¹ سەبارەت بەو قوربانیانەی پێشکەش بە بتەکان دەکرێت، ئێمە دەزانین و بۆ هەموومان زانراوە. زانین لووتبەرز دەکات، بەڵام خۆشەویستی بنیات دەنێت. ² هەرکەسێک پێی وایە شتێک دەزانێت، هێشتا هیچ شتێک بە ڕاستی نازانێت. ³ بەڵام هەرکەسێک خودای خۆش بوێت، خودا دەیناسێت. ⁴ سەبارەت بە خواردنی قوربانی بتەکان، دەزانین کە بت خودایەک نییە کە لە گەردووندا بوونی هەبێت، و تەنها یەک خودا هەیە. ⁵ تەنانەت ئەگەر بەناو خوداوەندەکان لە ئاسمان یان لەسەر زەوی هەبن و چەند خوداوەند و پەروەردگاریان هەیە! ⁶ ئێمە تەنها یەک خودامان هەیە کە باوکە، کە هەموو شتەکان لێیەوە سەرچاوە دەگرن، و ئێمەش لە ئەوین؛ یەک پەروەردگار هەیە، یەشوای مەسیح، کە هەموو شتێک و ئێمە بە ئەو هەین. ⁷ بەڵام هەموو کەس ئەم ڕاستییە نازانێت: هەندێکیان خوویان گرتووە بەوەی کە بتەکان لە ڕاستیدا بوونیان هەیە، و هێشتا لەو قوربانییانە دەخۆن وەک ئەوەی لە ڕاستیدا پێشکەشییەک بن بۆیان، بۆیە ویژدانیان پیس دەبێت بەهۆی لاوازیەکانیانەوە. ⁸ بەڵام خواردن لە خودا نزیکمان ناکاتەوە، ئەگەر لێی بخۆین پێگەمان بەرز نابێتەوە، وە ئەگەر لێی نەخۆین پێگەمان کەم نابێتەوە! ⁹ بەڵام ئاگاداربن ئەم مافەی ئێوە نەبێتە تەڵەیەک کە لاوازەکان بکەونە ناویەوە. ¹⁰ ئەی مرۆڤی زانا، ئەگەر کەسێک بینیتی دانیشتوویت بۆ خواردن لە پەرستگای بتەکان، ئایا ویژدانی لاوازی بەهێز نابێت، بۆ خواردنی لە قوربانیی بتەکان، ¹¹ بەم شێوەیە ئەو کەسە لاوازە، کە برای تۆیە کە مەسیح لە پێناویدا مرد، بەهۆی زانیاری تۆ لەناو دەچێت! ¹² کاتێک بەم شێوەیە گوناهە دەکەیت بەرامبەر براکانت و ویژدانی لاوازیان بریندار دەکەیت، ئەوا گوناهە دەکەیت دژی مەسیح. ¹³ بۆیە ئەگەر هەندێک خواردن تەڵەیەک بێت بۆ ئەوەی براکەم بکەوێتە ناویەوە، ئەوا هەرگیز گۆشت ناخۆم، بۆ ئەوەی نەبمە هۆی کەوتنی براکەم!