¹ Niho Yesu ekinakenja ivyo vitetob vyose, akavati varateri vakwe. ² Mwemanyije iti misi miri yekivecha ula wa ungi ni wa Pasaka, na mwana wa mntu eneinkijwa awabwe he msalaba." ³ Igheri lila vabaha va vatasi na vaghosi va vantu ngwa, vakavungana he kitasi cha mtasi m’baha eitangwa Kayafa. ⁴ Vakateta njama hamwe nesa vamgore Yesu na kumkoma. ⁵ Vakati mira kisioke he msi m’baha nesa hasire keta mkede wa vantu." ⁶ Aho yesu eho uko Bethania he nyumba yakwe Simoni mreumbuka. ⁷ Aho ekohongaje he meza akaza mche utikie kuchupa kena mafuta azora m’baha akamgerahe konda ani ii? ⁸ Varateri vakwe vekivona vakavihiwa, vakati ni konda ani ii? ⁹ Ambu aa mafuta chekive kutaghijwa kwa hela nyingi jiinkwe vakiva." ¹⁰ Yesu akamanya akavati, Hanini mwemrisha vwasi? Uu mche ngwa? Ambu enirongiie ndima yedi.

¹¹ Ambu vakiva mnanavyo misi yose mi temuna name misi yose. ¹² Ambu aho akigera mwiri wangu mafuta aa, eketie huvo nesa aniringanyije kujikwa kangu. ¹³ Kididi nimutio, He masanga ase kila hantu ii mburi Yedi yenebirikirwa na icho ekiketie uu mche kineretetwa kwa kumkumbuka." ¹⁴ Igheri ilo mwe wa vala ikumi na veri eitangwa Yuda isikarioti akatonga he vabaha va vatasi. ¹⁵ Akavati munenivika ni nekimwikija he mikono yenyu? Vakamuti tunekuinka hela makumi matatu. ¹⁶ Kuvokia ilo igheri akaenda nzia vuntu enemwiinkija. ¹⁷ Igheri msi wa kuvoka wa mikate yesigerirwe chachu, varateri vakamtongia Yesu vakanti, “Ni hio weenda tukuharehie haha Pasaka?” ¹⁸ Akawati, “Tongani he muzi ha mntu msiku, mumti” mcheji eti, igheri langu lazengelela ninelia Pasaka he nyumba yako hamwe na varateri vyangu. ¹⁹ Varateri vakuketa sa vuntu Yesu evaazere vakaringanya kijo cha Pasaka. ²⁰ Hekinaoke chachemagheri akaikaa si kula kijo hamwe na varateri vala ikumi na veri. ²¹ Aho vekila akati kididi nimutio mmwe wenywu eneiinkija. ²² Vakaonda haiwa vakavoka kumvwija mmwe mmwe kuti “Mfumwa kana nini?" ²³ Akagharusha akati, “Uu atoveja hantu hamwe nami he bakuli niye eneniinkija. ²⁴ Mwana wa mntu etonga sa vuntu eandikiwe mira vwasi vwa uo mntu enemwiinkija mwana wa mntu neki chedi uo mntu nanga tekimoghiwe. ²⁵ Yuda uka mremwinkija kagharusha akati, “Rambi kana nimi? Akamti vuntu wateta we mwenye." ²⁶ Aho vekila Yesu akahugha mkate akaanjela akaubendua, akavainka varateri vyakwe akati, “koni mule uu ni mwiri wangu”. ²⁷ Kangi akaghuha kikombe akaanjela akavainka kati mwiani heicho vose. ²⁸ Ambu ii niyo sakame yangu kiaghano yeitiwe he mburi vwa vajinki kushughiwa mabanu uvo. ²⁹ Mira nimuti kuvokia yoo sikanwe kangi neri chemoghwa ni mzabibu, mhaka ula msi nenenwa mshaa hamwe na unywi uko he vufumwa vwa vava wangu." ³⁰ Vekinachenje kuimba lumbo wakavuma vakatonga he ntuvi ya mizeituni. ³¹ Niho Yesu akavati umywi vose kio iki munenivihiwa ambu cheandikwe iti: Ninembigha mrisha na magonji a ifio enezanika. ³² Mira nekinekenja kuvuka he vefwie nine mrongorira noko Galilaya." ³³ Petro akagharusha, akati, Hala vose vekinevihiwa vuntu vwako mi sikavikhiwe neri. ³⁴ Yesu akamti, “Kididi nikuvwira we, kio iki nkuruvi yesinaamba, unenikana kantu katata”. ³⁵ Petro akamti, “Hala chekinitara kufwa hamwe namwe sikakukane neri. Na varateri vose vakareteta huvo. ³⁶ Niho yesu akatonga hamwe navo akafika hantu heitangwa Getsemane akavati varateri vakwe ikaani aha, nitonge hala kuvaomba. ³⁷ Akamtika Petro na vana Zebedayo veri akavoka kusononoya na kuonda. ³⁸ Niho akavati, “Ngoro yangu ina vwasi mno kiringanyo cha kufwa ikaeni uha muikae kiavi hamwe nami." ³⁹ Atonga mozya hadori akasoma vusho si akaomba ekiti, “Vava wangu, kakicha kive iki kikombe kiniveche” Mira si sa vuntu ni nekunda esire sa vuntu we kunda. ⁴⁰ Akahunduka he vala varateri akakicha vashinjia akamti Petro, kave temuidime kuyaa kiavi hamwe name hata isaa imwe? ⁴¹ Yaeni kiavi na kuomba nesa msire ingie he migheso! Ngoro ikunde mira mwiri weleghele." ⁴² Akatonga kangi, akaomba ekiti, “Vava wangu kakicha tekive iti iki kikombe kiniveche nesikinwie kikundive chako kifumane”. ⁴³ Akahunduka wa akakicha vashinjia ambu meso ava eemee. ⁴⁴ Akavashigha wa akatonga akaomba ka katatu ekivateta viteto vikla vila. ⁴⁵ Ekikenja akavazia varateri vakwe akavati mwereshingia na kuhema. Rerehani saa yafika mwana wa mntu eneikijwa he mikono ya venye mabanu.

