¹ کەواتە هاوشێوەی خودا بن وەک منداڵە خۆشەویستەکان، ² وە بە خۆشەویستی ڕەفتار بکەن وەک چۆن مەسیح خۆشی ویستووین و ژیانی خۆی لە پێناوماندا بەخت کرد وەک قوربانییەکی بۆنخۆش پێشکەشی خودای کرد. ³ سەبارەت بە داوێنپیسی، و هەر پیسییەک یان ئارەزوویەکی تێرنەکراو، تەنانەت ناویشی لە نێوانتاندا نەهێنرێت، وەک ئەوەی شایەنی پیرۆزکراوانە. ⁴ بە هەمان شێوە قسەی قێزەون، ناشرین و گاڵتەجاڕی، ئەمانە هەموو نەشیاون. باشترە سوپاسگوزاری خودا دەرببڕیت! ⁵ چونکە ئێوە ئەمە باش دەزانن: هەر داوێنپیسێک یان کەسێکی ناپاک، یان کەسێک کە ئارەزووی تێرنەکراوی هەیە، هیچ نییە جگە لە بتپەرستێک کە هیچ میراتێکی لە شانشینی مەسیح و خودادا نییە. ⁶ با کەس بە قسەی پووچ فریوتان نەدات! بەهۆی ئەم شتانەوە تووڕەیی خودا دەکەوێتە سەر منداڵانی سەرپێچیکار، ⁷ بۆیە،هاوبەشیان مەکەن: ⁸ جاران ئێوە تاریکی بوون، بەڵام ئێستا ئێوە ڕووناکین لە پەروەردگاردا. کەواتە وەک منداڵانی ڕووناکی ڕەفتار بکەن. ⁹ چونکە بەرهەمی ڕووناکی لە هەموو چاکە و ڕاستگۆیی و ڕاستیدایە. ¹⁰ بەم شێوەیە ئەو شتانە ئەزموون دەکەن کە پەروەردگار رازی دەکەن. ¹¹ نەک هەر دەبێ خۆت لە بەشداریکردن لە کردەوە بێهودەکانی تاریکیدا بەدوور بگرێت، بەڵکو دەبێت ئەوانیش ئاشکرا بکەیت. ¹² چونکە ئەو کارانەی کە بە نهێنی دەیکەن، تەنانەت باسکردنیشیان شەرمەزارکەرە. ¹³ هەر شتێک بکەوێتە بەر ڕووناکی، ئاشکرا دەبێت: ¹⁴ چونکە ئەوەی هەموو شتێک ئاشکرا دەکات ڕووناکییە. هەر بۆیە دەوترێت: «ئەی نووستوو بە خەبەربێ، لە ناو مردووان هەستەوە، ڕووناکی مەسیح بەسەرتا ئەدرەوشێتەوە!» ¹⁵ بۆیە زۆر بە وریاییەوە گرینگی بە چۆنیتی هەڵسوکەوتت بدە، نەک وەک نەزانەکان بەڵکو وەک کەسانی ژیر، ¹⁶ باشترین سوود وەر بگرن لە کات، چونکە ڕۆژەکان خراپن. ¹⁷ بۆیە نەزان مەبن، بەڵکو تێبگەن خواستی پەروەردگار چیە. ¹⁸ بە شەراب مەست مەبە، لەناویدا خراپەکارییە، بەڵکو پڕبە لە گیان، ¹⁹ بە زبور و سروود لەگەڵ یەکتر بدوێن، بە دڵتان سروود بۆ پەروەردگار بڵێن؛ ²⁰ لە هەموو کاتێکدا و بۆ هەموو شتێک سوپاسی خودا و باوک بکەن، بەناوی پەروەردگارمان یەشوای مەسیح؛ ²¹ گوێڕایەڵی یەکتر بن لە ترسی مەسیح. ²² ئەی ژنەکان، گوێڕایەڵی مێردەکانی خۆتان بن، وەک چۆن گوێڕایەڵی پەروەردگارن. ²³ مێرد سەری ژنە هەروەک چۆن مەسیح سەری کڵێسایە (جەستەی ئەو)، و خۆی ڕزگارکەری جەستەکەیە. ²⁴ هەر وەک چۆن کڵێسا گوێرایەڵی مەسیح بوو، ژنەکانیش گوێڕایەڵی مێردەکانیان بن، لە هەموو شتێکدا. ²⁵ ئەی مێردەکان، ژنەکانتان خۆشبوێت وەک چۆن مەسیح کڵێسای خۆشدەویست و خۆی لە پێناویدا بەخت کرد، ²⁶ بۆ ئەوەی پیرۆزی بکات و پاکی بکاتەوە بە شۆردنی ئاو، و بە وشەکە، ²⁷ وەک ئەوەی کڵێسایەکی درەوشاوە پێشکەشی خۆی بکات کە هیچ چرچ و لۆچی و کەموکوڕی هاوشێوەی تیانەبێت بەڵکو زیاتر پیرۆز بێت و بێ کەموکوڕی بێت. ²⁸ بەم نموونەیە پێویستە مێردەکان ژنەکانیان وەک جەستەی خۆیان خۆش بوێت. ئەوەی ژنەکەی خۆش بوێت، خۆی خۆش دەوێت. ²⁹ هەرگیز کەس ڕقی لە جەستەی خۆی نییە، بەڵکو خۆراکی پێدەدات و ئاگاداری دەبێت، هەروەک چۆن مەسیحیش لەگەڵ کڵێسادا وادەکات. ³⁰ چونکە ئێمە ئەندامەکانی جەستەی ئەوین. ³¹ بۆیە مێرد سەربەخۆیە لە باوک و دایکی، و لەگەڵ هاوسەرەکەی یەک دەگرن، بۆیە ئەو دووانە دەبنە یەک جەستە. ³² ئەم نهێنییە گەورەیە بەڵام ئاماژەی پێدەکەم بۆ مەسیح و کڵێسا! ³³ بەڵام ئێوەش، هەریەکەتان بە تەنیا، ژنەکەی وەک خۆی خۆش بوێت. سەبارەت بە ژنیش، دەبێ رێز لە مێردەکەی بگرێت.