¹ ئەی برایان، ئارەزووی دڵم و پاڕانەوەم لە خودایە بۆ ئەوان، کە ڕزگاریان بێت. ² من شایەتی بۆ ئەوان دەدەم کە دڵگەرمیان بۆ خودا هەیە، بەڵام لەسەر بناغەی زانیاری نییە. ³ چونکە ئەوان لە ڕاستودروستی خودا بێ ئاگا بوون و هەوڵیان دەدا ڕاستودروستی خۆیان بسەلمێنن، ملکەچی ڕاستودروستی خودا نەبوون. ⁴ ئامانجی تەوڕات مەسیحە بۆ بێتاوان بونی هەموو ئەوانەی باوەڕیان هەیە. ⁵ موشە لەبارەی ئەو ڕاستودروستییەی کە لە تەوڕاتدا دێتە ئاراوە نووسیویەتی: «هەر مرۆڤێک کار بەمانە بکات، ئەوە پێی دەژی». ⁶ بەڵام ئەو ڕاستودروستییەی کە لە باوەڕەوە سەرچاوە دەگرێت ئەمە دەڵێت: «لە دڵتدا مەڵێ: کێ بەرەو ئاسمان بەرز دەبێتەوە؟» (واتە با مەسیح دابەزێت)، ⁷ نەخێر: «کێ دادەبەزێت بۆ قووڵایی؟» واتا بۆ ئەوەی مەسیح لە مردن هەستێتەوە! ⁸ کەواتە چی دەفەرموێت؟ دەفەرموێت: «وشەکە لێت نزیکە. لە دەم و لە دڵتدایە!» وە ئەو وشەیە هیچ نییە جگە لە وشەی باوەڕ کە ئێمە موژدەی پێدەدەین: ⁹ ئەگەر بە دەمت دان بەوەدا بنێیت یەشوا پەروەردگارە، و لە دڵتدا باوەڕت بەوە هەبێت کە خودا لە نێو مردوواندا هەڵیساندەوە، ئەوە ڕزگارت دەبێت. ¹⁰ چونکە بە دڵ باوەڕهێنان دەبێتە هۆی ڕاستودروستی، و بە دەم دانپێدانان دەبێتە هۆی ڕزگاربوون، ¹¹ چونکە پەرتوکەکە دەڵێت: «هەریەکێک باوەڕی پێی بهێنێت نا ئومێد نابێت». ¹² جیاوازی یەهودی و یۆنانی نییە، چونکە هەمووان یەک پەروەردگاریان هەیە، دەوڵەمەندن ئەوانەی بانگی دەکەن. ¹³ «چونکە هەریەکێک بە ناوی پەروەردگاربانگی بکات ڕزگاری دەبێت». ¹⁴ بەڵام، چۆن بانگی دەکەن کە باوەڕتان پێی نەبێت؟ وە چۆن باوەڕ بەوە دەکەن کە نەتان بیستبێت؟ چۆن دەبیستن بەبێ مزگێنیدەر؟ ¹⁵ چۆن یەکێک مزگێنی دەدات ئەگەر پێشتر نەنێردرابێت؟ وەک نووسراوە: « چەند جوانە پێیەکانی مزگێنیدەران بە چاکە!» ¹⁶ بەڵام هەموویان گوێڕایەڵی مزگێنییەکە نەبوون. چونکە ئیشایا دەڵێت: «ئەی پەروەردگار! کێ باوەڕی بەو وشانە کرد کە بیستمان؟» ¹⁷ بۆیە باوەڕ دەرئەنجامی بیستنە، بیستنیش ئەوەیە مزگێنی بدەی بە وشەی مەسیح! ¹⁸ بەڵام من دەڵێم: ئایا ئەوان نەیانبیست؟ بەڵێ، چونکە مزگێنیدەرەکان «دەنگیان گەیشتە هەموو زەوی، و قسەکانیان دەگاتە ئەوپەڕی جیهان». ¹⁹ وە دەگەڕێمەوە دەڵێم: ئایا ئەوان لە یەسرائیل تێناگەن؟ موشە، یەکەمجار، دەڵێت: «وادەکەم ئیرەیی بەئەوانە ببەن کە نەتەوە نین، بەنەتەوەیەکی تێنەگەیشتوو توڕەتان دەکەم!» ²⁰ وە ئیشایاش بەبوێریەوە دەڵێت: «ئەوانەی بەدوامدا نەگەڕان، دۆزیمیانەوە و بۆ ئەوانەی کە نەیانویستم دەرکەوتم». ²¹ بەڵام لەبارەی یەسرائیل دەڵێت: «بە درێژایی ڕۆژ دەستم بۆ گەلێکی یاخی و دژەبەر درێژ کردووە!»