¹ من لە مەسیحدا ڕاستیەکە دەڵێم، درۆ ناکەم، ویژدانم شایەتم بۆ دەدات بە گیانە پیرۆزەکە، ² کە زۆر دڵتەنگم و لە دڵمدا ئازارێکی نەبڕاوە هەیە. ³ خۆزگەم دەخواست لە پێناو براکانم، خزمەکانم بەپێی جەستە، لە مەسیح بێبەش بم. ⁴ چونکە ئەوان یەسرائیلیین، و ڕێگایان پێدرا شکۆمەندی و پەیمان و تەوڕات و پەرستش و بەڵێنەکان وەربگرن، ⁵ باوکانمان لەوانن و مەسیحیش بەگوێرەی جەستە لەوانەوە هاتووە، ئەو لە سەرووی هەمووانە خودایەکی پیرۆزە و هەتاهەتاییە. ئامین. ⁶ مەبەستم ئەوە نییە کە وشەی خودا هیوای تێدا نەبوو. چونکە هەموو نەوەی یەسرائیل یەسرائیلی نین؛ ⁷ چونکە، هەمووئەوانەی نەوەی ئەڤراهامن، ڕۆڵەی خودانین، بەڵکو، وەک نووسراوە: «لە یتساخدا نەوەیەکت دەبێت کە ناوی تۆ هەڵدەگرێت». ⁸ واتە ڕۆڵەکانی جەستە ڕۆڵەکانی خودا نین، بەڵکو بە ڕۆڵەکانی بەڵێنەکە دادەنرێن. ⁹ ئەوەش وشەی بەڵێنەکەیە: «لەو کاتەدا دەگەڕێمەوە و سارا کوڕێکی دەبێت». ¹⁰ نەک تەنها ئەوە، بەڵکو ڕەبەکە لە پیاوێک دووگیان بوو، کە ئیتساخی باوکمانە، ¹¹ منداڵەکانیش هێشتا لەدایک نەبوون و هێشتا چاکە و خراپەیان نەکردبوو، تاکو مەبەستی خودا دەربارەی هەڵبژاردنەکە بمێنێتەوە. ¹² کە لەسەر بنەمای کردارنیە، بەڵکو لەسەر بنەمای ئەو بانگکردنە بوو کە لەلایەن ئەوەوە، پێی گوترا: «منداڵە گەورەکە دەبێتە کۆیلەی بچووکەکە»، ¹³ وەک نووسراوە: «یاکۆڤم خۆشویست، ڕقم لە ئیساڤ بوو». ¹⁴ چی بڵێین، ئایا لای خودا ستەم دەبێت، هەرگیز! ¹⁵ چونکە بە موشەی فەرموو: «بە بەزەیی دەبم لەگەڵ ئەوەی بەزەییم پێدا دێتەوە، میهرەبان دەبم لەگەڵ ئەوەی بمەوێت میهرەبان بم!» ¹⁶ کەواتە بابەتەکە پەیوەندی بە ویست و هەوڵدانی مرۆڤەوە نییە، بەڵکو تەنها پەیوەندی بە بەزەیی خوداوە هەیە. ¹⁷ چونکە خودا لە پەرتوکەکەدا بە فیرعەون دەفەرموێت: «هەر بۆ ئەو مەبەستە تۆم هێشتۆتەوە: تا هێزی خۆم لە تۆدا پیشان بدەم و ناوم لە هەموو زەویدا ڕابگەیەنم». ¹⁸ بۆیە خودا بەزی بە هەر کەسێکدا دێتەوە کە بیەوێت، سزای هەر کەسیش دەدات، کە بیەوێت. ¹⁹ لێرەدا پێم دەڵێیت: «بۆچی گلەیی دەکەیت؟» کێ بەرەنگاری مەبەستەکەی دەبێتەوە؟» ²⁰ بۆیە دەڵێم: ئەی مرۆڤ تۆ کێیت تا وەڵامی خودا بدەیتەوە؟ ئایا ئەو شتەی کە دروستکراوە بە دروستکەرەکەی دەڵێت: بۆچی منت بەم شێوەیە دروست کردووە؟ ²¹ ئایا گۆزەکەر دەسەڵاتی بەسەر قوڕکەدا نییە کە لە هەمان قوڕ قاپێک بۆ ڕێزلێنان و یەکێکی دیکەش ئاسایی دروستبکات؟ ²² چی دەبوو ئەگەر خودا ویستی تووڕەیی خۆی پیشان بدات و توانای خۆی ڕابگەیەنێت، بە هەموو سەبرەوە بەرگەی جامی تووڕەیی گرت لەوانە کە شایەنی لەناوچوون بوون، ²³ لەبەر ئەو مەبەستەبوو دەوڵەمەندی شکۆمەندیەکەی خۆی لە دەفرەکانی بەزەیی ڕابگەیەنێت کە پێشتر بۆ شکۆمەندی ئامادەی کردبوو، ²⁴ لە ئێمەدا کە بانگی کردین نەک تەنها لە نێو یەهودیەکان بەڵکو لە نێو نەتەوەکانیش؟ ²⁵ وە ئەوەش بەگوێرەی ئەوەی کە لە پێشبینی هۆشەع دەیڵێت: «ئەوانەی گەلی من نەبوون بە گەلەکەم بانگیان دەکەم و ئەوانەی خۆشەویست نین بە خۆشەویستەکەم بانگیان دەکەم. ²⁶ وە لە کوێ پێیان گوترا: ئێوە گەلی من نین، لەوێ پێیان دەوترێت ڕۆڵەکانی خودای زیندوو». ²⁷ بەڵام ئیشایا، باسی یەسرائیل دەکات و دەڵێت: «ئەگەرچی نەوەی یەسرائیل وەک لمی دەریا زۆر دەبن، بەڵام پاشماوەیان ڕزگاری دەبێت. ²⁸ چونکە پەروەردگار بڕیار لەسەر بابەتەکە دەدات و بە خێرایی قسەکەی جێبەجێ دەکات لەسەر زەوی». ²⁹ وەک ئیشایا پێشتر گوتویەتی: «ئەگەر پەروەردگاری سوپاسالار نەوەی بۆ نەهێشتبایین، وەک سۆدۆم و وەک عەمۆرە دەبوین!» ³⁰ کەواتە کورتەی قسەکە چییە؟ ئەو نەتەوانەی کە بەدوای ڕاستودروستیدا نەدەگەڕان گەیشتنە ڕاستودروستی، بەڵام ڕاستودروستی لەسەر بناغەی باوەڕە. ³¹ بەڵام یەسرائیل هەوڵیاندا بەتەوڕات بە ئامانجی ڕاستودروستی بگەن، تەنانەت بە تەوڕاتیش پێینەگەیشتن و شکستیان هێنا. ³² بەچ هۆکارێک؟ چونکە هەوڵەکانیان لەسەر بناغەی باوەڕ نەبوو، بەڵکو لەسەر بناغەی کرداربوو. بە بەردێکی کۆسپ تووشی کۆسپ بوون ³³ وەک نووسراوە: «ئەوەتا من لە سەهیۆن بەردی کۆسپ وتاشەبەردی کەوتن دادەنێم ئەوەی باوەڕی پێبێنێت بێ هیوا نابێت».