¹ بۆیە برایان، لە بەر بەزەیی خودا لێتان دەپاڕێمەوە، جەستەتان وەک قوربانیەکی زیندوو پێشکەشی بکەن، کە لەلای ئەو پەسەندکراوە، کە ئەوەش پەرستنی ژیرمەندانەتانە. ² شێوەی جیهان وەرمەگرن، بەڵکو بە نوێکردنەوەی بیرکردنەوەتان بگۆڕێن، تا بزانن خواستی چاک و پەسەندکراوی تەواوەتی خودا چییە. ³ چونکە بەو بەخششەی کە پێم دراوە ، فەرمان بە هەریەکێکتان دەکەم کە بەهای خۆیان بەرزتر نەکەنەوە لەوەی شایەنیەتی، بەڵکو لە بیرکردنەوەیاندا هۆشیار بن، بەپێی ئەو باوەڕەی کە خودا بەسەر هەریەکێکتاندا دابەشی کردووە. ⁴ وەک چۆن لە یەک جەستەدا ئەندامی زۆرمان هەیە، بەڵام هەموو ئەم ئەندامانە یەک ئەرکیان نییە، ⁵ بە هەمان شێوە ئێمەش کە زۆرین، لە مەسیحدا یەک جەستەین و هەموومان ئەندامی یەکترین. ⁶ بەڵام، ئەو بەهرانەی کە بە پێی بەخشش پێماندراوە، (با بەکاری بهێنین): ئەوەی پێشبینی پێدراوە، با پێشبینی بکا بە پێی ئەو باوەڕەی کە هەیەتی؛ ⁷ ئەوەی بەهرەی خزمەتکردنی هەیە، با خەریکی خزمەتکردن بێت؛ یان فێرکردن، با فێربکات؛ ⁸ یان وتاردان، با وتاربدات؛ یان بەخشین، با بە بەخشندەیی ببەخشێت؛ یان ڕابەرایەتی، با بە پەرۆشەوە ڕابەرایەتی بکات؛ یان پیشاندانی بەزەیی، با بە خۆشحاڵیەوە بەبەزیی بێت. ⁹ با خۆشەویستیتان بێ دووڕوویی بێت. دوور بکەونەوە لە خراپە، بە چاکەوە بچەسپێن. ¹⁰ بە خۆشەویستی برایانە یەکتریتان خۆش بوێت، بەڕێزەوە یەکتریتان پێ باشتربێت. ¹¹ لە تێکۆشانتان سست مەبن، بەڵکو لەگیان دڵ گەرمبن، خزمەتکاری پەروەردگاربن، ¹² لە هیوادا شاد بن، لە تەنگانەدا ئارام بن، چەسپاو بن لە نزاکردندا، ¹³ هاوکاربن لە دابین کردنی پێداویستی پیرۆزکراوان، و بەردەوام بن لە پێشوازی کردنی نامۆکان. ¹⁴ چەوسێنەرانتان بەرەکەت داربکەن. بەرەکەتداری بکەن و نەفرەت مەکەن! ¹⁵ شاد بن لە گەڵ ئەوانەی دڵخۆشن، بگرین لەگەڵ ئەوانەی دەگرین. ¹⁶ لەگەڵ یەکتردا تەبابن، گرینگی بە پایەبەرزی مەدە، بەڵکو هاوسەنگ بن لەگەڵ ئەوانەی کە پێگەیان نزمە، خۆتان بەدانا دامەنێن. ¹⁷ وەڵامی هیچ خراپەیەک بە خراپە مەدەرەوە، بەڵکو تێبکۆشە ئەوەی چاکە لەبەردەم هەموو خەڵکیدا پێشکەشی بکەیت. ¹⁸ ئەگەر دەکرێت، تا ئەوەی کە پەیوەندی بە ئێوەوە هەیە، لەگەڵ هەموو خەڵکیدا بە ئاشتی بژین. ¹⁹ خۆشەویستان خۆتان تۆڵە مەکەنەوە، بەڵکو توڕەیی خۆتان بۆ خودا جێبهێڵن، چونکە نووسراوە: «تۆڵەکردنەوە هی منە، منم سزا دەدەم، پەروەردگار دەفەرموێت». ²⁰ بەڵکو «ئەگەر دوژمنەکەت برسی بوو، خواردنی پێ بدە، ئەگەر تینوی بوو، ئاوی پێبدە. بەم کارە پشکۆ لەسەر سەری کۆدەکەیتەوە». ²¹ مەهێڵە خراپە بەسەرتدا زاڵ بێت، بەڵکو بە چاکە بەسەر خراپەدا زاڵ ببە.