¹ Keboroh Yesus nyinek ke atas,io mantau urakng kayo nopuk pesomoh sidok ke alapm kotak pesomoh. ² Io mantau gak sikuk jano menseketn nopuk duo singkap duet temago. ³ Jokuk Yesus,"Aku modoh yang pengamat e ke iketn,jano menseketn ituk morik lobih banyak ari semuo urakng kayo inyok. ⁴ Badi, urakng kayo morik pesomoh ari lobih kekayo e,tapi jano tuk morik ari kekurakng e,saja ongkoh-ongkoh ke ngelanyot idop e," ⁵ Keboroh mured e nyantuh masaloh Bait Allah yakng disikap makai batu-batu baek mat ngan segalo pesomoh,Kato Yesus," ⁶ Agih datakng waktu e,semuo iketn pantau agih di pelolok.Botnsik sigik batu pe yakng bediri diatas batu laen yakng botn di tengkoleng." ⁷ Lalu, katn mured e betanyok ke Inyo,"Guru,sebilai ahal nyok agih tejadi ? ngan apai tano-tano semuo inyok e agik tejadi ?" ⁸ Cohot Yesus,"Beati-ati am sok iketn botn sosat merabat badi agik banyak urakng datakng makai namo Aku ngan modoh,'Aku am Inyo,'ngan waktu doh dampekng,onang iken tamoh sidok. ⁹ Akan tetapi,pas iketn ningoh masaloh porang ngan pengerampak,onang iketn golak,badi ahal-ahal iyok saja aros tejadi lobih lolu,tapi pengobeh e upatn gak cepat datakng." ¹⁰ Doh iyok Yesus modoh sidok,"Bangso agik uas ngelawatn bangso ngan kerajaan uas ngelawatn kerajaan. ¹¹ Agih tejadi longkap yakng melanga,bencano lapa,ngan penyaket nyaruh di monai-monai.Agih muncol gak berono-berono nyaruh tano-tano besa di langet. ¹² Tapi, semuo e upatn tejadi,sidok agih nangkap iken ngan bepodih iketn. Sidok agih nopuk iketn ke gerejo-gerejo sidok ngan nopuk iketn ke alapm katn penyaro. Sidok gak agik maik iketn ngadap rajo ngan gubernur badi namo-Ku. ¹³ Ahal ituk am kesompat ikau sok besaksi. ¹⁴ Badi iyok,nang gomok gauk ati ikau sok botn mike apai yakng agih ikau sobot ke melo derik, ¹⁵ Aku agih morik igik ngan keponai ke ikau yakng botn dapat di lawatn ngan dipesoloh katn musuh ikau. ¹⁶ Ikau agih ditulak urakng tuho ikau,empalo lelaki,katn juru,kabatn jerahatn ka,ngan sidok nak munuh berapai urakng di antaro iketn. ¹⁷ Ikau agih dibencik semuo urakng badi namo Aku. ¹⁸ Nang gaduh,botnsik sutik buwok pe ari kepalo ikau yakng agih jatuk. ¹⁹ Lago ikau saba,ikau agih bulih pengidop." ²⁰ Pas,ikau mantau kota Yerusalem dikumakng balo musuh,ikau agih panai lolok au doh dampekng. ²¹ Waktu inyok,urakng yakng ado di wilayoh Yudea aros mentabok ke atas buket. Urakng-urakng yakng di alapm kota aros bedari kelua kota,ngan urakng yakng di deso-deso botn panai tamok ke Yerusalem. ²² Inyok am ari ke ngukom e sok semuo yakng doh dituleh ditunok obeh. ²³ Celako am katn betinok keboroh nganokng ngan anak e gik nusu waktu iyok nyok nak tejadi pemodih yakng melanga di negeri inyok,ngan keluat yakng bakoh atas bangso ituk. ²⁴ Sidok nak dibunuh makai isau ngan ditabatn kabatn bangso. Kota Yerusalem agik di ato bangso laen sampai ke jayo bangso inyok abeh," ²⁵ "Agik ado tano ngelago matoari,bulan,ngan katn bintakng. Di bumi katn bangso golak amat ngan gomok lago auh laot ngan ingan umak. ²⁶ Urakng -urakng agih kemoti badi golak e ngan nunguk ke ahal-ahal yakng agih tejadi atas bumi ituk badi semuo kuaso yakng ado dilanget nak diguncak guyuh. ²⁷ Doh nyok,sidok mantau anak mensio datakng alapm omotn ngan makai kuaso ngan kemuliaan yakng bakoh amat, ²⁸ Ntik ahal ituk betanga tejadi,bediri ngan nenguak nyok am waktu penyagu ikau doh dampekng." ²⁹ Udoh iyok gik Yesus ngesoh sutik sempamo ke sidok:"Pantau am koyuk ara ngan koyuk yakng laen. ³⁰ Ntik koyuk-koyuk nyok numuh daon e, ikau agih ngereti ngan panai ke peromo podek udoh dampekng. ³¹ Biok gam ntik ikau mantau semuo nyok tejadi,ikau panai ke kerajaan Allah doh dampekng. ³² Pengamat e Aku bekato ke ikau, keturon ituk botn mati sampai semuo ituk tejadi. ³³ Langet ngan bumi agih losi tapi jantuh Aku botn panai ngelolu." ³⁴ "Beati-ati am sok iketn botn ponuh kengonak pegowai peguno,mabok musau,ngan ngeragu idop. Ngan ari inyok datang ubok perangkap. ³⁵ Badi ari inyok agih datang ke atas semuo yakng diam di muho bumi ituk. ³⁶ Sajuh bejogo-jogo am ngan bedo'o sok napat pengaloh ke ngelopas derik ari semuo ahal yakng agih tejadi ngan sok ke bediri di adap Anak Mensio." ³⁷ Pado padakng ari,Yesus ngaja urakng banyak ruakng di Bait Allah, tapi ntik malam Inyo nudi kota ngan bemalam di buket Zaitun. ³⁸ Ngan,bobuk-bobuk,semuo urakng datang ke Bait Suci rinu ningoh Inyo.