¹ کەواتە چی دەڵێین؟ ئایا بەردەوامبین لە گوناهەکردن تا بەخشش زۆر بێت؟ ² نەخێر! ئێمە مردین سەبارەت بەگوناهە، ئیتر بۆچی تێیدا بژین؟ ³ یان لێتان شاردراوەتەوە کە ئێمە هەموومان، بە لە ئاوهەڵکێشانمان لەگەڵ مەسیحی یەشوا یەکمانگرت، بە لە ئاوهەڵکێشانەکەمان یەکمانگرت لە مردنەکەیدا؟ ⁴ بە هۆی ئەوەوە ئێمە بە لەئاو هەڵکێشان بۆ مردن لەگەڵیدا نێژراین، هەر وەک چۆن مەسیح بە شکۆمەندی باوک لە مردن هەستایەوە، بە هەمان شێوە ئێمەش لە ژیانێکی نوێدا بژین. ⁵ مادام ئێمە لە مردنێکی هاوشێوەی مردنەکەی لەگەڵیدا یەکمانگرت، لە هەستانەوەشی لەگەڵیدا یەکدەگرین. ⁶ ئێمە ئەوە دەزانین: مرۆڤە کۆنەکە تیاماندا لەگەڵی لە خاچ دراوە، بۆ ئەوەی جەستەی گوناهبارمان لەناوبچێت، تاکو چیتر بە کۆیلەی گوناهە نەمێنینەوە. ⁷ چونکە ئەوەی بمرێت، لە گوناهە ئازاد دەبێت. ⁸ مادام لەگەڵ مەسیح مردین، باوەڕمان وایە کە لەگەڵیدا دەژین، ⁹ چونکە دڵنیاین کە مەسیح لە مردن هەستاوەتەوە، بۆ جاری دووەم نامرێت، بۆیە لەمەودوا مردن دەسەڵاتی بەسەریدا نییە. ¹⁰ چونکە یەکجار لە پێناو گوناهەدا مرد؛ بە ژیانی، بۆ خودا دەژی. ¹¹ بە هەمان شێوە ئێوەش خۆتان بە مردوو دابنێن سەبارەت بە گوناهه و زیندوو بۆ خودا لە یەشوای مەسیحدا. ¹² بۆیە، مەهێڵن گوناهه دەست بەسەر جەستەی لەناو چووتان بگرێت بە ئارەزووی خۆی بەڕێوەتان ببات. ¹³ ئەندامەکانتان وەک چەکێک پیشکەشی گوناهە مەکەن، بەڵکو خۆتان پێشکەش بە خودا بکەن وەک هەستاوەی نێو مردووان، با ئەندامەکانتان بۆ خودا چەکی ڕاستودروستیبێت. ¹⁴ باگوناهه بەسەرتاندا زاڵ نەبێت، چونکە ملکەچی تەوڕات نین، بەڵکو بەخشش. ¹⁵ ئێستا چی؟ ئایا گوناهه بکەین چونکە ملکەچی تەوڕات نین بەڵکو بەخشش؟ نەخێرا! ¹⁶ ئایا نازانن کاتێک خۆتان وەک کۆیلە ملکەچی یەکێک دەکەن، دەبنە کۆیلەی ئەوەی ملکەچن بۆی: جا بۆ گوناهە کە بەرەو مردنە، یان بۆ گوێڕایەڵی کە بەرەو ڕاستودروستیە؟ ¹⁷ بەڵام سوپاس بۆ خودا، ئێوە پێشتر کۆیلەی گوناهە بوون، لە دڵەوە ملکەچی ئەو شێوە فێرکردنە بوون کە پێتان سپێردراوە. ¹⁸ ئێستاش، لە گوناهە ئازاد بوون، بوونە خزمەتکاری ڕاستودروستی. ¹⁹ وەک مرۆڤ لەبەر لاوازی جەستەتان قسە دەکەم. وەک چۆن پێشوتر ئەندامەکانی لەشتان وەک کۆیلەی گڵاوی و خراپە پێشکەشی خراپە کرد، ئێستاش ئەندامەکانتان وەک کۆیلەی ڕاستودروستی لە خزمەتی پیرۆزیدا پێشکەش بکەن. ²⁰ چونکە کاتێک کۆیلەی گوناهە بوون، سەبارەت بە ڕاستودروستی ئازاد بوون. ²¹ بەڵام لەو کاتەدا چیتان بەرهەم هێنا جگە لەو شتانەی کە ئێستا پێی شەرمەزارن، ئەنجامیان جگە لە مردن هیچی تر نییە؟ ²² بەڵام ئێستا، کە لە گوناهه ئازاد بوون و بوونە خزمەتکاری خودا، بەرهەمتان بۆ پیرۆزییە، کە چارەنووسەکەی ژیانی هەتاهەتاییە. ²³ چونکە کرێی گوناهه مردنە، بەڵام دیاری خودا ژیانی هەتاهەتاییە لە مەسیحی یەشوای پەروەردگارماندا.