¹ Tingkah laku Manusio pas zaman abis Paratiot lah kade pas hari tarakhir, masa singsaro mao atok'. ² Barang , urok' jadi nyukai diri e sorok', suko duit, pangalok, sombong, pangina, ino patuh ka urok tuho, ino nahui ba tarima kasih, ino suci, ³ ino nahui ngasihi, ino suko ba damai, suko ma fitnah, ino biso ngandaliot diri, kajam, ino suko nang baik, ⁴ panghianat, carobo, angkuh, labih suko hawa nafsu dari pado mancintai Allah, ⁵ kagariot saleh tapi nyangkali kuasa e. Jauhi boh urok-urok ng a yo nyian. ⁶ Barang, ka antaro ne ido ado urok-urok nang nyamar ka doop jamaat ba nahan bambini-ambini lamah nang kano bebani ngoan manyak doso ba nyeret ne ido ngoan hawa nafsu. ⁷ Ambini-ambini ngayo koo' siga' balajar, tapi ino biso sampe panganalan mao kabanaran. ⁸ Sabayo ngayo Yanes ba Yambres nang ngalawan Musa, jaiyot ugo urok-urok nyian nang ngalawan kabanarot. pikiran ne ido udah rusak ba iman ne ido ino koat uji. ⁹ malahan, ne ido biso jauh agi barang kabagoot ne ido kanyataan, sabayo ngayo duo urok angkoo'. NASEHAT PAULUS KA TIMOTIUS ¹⁰ Jadi, kau udah ngikuti ajaran ku, caro idup ku, tujuan idup ku, iman ku, kasabaran ku, kasih ku, ba katakunan ku, ¹¹ ngayo panganiayaan ba singsaro nang ku ngalami ka Antiokhia, Ikonium, ba Listra. Aku koat doop panyiksaan, ba Tuhan nyalamatot aku dari samuo koo. ¹² Sasungguh e, samuo urok nang idup saleh doop Yesus Kristus mao di sikso, ¹³ sadangkan urok-urok jahat ba nang panipu mao jadi buruk agi, ne ido' nyasatot ba di nyasatot. ¹⁴ Kade kau, lanjutot boh damio nang udah kau ngarati ba nang udah kau micayai' barang kau udah nahui' dari siape kau balajar, ¹⁵ macam mae dari enek kau udah nahui' Kitab Suci nang pasti mare' kau hikmat kasalamatan ngalalui iman doop Yesus Kristus. ¹⁶ Samuo Kitab Suci dibarakati Allah baguno untuk ngajari, untuk ngatoot' kasalahan, untuk maiki' kalakuan, ba untuk ngajari doop kabanaran. ¹⁷ Ngoan macam nyian, manusio nu' Allah pasti gagas kade dilengkapi ngoan kalakuan nang baik.