduku ya itasi ambu ni ja zora ya sakame”. ⁷ Vakahunduyana mitwi hamwe na ijo hela vakazora ishamba la mrechuma nyungu, nesa haokwe hantu hakujikia wagheni. ⁸ Heicho ilo ishamba liitangwa ishamba la sakame mhaka yoo ili. ⁹ Niho kila chetetiwe ni mroti Yeremia kikafumana ekiti, veghuhie hela makumi matatu, zora ya ula etaghiwe eye kumwe he vana va Israeli vemchiie zora he yee. ¹⁰ Vakazora nanjo ishamba la mrechuma nyungu sa vuntu Mfumwa aniazere." ¹¹ Yesu akaimuka mozya he mlao, mlao akamvija akati, We niwe Mfumwa wa Vayahudi? Yesu akamti, “Vuntu wateta” ¹² Mira ekilahwa ni vabaha va vatasi na vaghosi, legharushe kintu neri. ¹³ Niho Pilato akamti, “Tusikie ni vintu vighahi vekuchunga?” ¹⁴ Naye asigharushe neri kiteto kimwe, niho mlao akamaka haiwa. ¹⁵ Igheri la msi m’baha mlao emanyere kuchanguia vantu mntu mmwe achungiwe uo vantu mbivi, eitangwa Baraba. ¹⁶ Misi ila hekina mntu echungiwe ena nguma mbivi eitangwa Baraba. ¹⁷ Aho vekivungana, Pilato akavati, Ni uhi mweenda nimuchunguie? Ni baraba vana ni Yesu eitangwa Kristo. ¹⁸ Ambu emanyije iti vemgurire he mbiri ya luiso. ¹⁹ Na hala eikee he kichumbi chakwe cha luhia, mche wakwe akamtumie ntume kuti usiingie he mburi ya uo mwenye idi ambu mengo nerishijwe vwasi mno he ndoto vuntu vwakwe." ²⁰ Mira vabaha va vatasi na vaghosi vakavase mbeka vantu iti wamsaghire Baraba, nesa Yesu akomwe. ²¹ Mlao akavavwija he ava very ni uhi mweenda nimuchungie? Vakati “Ni Baraba”. ²² Pilato akavati, Uo Yesu eitagwa Kristo nimkerete ze? Vose vakati navabwe he,"msalaba" ²³ Akati hanini? Ni kivivi ani eketie? Wakazi kalonza vakati na vambwe he msalaba. ²⁴ Niho Pilato ekivona iti tehena cho cheve esire mkende wenetu akaghuka mazi akaoja mikono veyoye akati, mis siho he nzune ya sakame ya uu mntu esina nzune rereheni icho unywi venye. ²⁵ Vantu vose vakati Sakame yakwe na ituhundukie uswi na vana vetu." ²⁶ Niho akamchunguia Baraba, ekinambighe Yesu na nzata akamwiinkija iti arevambwa he msalaba. ²⁷ Niho vasikari va mlao wakamghuha Yesu, vakamwingija he nyumba ya massa, vakavunganana. ²⁸ Vakamhambua suke jakwe vakamdoka kanzu nkundu. ²⁹ Vakahusa ngata ya mivwa, wakamgera he mtwi wakwe ba vakamvikia kamjungu he mkono wa kume vakam’bigha makunkuruna kumsola vekiti “Twakukezia Mfumwa wa Vayahudi?" ³⁰ Vakamtufia mate, vakahugha kala kamjungu vaka m’bigha nako he mtwi. ³¹ Veki na chenje kusola, vakamg’ola ila suke vakamdoka jila jakwe vakamtika kuramvamba he msalaba. ³² Aho vekifuma nze vakamvona mntu wa kirere eitagwa Simoni uo vakamtikja iti atike msalaba wakwe. ³³ Vekinafika hantu heitangwa Golgota ni m sa kuti he mtwi. ³⁴ Vakamunka mvinyo wesankanywe na nyongo iti anwe ekinaugheshe akaherwa kunwa. ³⁵ Vekimvamba he msalaba vakaghava suke njwake kwa kubigha kura. ³⁶ Vakaika hata vekimrinda. ³⁷ 37. Wanga he mtwi wakwe, hevikiwe masa akwe eandikwe uu ni Yesu Mfumwa wa Vayahudi." ³⁸ Igheri ilo ilo hakavambwa na vareghamba very hamwe naye mmwe mkono wa kume na mmwe mkono wa kumoso. ³⁹ Vala vekivecha aho nzieni vakamsola vekikusha mitwi yavo vekiti. ⁴⁰ We mrebaja nyumba ya mtaso na kuijenga kwa misi mitatu, kukije ra we mwenye! Kari u mwana wa Mrungu sea he msalaba. ⁴¹ Nire huvo hata vabaha va vatasi hamwe na vaandiki na vaghosi vakamsola velati.

