¹ Vekinavecha he mizi ya Amfipoli na Apolonia, vakaza mhaka mzi wa Thesalonike aho hena sinagogi la vayahudi. ² Savundu emanyire Paulo etongie havo hantu ha misi mitatu ya sabato akavwijana navo wanga ya maandiko. ³ Ekivafunukuria maandiko na kuvavwirira iti, chemtarire Kristo kurishwa vwasi na kangi afufuke kangi kufuma he vewvie. Akavati, “Yesu nevavwira mburi yakwe niye Kristo”. ⁴ Vakumwe ya vayahudi vakaitikija na kugurana ne Paulo ne Sila, hamwe na vagiriki vala vemfoleka Mrungu na vache vangi varongori na ikundi ibaha la vantu. ⁵ Mira vakumwe he Vayahudi vala vesiamini, veizue wivu vetongie kiete vakaghuha vakumwe ya vantu wavivi, vakavanganua umeti wa vantu hamwe, na vakaete mikete he mizi, vakaivamia kaa yakwe Joson, vekienda kumgura Paulo ne Sila iti vavaete mozya ya vantu. ⁶ Mira vekinavasove vakamgura Yason na vakumwe va vandughu vangi na kuvatika mozya ya vabaha va mzi, vekilonza, “Ava vome vegharushe isanga vafika mhaka kunu wa”. ⁷ Vome ava vekaribishwe ni Yason vakonde maamoro akwe kaisari, veti hena Mfumwa ungi eitangwe Yesu”. ⁸ Umati na vabaha va mzi vekinasikie mburi iyo vakaingia ni vakalulughika. ⁹ Vekinakenje kughuha fedha yena Samani ya Vurinji kufuma kwa Yason na vangi vakavoshigha vatonge. ¹⁰ Kio kila vandughu vakamtuma Paulo ne Sila Beroya vekinafike uko vakaingia he isinagogi la vayahudi. ¹¹ Vantu vala veena icha ibaha kukela vala vantu va Thesalonike, ambu vo veghughie kiteto kwa icha lwava vakachunguza maandiko kila msi iti kuvona sa viteto vevoniwe nivo ivyo. ¹² Heicho vangi vavo vakaitikija, vikiho vache vena ushawishi mbaha wa kigiriki na vome vangi. ¹³ Mira vayahudi na Vathesalonike vekinamanye iti Paulo etangaza kiteto cha Mrungu uko Beroya, vakatonga uko na kusoseja na kangi kudungija mkede he vantu. ¹⁴ Hala indi, vandughu vakamtika Paulo kwa nzia ya iziwa mira sila ne Timotheo vakashala hala. ¹⁵ Vala vandughu vemtikie Paulo vetongie naye m’haka Athene, vemshighie Paulo noko, veghuhie maazero kufuma hakwe iti, Sila ne Timotheo vaze hakwe hala indi chekiidimika. ¹⁶ Aho vekivainda uko Athene, ngoro yakwe ikavihiwa ndeni kwa vundu evonie mzi weizue sanamu nyingi. ¹⁷ Huvo vakajadiliane he isinagogi na vayahudi vala vemfoleka Murungu na hevala vose ekichane navo kila msi kiete. ¹⁸ Mira he vakumwe ya venaviugho va Weiepikureo na Wastoiko vakakindana. Na vangi akati, “Nikini ekiteta uu ni mregaya mdori? Vangi vakati” kwa kila ebirikira mburi ya Yesu na ufufuo. ¹⁹ Vakamghuha Paulo na kumuete Areopago akiti “Tuidima kumanya ii micheji misha weigaya?” ²⁰ Kwa kila weete mburi shaa he masikio etu. Heicho tuenda kumanya iti imburi ina msane ani?” ²¹ (Na vantu vose va Athene hamwe na vagheni veho havo, vetumia muda wavo kana he kugaya na kusikija wanga ya mburi shaa). ²² Heicho Paulo akaimuka ghati ya vantu va Areopago na kuti, “Unywi vantu va Athene, navona iti unywi ni vantu na dini kwa kila evo”. ²³ Ambu he kuvecha kwangu na kurereha vindu venyu vya mwevitasa nevonie viteto veadnikwe he mwe madhabahu yenyu yekiti, “HE MRUNGU ESIMANYIKE” huvo huvo mumtasa mwesimmanyije niye umumanyisha unywi. ²⁴ Murungu eye eimbie isanga na kila kindu cheho ndeni kwa kila ni Mfumwa wa wanga na si tedima kukaa he mahekalu eharehwe na mikono. ²⁵ Neri tehirirwa na mikono ya vantu sa enakindu eenda havo. Ambu ye mwenye evainga vandu uzima na muho na vindu vingi vose. ²⁶ Kuretija mntu mmwe, eketie masanga ose a vantu vetue wanga ya vusho vwa isanga akavavikia magheni na mihaka handu enetua. ²⁷ Heicho, veendwa kumuenda Murungu na kangi vamfikie na kumvona na kwa esiho hae na kila mmwe wetu. ²⁸ Hakwe tuikaa, tuvata na kuketa vuzima vywetu, sa vula mreuka wetu mmwe wa ishari etetie tu lukolo lwakwe. ²⁹ Heicho chekioka uswi lukolo lwa Murungu, tetutarwa, kudunganya iti kimurungu ni sa dhahabu, kana shaba kwa mabwe, sanamu yehiareghuha kwa ustadi na kucha kwa vantu. ³⁰ Heicho Murungu ehijije igheri lila la vurundu mira iki eazera vantu vose kila handu vachwe mti. ³¹ Iki ni iti evikie msi ene elahia isanga kwa kitea, kwa mntu eye emsaghure. Murungu eng’olie idi he mntu uu kwa kila mntu hala emfufua kufuma he vefwie. ³² Navantu va Athene vekinasikie mburi ya kufufuliwa he vefwie, vakumwe vakamsola Paulo, vangi vakati “Tukiisikija kangi he mburi ya kindu ichi”. ³³ Niho Paulo akavashigha. ³⁴ Mira vakumwe ya vantu vakagurana naye vakamuitikija, akaoka Dionisio Mwareopago, na mche eitangwa Damari na vangi hamwe navo.