¹ Mako,Yesus tamok nga ngelolu kota Yerikho, ² Diok ado sikuk lelaki namo e Zakheus, Io nyok am kepalo pengumpol pajak ngan urakng yakng palekng kayo. ³ Io onak mantau Yesus tapi botn panai lago urakng banyak; Badi tubuh e panak. ⁴ Boruk,Zakheus bedodas ngelolu urakng banyak ngan nih naek koyuk kayu ara sok mantau Yesus badi Io ngelolu jalatn inyok. ⁵ Pas Yesus datakng ke orokng Zakheus nugau,Io nenguak ke atas ngan nimpai inyo,"Zakheus turotn am copat Aku ari ituk nak numpakng di langkàu ikau," ⁶ Ningoh nyok,Zakheus begusokng turotn ngan nerimoh Yesus ayoh bikoh amat. ⁷ Keboroh ngadoh urakng nyinek ahal iyok,siďok nih merutap ngan bejantuh,"Io menyadi temuai di langkau urakng yakng bedoso." ⁸ Doh yok, Zakheus bediri ngan bebantoh ke Tuhan,"Tuhan,pantau am,separuh ari roto ku onak ku peduok ke urakng yakng menseken, ngan ntik aku ado nabok roto urkang laen onak ku unyok lagik ompat kali lipat." ⁹ Mako,Yesus bekato ke Zakheus,"Ari ituk bah,ķeslamatan udoh datakng ke alapm langkau ituk badi io ituk pe anak Abraham, ¹⁰ Badi, Anak Mensio datakng sok ngogoh ngan nyelamat urakng yakng doh losi." ¹¹ Samel sidok ningoh kesoh iyok,Yesus nyamokng mpamo lagik lago Io doh dampekng Yerusalem ngan sidok nyangko Kerajaan Allah dok nak datakng. ¹² Badi nyok,jokuk Io,"Sikuk bangsawan bingkas ke negeri yakng jauh nak di angkat menyadi rajo,doh yok io pulakng. ¹³ Doh iyok, tuan nyok nimpai sepuluh pelayatn e ngan morik duet sepuluh mina pemanyak e, Jokuk io ngatuh sidok," bedagang am iketn nguno duet inyok nyungkol ke aku bebalek,' ¹⁴ Tapi urakng sebangso ngan io bencik,maloh nyuruh urakng nyusoi e melakakng io bingkas sok beluluk, ' kami ongai urakng pakai rajo kami.' ¹⁵ Doh tomuh diangkat menyadi rajo. Bangsawan inyok pulakng merentoh katn pelayatn e yakng doh diborik duet sok ngadap io,sok io panai pemesa untong ari duet yakng sidok ulih ri bedagakng. ¹⁶ Pelayatn yakng petamo datakng ngan modoh,'Tuan,duet yakng semina Tuan borik doh bulih sepuluh mina agik, ¹⁷ Raja yok bekato ke io,'Bagak amat,oi ikau anak buoh yang baek! Badi ikau doh mamat alapm pekaro senik,ikau agih merentoh sepuluh atas kota . ¹⁸ Pelayatn yakng keduo pe datakng modoh,'Tuan,duet satu mina umpuk ikau doh bulih limok mina,' ¹⁹ Lalu, rajo iyok bekato ke io,'ikau bekuaso atas limok kota.' ²⁰ Doh yok, datang lagik pelayatn yakng ketigo ngan bekato,'Tuan,tuk an duet tuan yakng satu mina umpuk tuan ku taruh alapm kaen pengelap jari. ²¹ Aku golak ke tuan tuk urakng yakng koras. Ikau ngamik ri apai botn kau taruh ngan manyi ri apai yakng botn ikau tanam.' ²² Doh yok,rajo bekato ke pelayatn nyok,'Aku agih ngukom ikau ubok igik ikau,oi ikau pelayatn yakng jahat ! Ikau,saja doh panai ke aku ngamik ri yang abotn ku taruh manyi ri yakng abotn kutanam ? ²³ Ntik biok,ngapai kau botn naruh duetku orokng urakng nyajatn duet ntik aku datakng,aku agih nerimok duetku nyok ditomoh bungo e ?' ²⁴ Lalu,rajo bekato ke