¹ wa'tu ntu, Herodes, raja wilayah, ndangar berita-berita tentang Yesus. ² wan, ia madah ka hamba-hamba ya, "ntulah Yohanes pembaptis. ia laka bangkit ka ntara orak mati wan kaena ntulah mukjizat-mukjizat ntu begawe ka dalap ya." ³ sabab, Herodes laka nangkap Yohanes, li ngubat, wan nama ya kadalap penjara kaena Herodias, mbini Filipus, duanyadi Herodes. ⁴ kaena Yohanes pernah madah ka iya, "angin li banarkan bagi kau ntuk mpuk Herodias." ⁵ wan, meskipun Herodias mau mbunuh Yohanes, ia gali ka orak banyak kaena mpuya nanggkap Yohanes sebage nabi. ⁶ akan tapi, wa'tu ari ulang tahut Herodes tiba, anak mbini Herodias nari ka kadap mpuya, wan ntu muat sanang Herodes, ⁷ sehingga ia besumpah ntuk mere ape nang li minta anak mbini na. ⁸ maka, laka li ndesak umak ya, anak dara ntu madah, "merelah ka aku ka kitu, ka Yohanes Pembatis li atas nampan." ⁹ meskipun raja nyae, tapi kaena supah ya wan kaena orak-orak nang makat besama ya, ia pun merintah agar hal ntu li mere. ¹⁰ ia nyuruh ntuk natak ulu Yohanes ka penjara. ¹¹ wan, ulu Yohanes li maba ka atas nampan, li bere ka aka dara na wan ia maba ya ka umak ya. ¹² laka na, murid-murid Yohanes atak, ngalap tubuh ya, wan ngubur ya. lalu, mpuya ampus wan mere tahu Yesus. ¹³ wa'tu Yesus ndangar hal ntu, ia narik diri dari sana ngan perahu, ka tempat nang sunyi sorak. wan, wa'tu orak-orak ndangar ntu, mpuya nuna ya ngan jalat batis dari kota-kota. ¹⁴ wa'tu Yesus keluar, ia nele rombongan orak aya, wan kasih ka mpuya, wan nyembuh sakit mpuya. ¹⁵ wa'tu ari mau malam, para murid atak ka Yesus wan bekata, "tempat ntu sunyi wan ari udah mulai malam. suruhlah orak banyak ntu ampus ka desa-desa wan mali makanan ntuk mpuya sorak." ¹⁶ akan tapi, Yesus bekata ka mpuya, "mpuya angin perlu ampus. kau, merelah mpuya makanan." ¹⁷ mpuya bekata ka ya, "ka kitu diri angin mpuk ape-ape, kecuali 5 roti wan 2 ikat." ¹⁸ wan, ia bekata, "mabalah na ka kitu, ka aku." ¹⁹ lalu na, ia nyuruh orak banyak na duduk ka rumput, wan ia ngalap 5 roti wan 2 ikat na, lalu sambil nele ka langit, ia ngucap syukur wan memecah-mecahkan roti na. laka na, ia mere ka murid-murid ya, wan murid-murid ya ka orak banyak. ²⁰ wan, mpuya babis makat wan li kanyangkan. lalu, mpuya ngalap natak-natak nang sisa, ada dua balas keranjang panuh. ²¹ wan, mpuya nang makat kira-kira ada 5.000 laki-laki, gik angin temasuk mbini wan anak-anak. ²² Yesus segara mendesak murid-murid ya tama ka perahu wan ampus dulu ka seberang, sementara ia nyuruh orak banyak na pulak. ²³ wan, laka na Yesus nyuruh orak banyak na pulak, ia naek ka atas gunung sorak wan badoa. wa'tu mau malam, ia sorak li sana. ²⁴ akan tapi, perahu ntu udah jauh dari darat, li ngobang-ambing gelombang kaena belawanan ngan angin. ²⁵ wan, wa'tu jam keempat malam na, ia atak ka mpuya, bejalat ka atas ae. ²⁶ wa'tu para murid nele ya bejalat ka atas ae, mpuya asa gali wan ngampak, "ntu hantu!" lalu, mpuya ngampak kaena gali. ²⁷ akan tapi, Yesus langsong ngomong ka mpuya, kata-ya, "kuatkanlah hati kau! ntu aku, usah gali." ²⁸ wan, Petrus bekata ka iya, "Tuhan, jika ntu kau, suruhlah aku atak ka kau li atas ae." ²⁹ Yesus bekata, "ataklah!" maka, Petrus keluar dari perahu, wan bejalat ka atas ae, wan atak ka Yesus. ³⁰ namun, wa'tu, nele angin, ia gali wan mule tenggalap. ia ngampak, "Tuhan, selamatkan aku!" ³¹ Yesus langsung nyalur langan ya, migak Petrus wan bekata, "kau nang kuran iman, ngape kau ragu-ragu?" ³² wa'tu mpuya tama ka dalap perahu, angin pun beranti. ³³ laka na, mpuya nang ada ka perahu nyembah Yesus wan bekata, "sesungguh ya, kau adalah Anak Allah!" ³⁴ laka nyebrang, mpuya atak ka tanah Genesaret. ³⁵ wa'tu orak-orak ka tempat na ngenali ya, mpuya meretahu ka babis daerah wan maba babis orak nang sakit ka Yesus. ³⁶ mpuya memohon ka Yesus supaya boleh nyentuh ujuk jubah ya, wan babis orak nang nyetuh ya njadi sembuh.