¹ Msi ula hakavuka mrieriesho m'bha he kanisa yeho Yerusalemu vose kushigha ntume vakazarikarika he masanga a Yudea na Samaria. ² Vantu vemfoleka Mrungu vakamjika stefano na kumwira mno. ³ Sauli akakonda kanisa ekiingia he kila nyumba, na kukorota vome na vache , kuvaingija he nyumba ya varechungwa. ⁴ Mira vezarike vakatonga uleo na uko rekebirikira kiteto ngwa. ⁵ Filipo akasea akaingia he muzi wa Samaria akawabirikira Kristo. ⁶ Na mavungano vakasikija kwa ngoro mwe vile nyetetiwe ni Filipo; aho vekinasikie na kuvona ala maluvengo ekironga. ⁷ Ambu vajinki vegurirwe ni mpeho mbivi jikavatuma , jekiiagha na izi ibaha , na vantu vajinki veholoje na vesiidime tonga , vakabanjwa. ⁸ Hakaketa kuizihirwa kubaha he ula muzi. ⁹ Hekina mntu eitangwa Simoni, aho kuvoka ekironga kughanga he ula muzi , akagera vantu va Samaria kumagarara kwa kughanga vwakwe , ekikutia iti ye ni mntu m'baha. ¹⁰ Vose vakamsikija ,kuvokia mdori hata m'baha ,vekiti uu mntu niye nzinya ya Mrungu ,ila yeitngwa m'baha. ¹¹ Cheshigha vekimsikija ni hala ikaenda ieza evamagarije kwa vughanga vwakwe. ¹² Mira vekinamwitikije Filipo ,aho ekibirikira mburi yedi ya kutumwa vwa Mrungu , na izina lakwe Yesu Kristo vakabatizwa va kiume na va kiche. ¹³ Hata Simoni mwenye akaitikija , akabatizwa akaikajanya ne Filipo; akamagarara ekivona ala maluvengo na vila virumo vibaha vyekilika. ¹⁴ Ntume veho uko Yerusalemu , vekirika iti Samaria yaghuhia kiteto cha Mrungu , Vakavatuma Petro ne Yohane noko havo. ¹⁵ Vo vekinase vakavuombia iti vainkwe mpeho wedi. ¹⁶ Ambu tekinavareia neri mmwe wavo ,esire kubatizwa du he izina la Mfuma Yesu. ¹⁷ Niho vakavavikia Mikono , Vakainkwa mpeho wedi. ¹⁸ Niho Simoni ekivona iti he kuvikiwa mikono ni ntume,veinkwa mpeho wedi, akaenda kuvainka fedha, ¹⁹ Ekiti, "Ninkani nami iyo nzinya ,nesa uo nenemvikia miono ainkwe mpeho wedi." ²⁰ Mira petro akamti; fedha yako naiteke tosho hamwe nawe kila, wedunganya iti mbonea ya Mrungu ivoneka kwa mari. ²¹ Tuna ifungu neri lughavi he icho kintu ambu ngoro yako tairo ngekie he Mrungu. ²² Heicho chwa mti he icho kivivi chako , umwombe Mfumwa iti kana kive ushighiwe ao madunganyo a ngoro yako. ²³ Ambu nakuvona iti uho he kuwava sa nyongo , kangi u nkore ya kuvivi." ²⁴ Simoni akagharusha akati, "Niambiani engaunywi he Mfumwa nesa ivyo mwateta visinifikire neri taimwe. ²⁵ Vekinakenje kuteta vuonwa na kubirikira kiteto cha Mfumwa vakahunduka noko Yerusalemu ,vekibirikira mburi yedi he mabumba mangi a Vasamaria. ²⁶ Malaika wa Mfumwa akateta ne Filipo akamti, "Vuka utonge mondo wa ishi , he nzia ila yefuma yerusalemu yesea noko Gaza." nayo ni nyika. ²⁷ Naye akavuka akatonga. Akatonga. Akavona mntu wa Etiopia msondwa ,ena kubaha kijusi yakwe kandake Mfumwa wa kiche wa Etiopia , evikiwe kurereha ndugu yakwe yose; naye ekitongie uko Yerusalemu kuratasa. ²⁸ naye ekighotoka ,eikae sihe igari lakwe ekisoma kitabu cha mroti Yesaya. ²⁹ Mpeho akamti na Filipo, "Fika hatuhi na lila igari, utonjanye nalo. ³⁰ "Filipo akasara, akamsikia ekisoma kitabu cha mroti Yesaya akati, Icho wasoma cha kujuvukia?" ³¹ Naye akati, "Niidimaze kujuvukiwa mntu ekisanivonyesha ?" Akasemba Filipo akwe aikanjanye naye. ³² Na ifungu la maandiko ekilisoma ni ili ekitiwe kurakomwa sa kagonji na sa vuntu kekuhujira he ula mrakachwa mavoa, Nire huvo, naye tevushije momo wakwe. ³³ He vuntu vwa kuuduisha kwakwe? ambu moo wakwe wivushijwe he si ii." ³⁴ Ula mshondwa akamgharusha Filipo , Nikuomba, uo mroti eteta mburi yakweni he ivyo viteto? Ni mburi jakwe mwenye kana ni ja mntu ungi?. ³⁵ Filipo akavusha momo ekivokia he ilo Isungu ,akambirikira mburi yedi yakwe Yesu. ³⁶ Vekiratonga vakafika hantu hena mpombe', ula mshondwa akati Rereha mpombe mii, chenikinda kubatizwa ni kiini?, ³⁷ Filipo akati wekiitikija na ngoro yose, kive akagharusha akati, Naitikija iti Yesu kristo ni mwana wa Mrungu. ³⁸ Akaazera iti lila igari liimuke: Vakasea vose veri he mpombe , Filipo na ula mshondwa , naye akam'batiza. ³⁹ Vekirakwea kufuma he mpombe, mpeho wa Mfumwa akampekute ula mshondwa asimvone wa , akatonga na kuizihirwa. ⁴⁰ Mira Filipo akavonwa uleo Azoto, aho ekivecha akabirikira mburi yedi he mini yose mhaka akatika uko kaisaria.