¹ با خەڵک وەک خزمەتکاری مەسیح و بریکاری نهێنییەکانی خودا ببینن. ² ئەوەی لە بریکارەکان داوا دەکرێت، لە پێش هەموو شتێکەوە، ئەوەیە کە هەریەکەیان دڵسۆز بێت. ³ سەبارەت بە منیش کەمترین شت کە گرنگی پێدەدەم ئەوەیە کە لە پێش ئێوە یان دادگایەکی مرۆڤانە دادگایی بکرێم. بەڵکو من بڕیار لەسەر خۆم نادەم. ⁴ ویژدانم من تاوانبار ناکات بۆ هیچ شتێک، بەڵام پشت بەوە نابەستم بۆ ئەوەی پاساو بۆ خۆم بهێنمەوە. چونکە ئەوەی بڕیارم لەسەر دەدات پەروەردگارە. ⁵ بۆیە، پێشوەختە بڕیار لەسەر هیچ شتێک مەدەن، تا پەروەردگار دەگەڕێتەوە کە ڕۆشنایی دەخاتە سەر ئەو شتانەی کە ئێستا لە تاریکیدا شاردراونەتەوە، و نیازی دڵەکان ئاشکرا دەکات، ئەو کاتە هەموو کەسێک مافی ستایشی خۆی لە خوداوە وەردەگرێت! ⁶ برایان لە ڕابردوودا، خۆم و ئەپۆلۆسم وەک نموونەیەک بۆ ئێوە پێشکەش کرد، بۆ ئەوەی لە ڕێگەی ئێمەوە فێربن بیرکردنەوەکانتان لە سەرووی ئەوەی نووسراوەوە دانەنێن، لەبەر لایەنگری لەگەڵ کەسدا شانازی بە یەکترەوە مەکەن. ⁷ کێ تۆی لە کەسانی تر جیاکردۆتەوە؟ وە هی تۆ چییە کە بە دیاری وەرت نەگرت؟ مادام وەرتگرتووە، بۆچی وا خۆت پیشان ئەدەیت وەک ئەوەی وەرت نەگرتبێت؟ ⁸ ئێوە تێر و دەوڵەمەند بوون! ئێوە بوون بە پاشا و وازتان لێ هێناین! خۆزگە بەڕاستی ئێوە پاشا بوونایە تا ئێمەش لەگەڵ ئێوە فەرمانڕەوایمان بکردایە! ⁹ چونکە من دەبینم کە خودا، ئێمەی نێردراوان، لە کۆتایی کاروانەکەدا وەک ئەوەی بە مردن سزا درابین، نمایشی کرد، چونکە بووین بە نمایشێک بۆ جیهان، بۆ فریشتەکان و مرۆڤەکان پێکەوە. ¹⁰ ئێمە لە پێناو مەسیحدا بوین بە گێل، بەڵام ئێوە لە مەسیحدا دانان. ئێمە لاوازین و ئێوەش بەهێز. ئێوە ڕێز لێگیراو و ئێمەش سوکایەتی پێکراو. ¹¹ تا ئەمڕۆش برسی و تینوو و ڕووتین و لێماندراوە، و لە شوێنی مانەوەش بێبەشین ¹² تێدەکۆشین و بەدەستەکانمان کار دەکەین. سوکایەتیمان پێدەکرێت و داوای بەرەکەت دەکەین و دەمان چەوسێننەوە و بەرگە دەگرین ¹³ ئەگەر بریندار بووین ئارام دەبین. ئێمە وەک پیسی جیهان و زبڵ و خاشاکی هەمووان بووین، و ئێستاش هەر واین! ¹⁴ من ئەمە بۆ شەرمەزارکردنتان نانووسم، بەڵکو بۆ ئاگادارکردنەوەتان وەک منداڵە خۆشەویستەکانم. ¹⁵ لەوانەیە دە هەزار ڕابەرت هەبێت لە مەسیحدا، بەڵام باوکانت زۆر نییە! لەبەر ئەوە لە یەشوای مەسیحدا من بووم بە باوکتان لە ڕێگەی مزگێنیەکەوە. ¹⁶ بۆیە داوتان لێدەکەم ئەوە بکەن کە من دەیکەم. ¹⁷ هەر لەبەر ئەمەش تیمۆساوس، کوڕە خۆشەویست و دڵسۆزەکەم لە پەروەردگاردا ناردە لاتان، چونکە ئەو ڕێگایانەتان بیردەخاتەوە کە لە مەسیحدا پێیدا ڕۆیشتم، وەک چۆن لە هەموو شوێنیک و کڵێساکان ئاوا فێردەکەم. ¹⁸ چونکە هەندێکتان پێیان وابوو کە نایەمە لای ئێوە و لە خۆبەزلزانینەوە خۆیان گەورە کرد! ¹⁹ بەڵام ئەگەر خودا بیەوێت، بە خێرایی دێم بۆ لاتان، و نەک قسەی ئەم خۆبەزلزانانە بەڵکو تواناشیان تاقی دەکەمەوە. ²⁰ چونکە شانشینی خودا بە قسە نییە، بەڵکو بە دەسەڵاتە. ²¹ چۆنتان پێ باشە من بێمە لاتان: بە گۆچان یان بە خۆشەویستی و گیانی نەرم و نیانی؟