¹ تا ئەو کاتەی لە ڕێگەی بەخششی خوداوە ئەم خزمەتەمان هەبێت، ورەمان لاواز نابێت. ² بەڵکو لەم ڕێگایەدا شتە شاراوە و شەرمەزارییەکانمان ڕەتکردۆتەوە، بە فێڵەوە هەڵس و کەوت نایکەین، و وشەی خودا دەستکاری ناکەین، بەڵکو بە ڕاگەیاندنی ڕاستییەکان لە ویژدانی هەموو کەسێکدا، ستایشی خۆمان دەکەین، لەبەردەم خودادا. ³ بەڵام ئەگەر مزگێنیەکەمان داپۆشراو بێت، ئەوا بۆ ئەوانەی لەناو دەچن داپۆشراوە، ⁴ لەناو ئەو بێباوەڕانەدا کە بەهۆی خودای ئەم جیهانە بیرکردنەوەیان کوێر بووە تاوەکو ڕووناکی مزگێنیەکە کە تایبەت بە شکۆمەندی مەسیحە کە وێنەی خودایە بۆیان نەدرەوشێتەوە. ⁵ چونکە ئێمە بانگەشە بۆ خۆمان ناکەین، بەڵکو بانگەشەی یەشوای مەسیح دەکەین وەک پەروەردگار، ئێمە هیچ نین جگە لەخزمەتکارتان لە پێناو یەشوادا. ⁶ چونکە خودا، کە فەرمانی بە ڕووناکی کردووە لە تاریکیدا بدرەوشێتەوە، ئەوە ئەو کەسەیە کە ڕووناکی لە دڵماندا دەدرەوشێنێتەوە، بۆ ئەوەی زانینی شکۆمەندی خودا کە لە ڕووخساری مەسیحدا دەرکەوتووە بدرەوشێتەوە. ⁷ بەڵام ئێمە ئەم گەنجینەیە لەناو گۆزەی گڵینەدا هەڵدەگرین، بۆ ئەوەی ڕوون بێتەوە کە دەسەڵاتی باڵا لە خوداوە دێت و لە ئێمەوە نایەت. ⁸ لە هەموو لایەکەوە کێشەمان هەیە، بەڵام ناڕووخێین. چارەسەرێکی گونجاو نادۆزینەوە، بەڵام بێ ئومێد نابین. ⁹ چەوسانەوە دەربەدەری کردووین، بەڵام خودا وازمان لێناهێنێت.بە زەویدا دەدرێین، بەڵام نامرین. ¹⁰ وە بۆ هەر شوێنێک بچین، هەمیشە مردنی یەشوا لە جەستەماندا هەڵدەگرین بۆ ئەوەی ژیانی یەشواش لە جەستەماندا دەربکەوێت. ¹¹ چونکە ئێمەی زیندوو هەمیشە لە پێناو یەشوادا ڕادەستی مردن دەکرێین، بۆ ئەوەی ژیانی یەشوا لە جەستەی لەناوچووشماندا دەربکەوێت. ¹² بەم شێوەیە، مردن لە ئێمەدا کاریگەرە؛ بەڵام ژیان لە ئێوەدا چالاکە. ¹³ لەبەر ئەوەی ئێمە هەمان گیانی باوەڕمان هەیە، کە لەسەری نووسراوە: «باوەڕم هێنا، بۆیە قسەم کرد»، ئێمەش باوەڕمان هەیە، و بۆیە قسە دەکەین، ¹⁴ ئێمە دەزانین کە ئەوەی یەشوای پەروەردگاری لە مردن هەستاندەوە، ئێمەش لەگەڵ یەشوا هەڵدەستێنێتەوە، و لەبەردەم ئەودا لەگەڵ ئێوەدا ئامادەمان دەکات. ¹⁵ چونکە ئێمە هەموو شتێک لە پێناو ئێوەدا دەچێژین، تاکو ئەو بەخششەی کە ئێستا دەگاتە خەڵکێکی زیاتر، ببێتە هۆی ڕژانی سوپاسگوزاری بۆ شکۆمەندی خودا. ¹⁶ بۆیە، با ورەمان لەدەست نەدەین! بەڵکو، ئەو کاتەی مرۆڤی دەرەوەمان لەناو دەچێت، مرۆڤی ناوەوەمان ڕۆژ بە ڕۆژ نوێ دەبێتەوە. ¹⁷ ئەمەش لەبەر ئەوەیە کە ئەو تەنگانە سادە و کاتییە کە ئێستا بێزارمان دەکەن، ئەو بڕێکی بێئەندازە لە هەتاهەتایی شکۆمەندیمان بۆ بەرهەم دەهێنن. ¹⁸ وەک چۆن چاوەکانمان لە سەر شتە بینراوەکانە با بۆ شتە نەبینراوەکان بڕوانین. چونکە ئەو شتانەی کە دەبینرێن تەنها بۆ ماوەیەکن؛ بەڵام ئەو شتانەی کە نابینرێن هەتاهەتایین.