¹ کەواتە، هیچ بیانوێکت نییە ئەی ئەو مرۆڤەی کە خەڵکی تاوانباردەکەی، ئینجا هەریەکێک بێت. خۆت تاوانباردەکەیت: چونکە تۆ بڕیار لەسەر هەمان ئەوکارانە دەدەیت کە خۆت دەیان کەیت. ² بەڵام ئێمە دەزانین بڕیاری خودا ڕاستە، لەسەر ئەوانەی ئەم جۆرە کارانە دەکەن، ئەوە بە گوێرەی ڕاستیەکەیە. ³ ئەی ئەو مرۆڤەی ئەوانە تاوانباردەکەیت کە ئەو جۆرە کارانە دەکەن خۆشت هەمان ئەو کارانە دەکەیت، پێت وایە لە لێپرسینەوەی خودا ڕزگارت دەبێت؟ ⁴ یان سووکایەتی بە پشودرێژی و دەوڵەمەندی و میهرەبانی و ئارامی و خۆڕاگرییەکەی دەکەیت و نازانیت بەزەیی خودا هانت دەدات بۆ پاشگەزبوونەوە لە گوناهە کردن؟ ⁵ بەڵام تۆ بەهۆی دڵڕەقیت و پاشگەزنەبوونەوەت، توڕەیی بۆ خۆت هەڵدەگریت بۆ ڕۆژی تووڕەیی، کە لەو ڕۆژەدا لێپرسینەوەی دادپەروەرانەی خودا ڕادەگەیەنرێت. ⁶ چونکە هەریەکێک بەگوێرەی کارەکانیان پاداشت دەداتەوە. ⁷ ژیانی هەتاهەتایی بۆ ئەوانەیە کە بەدوای شکۆمەندی و ڕێز و نەمریدا دەگەڕێن لە سەر کاری چاکە بەردەوام دەبن؛ ⁸ وە تووڕەیی و ڕق بۆ ئەوانە دەبێت کە ڕەتیدەکەنەوە گوێڕایەڵی ڕاستی بن بەڵکو ملکەچی خراپەکاری دەبن. ⁹ بەڵام ناخۆشی و تەنگانە لەسەر دەروونی هەموو مرۆڤێکە کە خراپەکاری دەکات، یەکەم یەهودیەکان پاشان یۆنانیەکان؛ ¹⁰ شکۆمەندی و ڕێز و ئاشتی بۆ هەموو ئەوانەیە کەچاکە دەکەن یەکەم جار بۆ یەهودیەکان، پاشان بۆ یۆنانیەکان. ¹¹ چونکە خودا لایەنگری ناکات. ¹² هەموو ئەوانەی کە تەوڕاتیان نیە و گوناهە دەکەن، بە بێ تەوڕات لەناودەچن؛ هەموو ئەوانەش کە لەژێر دەسەڵاتی تەوڕاتدان گوناهە دەکەن، بە تەوڕات تاوانبار دەکرێن. ¹³ چونکە ئەوانەی تەوڕات دەبیستن لەبەردەم خودا بێتاوان نین؛ بەڵکو ئەوانە بێتاوان دەکرێن کە کار بەتەوڕات دەکەن. ¹⁴ کەواتە نەتەوەکان کە تەوڕاتیان نیە، کاتێک بە شێوەیەکی سروشتی ئەوەی لە تەوڕاتدا هەیە پەیڕەوی دەکەن، تەوڕاتێکن بۆخۆیان، لەگەڵ ئەوەشدا کە تەوڕات هی ئەوان نییە. ¹⁵ ئەوانە کڕۆکی ئەو تەوڕاتە پیشان دەدەن کە لە دڵیاندا نووسراوە، ویژدان و بیرکردنەوەکانیان لەناخیاندا شایەتی ئەوەن، هەندێک جار تۆمەتباریان دەکات، هەندێک جاریش بێ تاوانیان دەکات. ¹⁶ لەو ڕۆژەدا کە خودا بەگوێرەی مزگێنی من، لەسەر دەستی یەشوای مەسیح، بڕیار لەسەر نهێنییەکانی خەڵک دەدات. ¹⁷ بەڵام، تۆ ئەوەی خۆت بە یەهودی ناودەبەیت؛ پشت بەتەوڕات دەبەستیت؛ وە شانازی بە خوداوە دەکەیت؛ ¹⁸ بە گوێرەی ئەوەی لە تەورات فێربوویت ئەوە جیابکەرەوە کە باشترینە، ¹⁹ وە متمانەت بەخۆت هەیە کە تۆ ڕێبەری نابیناکان و ڕووناکیت بۆ ئەوانەی لە تاریکیدان، ²⁰ و سەرکۆنەکەری نەزانانەکان، و مامۆستای منداڵانیت؛ تۆ لە تەوراتدا وێنەی زانیاری و ڕاستیەکەت هەیە؛ ²¹ کەواتە تۆ، ئەی ئەوەی خەڵکی فێر دەکەیت، بۆ خۆت فێر ناکەیت؟ تۆ کە ئامۆژگاری دەکەیت دزی مەکەن، خۆت دزی ناکەیت؟ ²² تۆ کە دەڵێی داوێنپیسی مەکەن، خۆت داوێنپیسی ناکەیت؟ تۆ کە بتەکان ڕەتدەکەیتەوە، پەرستگاکان تاڵان ناکەیت ²³ تۆ ئەوەی کە شانازی بە تەوراتەوە دەکەیت، ئایا بە سەرپێچیکردنی تەوڕات سووکایەتی بە خودا ناکەیت؟ ²⁴ چونکە «بە هۆی ئێوە لەناو نەتەوەکاندا کوفر بە ناوی خودا دەکرێت» هەروەک نووسراوە. ²⁵ خەتەنەکردن ئەوکاتە سوودی دەبێت کە کار بە تەوڕات بکەیت. بەڵام ئەگەر سەرپێچی تەوڕات کرد، خەتەنەکردنت وەکو ئەوەیە کە خەتەنە نەکرابیت. ²⁶ ئەگەر، خەتەنە نەکراوێک کار بە تەوڕات بکات، ئایا خەتەنە نەکراوییەکەی بە خەتەنەکراوی بۆ هەژمار ناکرێت؟ ²⁷ ئەوەی کە بە سروشت خەتەنە نەکراوە، بەڵام تەوڕات پەیڕەو دەکات، تۆ تاوانبار دەکات کە پێچەوانەی تەوڕاتیت و لە کاتێکدا پەرتووک و خەتەنە کردنت هەیە. ²⁸ ئەوەی بە ڕواڵەت یەهودی بێت ئەوە یەهودی نیە، ئەوەی بە رواڵەت بە گۆشت خەتەنە کراوە بە خەتەنەکراوی هەژمار ناکرێت. ²⁹ بەڵکو یەهودی ئەوەیە لەناخەوە یەهودی بێت، خەتەنەکردن ئەوەیە کە بە دڵ و بە گیان خەتەنە کرابێت نەک بە پیت. ئەوە لەلایەن خەڵکەوە ستایشی بۆنایەت بەڵکو لە خوداوە!