¹ وە لێرەدا دەڵێم: ئایا خودا گەلەکەی ڕەتکردەوە؟ نەخێر! منیش یەسرائیلیم، لە نەوەی ئەڤراهامم و لە هۆزی بنیامین. ² خودا گەلەکەی ڕەت نەکردەوە کە هەڵیبژاردبوو. ئایا نازانن پەرتوکەکە چی دەڵێت دەربارەی ئیلیا کاتێک سکاڵای لەسەر یەسرائیل بۆ خودا بەرزکردەوە و دەڵێت: ³ «ئەی پەروەردگار؟ پێغەمبەرەکانتیان کوشت، قوربانگاکەتیان وێران کرد، منیش بە تەنیا ماومەوە و بەدوای کوشتنمدا دەگەڕێن!» ⁴ بەڵام، وەڵامی خودام بۆ ئەو چی بوو؟ حەوت هەزار پیاوم بۆ خۆم هێشتەوە کە چۆکیان بۆ بەعل دانەداوە!» ⁵ کەواتە، لە سەردەمی ئێستادا، هێشتا پاشماوەیەک هەیە کە لەلایەن خوداوە بە بەخشش هەڵبژێردراون. ⁶ بەڵام بەو پێیەی ئەمە بە بەخشش بەدی هاتووە، ئیتر لەسەر بنەمای کاردارەکان نییە، ئەگینا بەخشش ئیتر بەخشش نییە. ⁷ کەواتە پوختەی قسەکە چییە؟ ئەوەی یەسرائیل بەدوایدا دەگەڕا، بەدەستیان نەهێنا، بەڵام هەڵبژێردراوان بەدەستیان هێنا، ئەوانەیتریش کوێر بوون، ⁸ بەگوێرەی ئەوەی نووسراوە: «گیانێکی تەمبەڵی پێبەخشین وچاوێک کە نابینێت و گوێیان کە نابیستێت، تەنانەت هەتا ئەمڕۆش». ⁹ بە هەمان شێوە داڤید دەڵێت: «با خوانەکانیان ببێتە داو و تەڵە، کۆسپ و سزا. ¹⁰ با بەر چاویان تاریک بێت تا نەبینن، پشتیان هەمیشە چەماوبێت!» ¹¹ پاشان دەڵێم: ئایا ئەوان کەوتن تا جارێکیتر هەڵنەستنەوە؟ نەخێر! بەڵکو لە ڕێگەی کەوتنیانەوە ڕزگاری بۆ گەلان دابین کرا، ڕەنگە بەمە ئیرەیی بیانگرێت. ¹² ئەگەر کەوتنیان بۆ جیهان دەوڵەمەندی بوبێت، وە زیانەکانیان بۆ نەتەوەکان دەوڵەمەندی بوبێت، ئەوا کامڵ بونیان چەندە زیاتر دەبوو؟ ¹³ چونکە من وەک نێردراو بۆ نەتەوەکان قسە لەگەڵ ئێوە دەکەم و پەیامەکەم شکۆمەند دەکەم، ¹⁴ تاکو گەلەکەم بۆ ئیرەیی بوروژێنم و هەندێکیان ڕزگار بکەم. ¹⁵ ئەگەر دوورکەوتنەوەیان دەرفەتێکە بۆ ئاشتبوونەوەی جیهان، ئەوا پەسەندکردنیان چییە جگە لە ژیانەوە لە نێو مردووان؟ ¹⁶ وە ئەگەر پارچەی یەکەمی هەویرەکە پیرۆز بێت؛ ئەوا هەموو هەویرەکە پیرۆزە، وە ئەگەر ڕەگی درەختەکە پیرۆز بێت، ئەوا لقەکانیش پیرۆزن. ¹⁷ کەواتە ئەگەر هەندێک لە لقەکانی زەیتون بڕدران، ئەوا تۆیان لە زەیتونە خۆڕسکەکە هێناو موتربەیان کردی، لە ڕەگ و خۆراکی زەیتوونەکە بەژدار بوویت ¹⁸ شانازی بە سەر لقەکانیترەوە مەکە. وە ئەگەر شانازی بکەیت، ئەوە تۆ نیت کە ڕەگەکەت