¹ Yesu ekinamoghwa uko Bethlehemu na Yudea he misi ya mfumwa Herode, vantu vecheishe vefuma kibuka izuva vakajika Yerusalemu vekiti. ² Uo mfumwa wa Vayuda emoghiwe eho hio ambu twevonie ntondo yake kula kibuka izuva na uswi tukaza kumdunkutia. ³ Mfumwa Herode ekisikia huvo akaituka hantu hamwe na Yerusalemu yose. ⁴ Akavunganya vabaha va vatasi vose na vaandiki va vantu akavahereja iti Kiristo emoghiwe hio. ⁵ Navo vakamti, ni betlehemu ya yudea ambu nivwo vuntu cheandikwe ni mroti iti , ⁶ Nawe Betlehemu wahe isanga la Yuda, meritumdori hena vifumwa vya yuda, ambu hako henefuma mfumwa, eye enerisha vantu vangu israeli." ⁷ Ingeri Herode akavatika vala vecheishe njama akakonesha hevo igheri ila ntondo yevoneke. ⁸ Akavaazera uko Betilehemu akati, tongeni murevwija nezo mburi ya uo mwana, mwekinamvona munihunduie momo, nesa nami nitonge niremdukutia. ⁹ Vekinasikie viteto vya mfumwa vakatonga niho ila ntondo veivonie kula kibuka izuva ikavarongora na ikatonga ikaimuka wanga ya hala hantu ula mwana eho. ¹⁰ Vekinavone ila ntondo vakaizihrwa kuizihirwa kubahisha ¹¹ Vakaingiahe ila nyumba vakamvona ula mwana ne Maria mlala wavo vakagwa si vakamdukutia, navo vekinachungue ntanu javo, vakamunka vintu vyedi vya dhahabu, uvumbe ne manemane. ¹² Navo vekinavonyeshwe ni mrungu hendoto iti vasimhundukie herode, niho vakagura nzia ingi vakaghotoka na havo. ¹³ Vekinatonge malaika wa mfumwa akamzia yosefu he ndoto, akiti, vuka umtike uo mwana na mlala wavo uahe noko Misiri uikae ho mhaka nekikuvwira, ambu Herode emwenda uo mwan aiti amkome. ¹⁴ Akavuka na kio akamtika ula mwana na mlala wavo akatonga noko Misiri. ¹⁵ Akaikaa uko mhaka Herode ekikenja kudwa nesa kikoloke kila chetiwe ni fumwa he momo wa mroti ekiti. Nemwitanga mwanangu kufuma Misiri." ¹⁶ Niho Herode ekinavone iti vala vecheishe ha, akasikia oro haiwa akatuma vantu kukoma vana vose va kibwange va Betlehemu na vala veho mondo na mondo hose, vala vekenjije miaka miri na vesinakenja, sa vuntu ekoneshe igheri he vala vecheishe. ¹⁷ Niho kila chetetiwe ni mroti Yeremia kikakoloka sa vuntu etetie. ¹⁸ izii lesikiwe uko Rama, kiio na kululuma kubaha, Raheli ekivaiia vanawe, Asikunde kutunjwa ambu teveho." ¹⁹ ingeri Herode ekinafwe malaika wa mfumwa akamzia Yosefu he ndoto uko Misiri. ²⁰ akamti, vuka umtike uwo mwana na mlala wavo utonge na he isanga la Israeli ambu vala vekienda ngoro ya uo mwana vafwa. ²¹ akavuka akamtika ula mwana na mlala wavo akafika he Isanga la Israeli. ²² mira ekinasikie iti Ankelao niye etetia isanga la Yudea hantu ha vavee eye Herode akafoleka kutonga uko, naye ekinavonyeshwe he ndoto akatonga modo wa Galilaya. ²³ akatonga akatua he muzi weitangwa Nazareti nesa kila chetetiwe ni mroti kikoloke iti, eneitangwa Mnazareti.