urakng yakng bediri diok,'Amik mina nyok ari io unyok ke yakng umpuk sepuluh mina.' ²⁵ Tapi,sidok modoh ke rajo iyok,Tuan,io dok ado umpuk sepuluh mina.' ²⁶ Cohot rajo inyok,'aku modoh iketn,setiap urakng yakng ngumpuk agih diborik lobih,tapi dari urakng yakng botnsik peromai e,ngadoh yakng diumpuk io agih diamik . ²⁷ Tapi,masloh katn munsuh yakng ongai ke aku menyadi rajo atas sidok, Dibaik kituk ngan bunuh am sidok di adap muho aku."' ²⁸ Doh tomuk Yesus nyobot ahal iyok,Io lolu bejalan nuju Yerusalem. ²⁹ Pas Io terumpak di deso dampekng Betfage ngan betania,dampekng buket Zaitun namo e,Io ngutos duo ikuk mured e, ³⁰ Jokuk e ke dok duo,"bingkas am ke deso yakng di pengonyong. Ngan, pas iketn tamok kietn,iketn agih mantau sikuk anak keledai yakng ditamet,ngan pan kalok ditaek urakng.Lopas anak keledai iyok ngan baik kituk. ³¹ Ntik ado urakng betanyok ke iķau,'ngapai ikau maik anak keledai inyok ?' ,cohot bituk an: Tuhan merolu inyo." ³² Lalu,bingkas duo ikuk mured yakng di utos e ngan napat berono ubok yakng udoh dipodoh Io ke sidok. ³³ Keboroh sidok ngelopas anak keledai iyok,yakng umpuk e nanyok sidok,"Ngapai iketn ngelopas anak keledai ak ?" ³⁴ Sidok pe nyohot ,"Tuhan merolu e," ³⁵ Lalu,sidok maik anak keledai inyok ke orokng Tuhan ngan ngelotak seloa baju di atas pungokng keledai inyok,dok ngelotak Yesus ke atas e, ³⁶ Keboroh Yesus ngelolu jalan urang nyontang seloa baju sidok di jalan. ³⁷ Ngan,pas Yesus doh nak dampekng Yerusalem,nyok bah di jalatn nurotn ribakng ri aroh buket Zaitun, Ngadoh pengikot e betanga nimang Allah ngan ayoh-ayoh amat ngan ingan yakng nguman. Sidok besuko ke Allah atas mukjizat yakng udoh di pantau. ³⁸ Jokuk sidok,"Diberkatilah inyo yakng datakng ubok rajo alapm namo Tuhan,damai sejahtera di serugo ngan kemulian di orokng yakng mahatinggi!" ³⁹ Berapai ikuk ari rugokng urakng Farisi iyok modoh ke Yesus,"guru,togo am katn mured ikau." ⁴⁰ Akan tetapi,Yesus nyohot,"Aku modoh iketn,ntik sidok diam,batu-batu ituk an agik ngemo ngakap." ⁴¹ Waktu Yesus doh dampekng kota Yerusalem ngan mantau e,Io pe nongeh e. ⁴² Jokuk Io,"sempamo e ikau panai ari ituk apai ngemorik damai sejatera atas ikau.ngapai nih,hal ituk mentabok ri mato ikau. ⁴³ Badi agih datakng maso e keboroh katn musuh nak mulok paga ke mokakng ngelilekng ikau ngan nutop ikau ri semuo aroh e. ⁴⁴ Sidok agih ngerontap ikau,ikau berobeh ngan anak buoh ka yakng belinokng dipaga ikau. Ngan sidok botn morik sisok sigik batu pe yakng besunson diatas batu laen alapm ikau badi ikau abotn ngeponai waktu Allah nyagu ikau." ⁴⁵ Doh yok Yesus masuk ke bait Allah ngan nguse urakng-urakng yakng bejual ďiok. ⁴⁶ Kato Io kesiďok,''Ado tetuleh:'langkau-Ku agih menyadi langkau Do'o,' ⁴⁷ Lalu, Yesus ngaja di bait Allah sabatn ari.tapi,katn imam kepalo,ahli taurat katn pemimpen bangso ngogok caro ke munuh Io, ⁴⁸ Tapi sidok botn napat cara ke ngelago e badi semuo urakng pecayok amat ke kato Yesus.