هەڵگرتووە، بەڵکو ڕەگەکەیە تۆی هەڵگرتووە. ¹⁹ لەوانەیە بڵێیت: «ئەو لقانە بڕدراون بۆ ئەوەی من موتربە بکرێم» ²⁰ ڕاستە! ئەو بەهۆی بێ باوەڕیەوە بڕاوە، تۆش بەهۆی باوەڕەوە موتوربە کراویت. لەخۆبایی مەبە، بەڵکو بترسە ²¹ چونکە ئەگەر خودا بەزەیی بە لقە سروشتییەکاندا نەیەتەوە ئەوا بەزەیی بە تۆشدا نایەتەوە. ²² کەواتە میهرەبانی و توندی خودا لەبەرچاو بگرە: سەبارەت بە توندییەکەی، بۆ ئەوانەیە کە کەوتوون؛ میهرەبانی خودا بۆ تۆیە تا ئەو کاتەی کە بەردەوامیت لە میهرەبانیدا. وە ئەگەر تۆ خۆڕاگر نەبیت، تۆش دەبڕێیەوە. ²³ ئەوانیش ئەگەر لە بێ باوەڕیدا بەردەوام نەبن، موتوربە دەکرێنەوە، چونکە خودا توانای ئەوەی هەیە موتوربەیان بکاتەوە. ²⁴ ئەگەر لە دار زەیتوونێکی خۆڕسک بڕابوویتەوە، و بە پێچەوانەی نەریتی دار زەیتوونێکی چاک موتوربە کرابیت، ئەوانە کە لە لقە ڕەسەنەکەن، چەندە زیاتر لە دار زەیتوونەکەی خۆیان موتوربە دەکرێن. ²⁵ چونکە برایان، نامەوێت ئەم نهێنییەتان لێ بشاردرێتەوە، نەک لەبەرچاوی خۆتان دانا بن، کە یەسرائیل بەشێکی کوێر بووە تا هاتنە ناوەوەی تەواوی نەتەوەکان. ²⁶ بەم شێوەیە هەموو یەسرائیل ڕزگاری دەبێت، وەک نووسراوە: «ڕزگارکەر لە سەهیۆنەوە دێت، خوانەناسی لە یاکۆڤ دووردەخاتەوە. ²⁷ ئەوەش پەیمانی منە لەگەڵ ئەوان کاتێک گوناهەکانیان دادەماڵم». ²⁸ تا ئەو شوێنەی پەیوەندی بە مزگێنیەکەوە هەیە، ئەوان دوژمنی ئێوەن لە پێناوی خودا. سەبارەت بە هەڵبژاردنی خودایی، ئەوان بە بۆنەی باووباپیرانەوە خۆشەویستن. ²⁹ چونکە خودا پاشگەزنابێتەوە لە بەخشین و بانگهێشتکردنەکەی. ³⁰ ڕاستییەکە ئەوەیە وەک چۆن ئێوە لە ڕابردوودا سەرپێچی خوداتان کرد، بەڵام ئێستا لە ئەنجامی گوێڕایەڵ نەبوونی ئەوان بەزەییتان وەرگرتووە، ³¹ ئێستا ئەوان کە گوێڕایەڵی خودا نین . ئەوانیش بەزەییان وەرگرت، بەهۆی ئەو بەزەییەی ئێوە وەرتان گرت. ³² خودا هەمووانی پێکەوە زیندانی کرد لە بێ گوێرایەڵیدا تاکو بەزەیی بە هەموواندا بێتەوە. ³³ سامان و دانایی و زانستی خودا چەند قووڵە! بڕیارەکانی چەندە دوورن لە پشکنین و ڕێگاکانی پەی پێ نەبراون! ³⁴ «چونکە کێ بیری پەرەوردگاری زانی؟ یان کێ ڕاوێژکاری بووە؟ ³⁵ کێ شتێکی پێ بەخشیوە تاکو بۆی بگەڕێنێتەوە؟» ³⁶ چونکە هەموو شتەکان لە ئەوە و بەهۆی ئەوە و بۆ ئەوە. هەتاهەتایە شکۆمەندی بۆ ئەوە. ئامین!