⁴² Ekijije vangi mira ye mwenye tedima klukukija kari niye mfumwa wa vayahudi na see he msalaba na uswi tunemwiitika. ⁴³ Ekuvikie ikuji he Mrungu, kakicha kukundie nakije ra ambu icho ekiti mi ni mwana wa Mrungu." ⁴⁴ Nirehuvo na vala vareghamba vevambiwe he msalaba hamwe naye vakarem’beresha. ⁴⁵ Kuvokia saa mtanatu hakagwa kija he isana mhaka saa kenda. ⁴⁶ Hekifika saa kenda Yesu akaitanga na izii ibaha ekiti Eli Eli lama sabakani! Ni sa kutu Mrungu wangu Mrungu wangu hanini wekinishigha? ⁴⁷ Kumwe he vala vekiimuke aha vekinasikie vakati, “Uu emwitanga Elia”. ⁴⁸ Hala indi mmwe vavo akadindika, akaghuha sifongo na kugera mazi yekararata akachunga he muti akamunka iti anwe. ⁴⁹ Vala vangi vakati, shigha tuyoe iti Elia eneza kumkija. ⁵⁰ Niho Yesu akaiya kwa izii ibaha akaing’ola ngoro yakwe. ⁵¹ Niho ila suke yeghavie nyumba ya mtaso ukabajika vibaje viri, kufuma wanga mhaka si isanga likadidima, makamba akabuka. ⁵² Mbira jika juvuka, miri ya vala vezerire veshinjie ikavuka. ⁵³ Navo vekinafume he mbira, ekinavuke he vefwie vakaingia he muzio wezerire vakakuvonyesha he vajinki. ⁵⁴ Niho ila akida na ena navyo vekimrinda Yesu vokivona icho kididimo cha isanga na vyose vyeketike, vakafoleka, haiwa vakati. Kidid uu neki mwana wa Mrungu. ⁵⁵ Aho hekina vache vajinki vekiho hae veklirereha, avo nivo vemratere Yesu kufuma Galilaya hesa vamhirire. ⁵⁶ Hevo hemna Maria Magdalena ne Maria mlala vavo Yakobo na Joseph na mlala wavo vana Zebedayo. ⁵⁷ Hekinaoke chachemagheri hakaza mntu mzuri wa Arimataya eitangwa Yosefu niye nekimrateri wakwe Yesu.

⁵⁸ Uo mntu akamwia Pilato akaomba kimba chakwe Yesu niho Pilato akaazera iti ainkwe. ⁵⁹ Yosefu akaghuha kila kimba akakichunguchunja na suke ya sufi yeelile.’ ⁶⁰ Akauvika he mbira yakwe shaa yefovirwa he ikamba akahelija ibwa ibaha he penge yayo akatonga. ⁶¹ Na aho hekimna Maria Magdalena ne Maria ula ungi vewala veikee si hafuhi na mbira. ⁶² Hala heyavo ewo msi weratera ula msi wa kuharehia Pasaka, vabaha va vatasi na vafarisayo vakavungania Pilato. ⁶³ Vekiti, “Mfumwa twakummbuka iti ula mrakenga hala eho etie” Heikvecha misi mitatu nonevuka he vefwie. ⁶⁴ Heicho azera iti mbira irindwe nezo mhaka msi wa katau varateri vakwe vasireza vakamwiva vakavati vantu. Akavuka he vefwie makengo a nyuma enekela ala akuvoka." ⁶⁵ Pilato akavati, “Vuheni akikari mtonge mrerinda sa vuntu mwemajije”. ⁶⁶ Navo vakatonga vakarinda nezo ila mbira, vakavika isimbiko he lila ibwe na varinji vajinki.