⁴⁶ Vukani tutonge Rereha ula mremiikija eho hafuhi." ⁴⁷ Aho echeriteta niho Yuda mmwe wa vala ikumi na veri ena vantu vajinki, vetikie mhandi na magongo, vefuma he vabaha vya vatasi na vaghosi vya vantu.

⁴⁸ Ula mremuinkija evainkie luvengo kuti, “Uo nenem’bwita niye mgureni”. ⁴⁹ Hula indi akamsongerira Yesu akamti, mcheji nakukezya kam’bwita.

⁵⁰ Yesu akamti, mbwiyaa hira chekuetie niho vakavongaja mikono wakagura Yesu. ⁵¹ Aho niho mmwe wa vala vena ne Yesu akaronga mkono akajuta ihandi lakwe akamtema mzoro wa mtasi m’baha akamchwa isikio. ⁵² Niho Yesu akamti, hunduia ihandi lako handu hakwe ambu vala vegura mahandi venekomwa ni mahandi. ⁵³ Kana uti sekindima kumwitanga Vava wangu, naye akanitia vamalaika marivati ikumi na meri na kukela? ⁵⁴ Aha maandiko enekoloshwaze iti nivwo vuntu chetarwa kioke?" ⁵⁵ Saa ila Yesu kavati luvungano kuti, mwezei kunigura mwetikie mahandi mmagonji sa mweragura mreghumba? Kila msi nekikaa he nyumba ya mtaso nekicheja neri temunigurire. ⁵⁶ Mira ivyo vyose vyeokie nesa maandika varoti akoloshwe, niho varateri vose vakamshigha, vakaaha. ⁵⁷ Na vala vemgurire Yesu wakamtika hakwe Kayafa mtusi m’baha, eho hantu vaandiki na waghosi vekivungane.

⁵⁸ Petro akamratera mira hae hae mhka he kitala cha mtusi m’baha akaingia akaikasi hamwe na varinji nesa avone vuntu mburi yenechika. ⁵⁹ Niho wabaha vya vatasi na waghosi vyose vakamueni vuono vwa mongo, nesa vamkome. ⁶⁰ Mira vasivone makossa nziaho hezie vaonwa vajinki va mango. Uko nyuma hakavuka veri. ⁶¹ Vakai ua etetie, Niidima kubaja nyumba ya Mrungu na kuijenga kwa misi mitatu. ⁶² Mtasi m’baha akaimuka akamti, “Tuna cho wegharusha? Ni vuono ani avo vekutetia”. ⁶³ Mira Yesu akahuja mtasi m’baha akamti, “Nikunguhira he Mrungu mwenye moo utuvwire kakicha niwe Kristo mwana wa Mrungu. ⁶⁴ Yesu akamti, “Niwe wati huvyo kangi nimutio kuvokia iki munemvona mwana wa mntu eikae he mkono kume wa nzinya ekiza wanga he majumbi a uko wanga”. ⁶⁵ Niho mtasi m’baha akabaja sake jakwe ekiti, “Emfalaja Mrungu! Vaonwa tuvaendiani wa? Rerehani iki mwasikia iyo Faraja yakwe”.

⁶⁶ Mutize unywi? Vakagharusha vekiti chemtara ni kifwa." ⁶⁷ Niho vakamtufia mate a vasho vakam’bigha nkundi kumwe vakam’bigha maluhi. ⁶⁸ Vekiti, “We Kristo torotie iti ni ani akubigha?” ⁶⁹ Petro akiikae si aho nze he ua mzoro wa kiche akamretera na kumti, “Nawe werenane Yesu wa Galilaya.

⁷⁰ Naye akakana mozya he vose ekiti, “Simanyije icho weteta." ⁷¹ Naye ekina vume nze ya mvera mzoro ungi wa kiche akamvona, akavati vala veho hala, “Hata uu ekirena ne Yesu Mnzareti”.

⁷² Akakanawa kwa kivigho, “Simmanyije uu mntu." ⁷³ Kakenda kadori vala veimuke hala vamratera Petro, vakamti, “Kididi hata we ure mmwe wavo, ambu hata kutetire chako kikumanyisha.” ⁷⁴ Niho akavoka kukudaari na kukurigha ekiti, “Uo mntu simmanyije hala indi nkuvuvi ikaamba.” ⁷⁵ Niho Petro akakumbuka kila kiteto Yesu etetie, “Nkuvuvi yesinaamba unenikana kantu katatu.”