¹ بۆیە، من کە بەندکراوێکم لە پێناوی پەروەردگاردا، لێتان دەپاڕێمەوە کە بە شیاوی ئەو بانگەوازە هەڵسوکەوت بکەن کە بۆی بانگ کراون، ² بە هەموو خۆنەویستی و نەرم و نیانی و لێبوردەیی، لە خۆشەویستیدا بەرگەی یەکتری بگرن، ³ هەوڵبدەن یەکگرتویی گیانەکە بپارێزن. چونکە یەک جەستە و یەک گیان هەیە، ⁴ هەروەک چۆن بانگتان کراوە، هەمووتان، بۆ یەک هیوا بانگهێشت کراون. ⁵ بۆ ئێوەش یەک پەروەردگار و یەک باوەڕ و یەک لە ئاوهەڵکێشان هەیە. ⁶ یەک خودا و باوکی هەمووان هەیە و ئەو لە سەرووی هەمووان، بۆ هەمووان و لە هەموواندایە. ⁷ بەڵام هەر یەکێک لە ئێمە بەخششێکی پێدراوە کە هاوتایە لەگەڵ ئەوەی کە مەسیح پێی بەخشیوین. ⁸ بۆیە سروش دەفەرموێت: «کاتێک بەرەو هەرەبەرزی سەرکەوت، دیلەکانی لەگەڵ خۆی برد، و دیاریی بە مرۆڤەکان بەخشی!» ⁹ سەبارەت بە ئەمەش «بەرزبۆوە»، ئەمە مانای چییە جگە لەوەی کە ئەویش دابەزیبوو بۆ بەشەکانی خوارەوەی زەوی؟ ¹⁰ ئەو کەسەی دابەزی هەمان ئەو کەسەیە کە لە سەرووی هەموو ئاسمانەکانەوە بەرزبۆوە بۆ پڕ کردنەوەی هەموو شتێک. ¹¹ ئەو ڕێگەی دا هەندێکیان نێردراوان بن، هەندێکیان پێغەمبەر بن، هەندێکیان مزگێنیدر بن و هەندێکیشیان شوان و مامۆستا بن، ¹² بۆ ئامادەکردنی پیرۆزکراوان بۆ خزمەتکردن، بۆ بنیاتنانی جەستەی مەسیح، ¹³ تا هەموومان دەگەینە یەکێتی باوەڕ و یەکگرتویی ناسینی ڕۆلەی خودا، بۆ مرۆڤێکی تەواو پێگەیشتوو، بە ئەندازەی باڵای پڕبوونی مەسیح. ¹⁴ ئەمەش بۆ ئەوەی چیتر منداڵ نەبین بە هەموو بایەکی فێرکاری کە لەسەر بنەمای فریودانی خەڵکە وبەرەو گومڕاییمان دەبات و بەملاو لادا نەمانبات، ¹⁵ بەڵکو بە خۆشەویستییەوە دەست بە ڕاستییەوە دەگرین، بۆ ئەوەی لەهەموو شتێکدا بەرەو ئەو کەسە گەشە بکەین کە سەرە، واتە مەسیح. ¹⁶ هەموو جەستە لە ئەوەوە یەکگرتوویی و پەیوەندیی خۆی بە پاڵپشتی هەر جومگەیەکەوە وەردەگرێت بەپێی بڕی ئەو کارەی کە بۆ هەر بەشێک تەرخانکراوە، بۆ بەرهەمهێنانی گەشەکردن کە دەبێتە هۆی بنیاتنانی جەستە، بنیاتنانی خۆی لە خۆشەویستیدا. ¹⁷ کەواتە ئەمە دەڵێم، ولە پەروەردگاردا شایەتی دەدەم، بەو هیوایەی کە ئێوە چیتر وەک نەتەوەکان لە بێ بەرهەمی بیرکردنەوەدا ڕەفتار نەکەن، ¹⁸ چونکە بە هۆی نەفامی و دڵڕەقییەوە چاویان تاریک و لە ژیانی خودا دوورکەوتوونەتەوە. ¹⁹ ئەم خەڵکە، کە هەموو هەستێکیان فڕێدابووە لایەک، خۆیان ڕادەستی چەواشەکاری کرد هەموو پیسیەکیان بە ئارەزوەیەکی تێرنەکرا و نەکوژاوە ئەنجامدا. ²⁰ سەبارەت بە ئێوەش، بەم شێوەیە فێری مەسیح نەبوون، ²¹ ئەگەر بەڕاستی بیستووتانە و فێرکارییەکەتان وەرگرتووە کە هاوتایە لەگەڵ ئەو ڕاستیەی کە لە یەشوادا هەیە! ²² ئەوەی پەیوەستە بە ژیانی ڕابردووتەوە دایبکەنە: مرۆڤە کۆنەکە بە ئارەزووی فێڵبازانەی خۆی گەندەڵ بووە؛ ²³ وە لە گیانی هزرتاندا نوێ ببنەوە؛ ²⁴ مرۆڤێکی نوێ لەبەر بکەن کە بەدیهاتووە لە سەر شێوەی خودا لە ڕاستودروستی و پیرۆزیدا. ²⁵ بۆیە درۆ مەکەن، و راستگۆ بن لەگەڵ نزیکەکانتان، چونکە ئێمە ئەندامی یەک جەستەین، ²⁶ ئەگەر توڕە بوویت گوناهە مەکە؛ مەهێڵن خۆر بە سەر توورەییتاندا ئاوا بێ، ²⁷ وە دەرفەت بە شەیتان مەدەن! ²⁸ وە ئەو کەسەی کە دزە، با چیتر دزی نەکات، بەڵکو با رەنج بکێشێت و بە دەستەکانی کاری چاکە بکات بۆ ئەوەی شتێکی هەبێت لەگەڵ ئەوانەی کە پێویستیان پێیەتی هاوبەشی پێ بکات. ²⁹ با هیچ قسەیەکی خراپ لە دەمتان دەرنەچێت، بەڵکو تەنها ئەوەی یارمەتیدەرە بۆ بنیاتنانی ئەوانی تر بەپێی پێویستیەکانیان، بۆ ئەوەی سوودی بۆ ئەو کەسانە هەبێت کە گوێیان لێدەگرن. ³⁰ گیانی خودا، گیانی پیرۆز، کە بەهۆیەوە مۆر کرابوون بۆ ڕۆژی ڕزگاربوون، خەمبار مەکەن. ³¹ هەموو ڕق و تۆڵە و توڕەیی و جەنجاڵی و سووکایەتی و هەموو خراپەیەک لە خۆتان دابماڵن. ³² لەگەڵ یەکتر میهرەبان بن، دڵسۆز بن، هەروەک چۆن خودا لە مەسیحدا لێتان خۆش بوو.