¹ ئێمەی بەهێز لەسەرمانە بەرگەی لاوازی لاوازان بگرین، و خۆمان ڕازی نەکەین. ² با هەریەکەمان هەوڵبدەین بۆ رازیکردنی نزیکەکانمان لە ڕوانگەی چاکەکارییەوە لە رێگەی بنیاتنانەوە. ³ تەنانەت مەسیحیش هەوڵی ڕازی کردنی خۆی نەدەدا، بەڵکو بەگوێرەی ئەوەی کە نووسرابوو: «ڕسوایی ئەوانەی ڕسوات دەکەن کەوتنە سەر من». ⁴ چونکە هەموو ئەوانەی پێشتر نوسراون، بۆ فێرکردنمان نووسراوە، بۆ ئەوەی هیوامان بە پەرتووکی ئارامی و دڵنەوایی هەبێت. ⁵ خودا ئارامگری و دڵنەوایی و تەباییتان پێببەخشێت بەگوێرەی مەسیحی یەشوا، ⁶ تا خودای باوکی پەروەردگارمان یەشوای مەسیح شکۆمەند بکەن، بە یەک دڵ و یەک دەم. ⁷ بۆیە یەکتری پەسەند بکەن، وەک چۆن مەسیح پەسەندی کردین بۆ شکۆمەندی خودا. ⁸ بۆیە دەڵێم مەسیح بوو بە خزمەتکاری خەتەنەکراوان وەک پیشاندانی ڕاستی خودا و پشتڕاستکردنەوەی بەڵێنەکانی بۆ باوکان، ⁹ نەتەوەکان شکۆمەندی خودا دەکەن بۆ بەزەییەکەی، بەگوێرەی ئەوەی نووسراوە: «لەبەر ئەوە لەناو گەلان دانت پێدا بنێن و پەسنی بۆناوت بڵێن!» ¹⁰ هەروەها گوتراوە: «ئەی گەلان، لەگەڵ گەلەکەی دڵشادبن». ¹¹ وە هەروەها: «هەموو گەلان ستایشی پەروەردگار بکەن و با هەموو گەلان سوپاسگوزاری بن». ¹² هەروەها ئیشایا دەڵێت: «لە ڕەگی یەسا دەردەکەوێت، هەڵدەستێت، تا ببێتە سەروەر بەسەر نەتەوەکاندا: گەلان هیوایان بەو دەبێت». ¹³ خودای هیوا پڕتان بکات لە هەموو خۆشیی و ئاشتییەک لە باوەڕتان تا بە هێزی گیانی پیرۆز هیواتان زیاد بکەن. ¹⁴ وە من خۆم لە ئێوە دڵنیام برایان، کە پڕن لە چاکە و پڕن لە هەموو زانیارییەک، هەروەها توانای ئامۆژگاری کردنی یەکتریتان هەیە. ¹⁵ بەڵام بە بوێری زیاترەوە سەبارەت بە هەندێک بابەت بۆم نووسین، بەو بەخششەی کە خودا پێی بەخشیوم. ¹⁶ تاکو ببمە خزمەتکاری یەشوای مەسیح، نێردراو بۆ گەلان، هەڵگری مزگێنی خودا، وەک ئەوەی بە خزمەتی کاهینی هەستم، بە مەبەستی پێشکەش کردنی قوربانی لە نێو نەتەوەکاندا بۆ خودا تاکو پەسەندکراو و پیرۆزکراوبێت بەگیانی پیرۆز. ¹⁷ کەواتە من مافی ئەوەم هەیە شانازی بە یەشوای مەسیحەوە بکەم بەو خزمەتکردنەم کە بۆ خودا دەگەڕێتەوە. ¹⁸ بوێری ئەوەم نیە باسی هیچ شتێک بکەم جگە لەوکارانەی مەسیح لە ڕێگەی منەوە کردوویەتی بۆ ڕێنماییکردنی گەلان بۆ گوێڕایەڵی بە قسە و کردار، ¹⁹ و بە هێزی نیشانەی سەرسوڕهێنەر، و بە هێزی گیانی خودا. بەجۆرێک کە من، لە یورشەلایم و دەوروبەری تا هەرێمی ئیلیریکۆم، بەتەواوی مزگێنی مەسیحم ڕاگەیاند. ²⁰ پێداگریم لەوەکرد مزگێنی لەو شوێنانەدا بدەم کە ناوی مەسیحی تێدا نەهێنراوە، بۆ ئەوەی لەسەر بناغەی یەکێکیتر بنیات نەنێم، ²¹ بەڵکو وەک ئەوەی نووسرابوو: «ئەوانەی مژدەی ئەویان پێنەدرابوو دەبینن و ئەوانەی نەیانبیستبوو تێدەگەن». ²² هەر لەبەر ئەو هۆکارەش ​​زۆرجار ڕێگریم لێ کراوە لە هاتنم بۆ لای ئێوە. ²³ بەڵام ئێستا، لەبەر ئەوەی کە ئیتر شوێنی کارکردنم لەو شوێنانەدا نەماوە، و بە درێژایی ئەو ساڵانە تامەزرۆ بووم بێمە لای ئێوە، ²⁴ کاتێک دەچمە ئیسپانیا هیوادارم بەلای ئێوەدا تێپەڕبم و بتانبینم و ئاسانکاریم بۆ بکەن تا بەردەوام بم لە گەشتەکانم چێژ لە بینینی ئێوە وەردەگرم، تەنانەت ئەگەر بۆ ماوەیەکی کورتیش بێت. ²⁵ بەڵام ئێستا دەچم بۆ یورشەلایم بۆ خزمەتکردنی پیرۆزکراوان. ²⁶ لەبەر ئەوە باوەڕدارانی مەکەدۆنیا و ئەخایا پێیان باش بوو هاوکاری بۆ هەژارانی نێو پیرۆزکراوانی یورشەلایم کۆبکەنەوە. ²⁷ ئەوە بۆ ئەوان باشە کە قەرزاری ئەو پیرۆزکراوانەن: ئەگەر نەتەوەکان بەشدارییان لە شتە گیانییەکانی ئەواندا کردووە، ئەوا دەبێ ئەوانیش لە شتە مادییەکان خزمەتیان بکەن. ²⁸ دوای ئەوەی ئەو ئەرکەم تەواو کرد، و ئەو بەرهەمەم گەیاندە پیرۆزکراوان، بەرەو ئیسپانیا بەڕێدەکەوم، بۆلای ئێوە. ²⁹ وە دەزانم کە کاتێک دێم بۆ لاتان، بە پڕی بەرەکەتی مەسیح دێم. ³⁰ بۆیە برایان،بە پەروەردگارمان یەشوای مەسیح و بە خۆشەویستی گیانی، داواتان لێدەکەم، کە لەگەڵمدا تێبکۆشن لە نزاکردن بۆ خودا لە پێناوی من، ³¹ بۆ ئەوەی ڕزگارم بێت لەو بێباوەڕانەی لە یەهودیان، وخزمەتەکەم بۆ پیرۆزکراوان لە یۆرشەلایم تاکو لای ئەوانیش پەسەند بێت، ³² تا بە خواستی خودا بە خۆشی بێمە لاتان و ببوژێمەوە و پشوو بدەم. ³³ خودای ئاشتی لەگەڵ هەمووتان بێت. ئامین!