¹ Yesu akafuma he nyumba ya mtaso, akatonga, varateri vakamswia nesa vamvonyeshe majengo a nyumba ya mtaso. ² Naye akagharusha akavati temuvona ivi vyose kididi nmutio: Aha tehekashighwe ibwe wanga he ibwe, lesikagomowe." ³ Aho eikae si he ntuvi ya mizaituni, varateri vakwe vakamswia mpiso vekiti: Tumwise ki iti ivyo vineoka rini na luvengo lwa kuza kwako, na lwa mkengelejo wa masanga nini? ⁴ Yesu akagharusha, akavati: Rerehani, mntu asimuishe. ⁵ Ambu vajinki veneza he izina langu, vekiti nini Kristo, navo veneisha vajinki. ⁶ Na unyiwi munesikia mburi ja nkondo, rerehani musiitushwe, ambu ivyo vyose nire sari vize mira uo mkengelejo teunate. ⁷ Ambu mbari na mbari jineomana, vufumwa na vufumwa vuneomana, heneketa nzota na vididimo uko. ⁸ Ivyo vyose ni kivokio cha mavwasi. ⁹ Ila igheri venemuinkija mwishwe vywasi na kukomwa unywi mune oka vantu va kushinwa ni vaisanga vose vuntu vwa izina langu. ¹⁰ Niho vajinki venekuhosha, veneliana marenge na kudaana. ¹¹ Henevuka varoti vajinki va mongo veneisha vajinki. ¹² He mntu vwa kuzika kwalubero, lukundo lwa vajinki lunehoa. ¹³ Mira ula enegurumija mhaka msio niye enekia. ¹⁴ Kangi mburi yedi ya vufumwa inebirikirwa he si jose, ioke vuonwa he vaisanga vose aho niho ula mkengelejo weneza. ¹⁵ Aho mwekinevona kila kivihijo cha kukonda, kila chetetiwe ni mroti Daniel cheimuke hala hantu hezerire ula esoma natwarije. ¹⁶ Aho vala veho Yudea vaahe na he ntuvi. ¹⁷ Na ula eho wanga he nyumba asisee kuraghuha vintu vyeho nyumba hakwe. ¹⁸ Neri ula eho he mghunda asihunduke kaa kuraghuha suke jakwe. ¹⁹ Vwasi vwa vala vena ndeni na veomwisha he iyo misi. ²⁰ Mira ombani nesa kuaha kwenyu kusizane na igheri la kiho kana msi wa sabato. ²¹ Ambu ilo igheri heneketa mavwasi mabaha esinavonekla too kuvoka kwa masanga mhaka iki, neri esikarevoneka huvo narini. ²² Nanga iyo misi yesekitaduishwa, hesekina ye ekikia; mira he vuntu vwa vala vesaghurwe, ivyo misiinedusihwa. ²³ Ilo igheri mntu ekimuti, “Rereha, Kristo ewaha, kana, Eho mkula, musiitikije. ²⁴ Ambu heneketa makristo a mongo na varoti va mongo, navo veneketa maluvengo mabaha ma vimako, nesa vavateshe hata vala vesaghurwe kakicha kiidimika. ²⁵ Rereha, narongora kunuvwira. ²⁶ Heicho vikine muti, “Eho uko nyika, musifume, kana eho nyumba, musiitikije. ²⁷ Ambu sa vuntu kiimiko chefuma kibuka izuva, kikavoneka mhaka kigwa izuva, huvo nivwo vuntu kuza kwa mwana wa mntu kweneoka. ²⁸ Ambu hantu hena kimba, niho hantu mitonyi vungana. ²⁹ Mira hala indi nyuma ya mavwasi a misi ila izuva linegerwa kija, na mweji teukufunye kianga chawo, ntondo uko wanga jinegwa, na nzinya ja uko wanga kushika. ³⁰ Niho levengo lwa mwana wa mntu lweneveneka uko wanga, niho mbari jose ja masanga jenewela, navo venemvona mwana wa mntu ekiza wanga he majumbi a uko wanga, ena na nzinya na ngazo mbaha. ³¹ Naye enetuma vamalaika vakwe na izio ibaha la lugunda, navo venevavunga vala vakwe vesaghurwe, kufuma myondo mine ya nkungu kuvokia hantu wanga yehakwe mondo mhaka hantu yehakane mondo ungi. ³² Heicho kuchejeni mwekifwanyanyija he mkuu matambi awo ekinavunga na kushosha, mumanya kutivuri yazengetela. ³³ Na unywi nirehuvo, mwekivona ivyo vyose manya ni kuti azengelela mpengeni. ³⁴ Kididi nimutio,” Lukolo ulu telukaveche ivi vyose veysinakoloka” ³⁵ Wanga na si vinevecha, mira viteto vyangu tevikaveche narini. ³⁶ Mira mburi ya msi ula na saa ila tehena eimanya neri vamalaika veho uko wanga, neri mwana esire vava mwenye. ³⁷ Ambu sa vuntu chekiikee he ila misi yakwe Noa, nirevwo vuntu cheneoka hata he kuza kwa mwana wa mntu. ³⁸ Ambu sa vuntu chekiikee he ila misi yerongorier mghubiko wa mpombe, vantu vekila na kunwa, vekilondola na kulindolwa, mhaka ula msi Noa ekiingi he safina. ³⁹ Vasitwarije, mhaka mghibiko wa mpombe ukaza ukakenja vyose; nirevwo vuntu cheneokahe kuza kwa mwana wa mntu. ⁴⁰ Ilo igheri vantu veri veho he mghunda, mmwe eneghuhwa, ungi eneshighwa. ⁴¹ Vache veri veshagha, mmwe eneghuhwa, ungi eneshighwa. ⁴² Yaani ra kiavi, ambu temumanyije iti ni msi uhi Mfumwa wenyu eneza. ⁴³ Mira manyeni icho kuti, Nanga mwenye nyumba ekimbuya lila igheri mkea enezia ekiyaakiari neri esekishigha nyumba yakwe ihawe. ⁴⁴ Hicho na unywi, kuringanyeni ra, ambu mwana wa mntu eneza he saa mwesiiarire. ⁴⁵ Niani ra mzero mkitengo, echee, eye mzuri emvikie he kaa yakwe, iti agharie vazoro vaghenji kijo igheri latara? ⁴⁶ Mrela vwedi ni mzoro ula eye mzuri wakwe ekiza enemkecha ekiraketa huvo. ⁴⁷ Kididi nimutio, enemghosha m’baha wa vintu vyakwe vyose. ⁴⁸ Mira mzoro ula mvivi ekidunganya he ngoro iti, mzuri wangu aikaisha. ⁴⁹ Akavoka kugigha vaghenji vakwe, na kula na kunywa hamwe na vaengeji. ⁵⁰ Mzuri wa uo mzoro eneza msi esiarire na igheri esimanyije. ⁵¹ Enemtuma vihindi viri, na kumsankanya na valung’ong’o. Niho heneketa kuwela na kukereresa majegho.