¹ بەڵام برایان ئەو مزگێنیەتان، بیردەخەمەوە کە بۆم ڕاگەیاندوون، وەرتانگرت و بەردەوام پێوەی پابەندن، ² هەروەها بەوە ڕزگارتان دەبێت، ئەگەر دەست بەو وشەیەوە بگرن کە بۆم ڕاگەیاندن، ئەگینا باوەرتان بێهودەیە. ³ لە ڕاستیدا، من یەکەم شت، ئەوەی وەرمگرت، ڕادەستی ئێوەم کرد، ئەویش ئەوەیە کە مەسیح لە پێناو گوناهەکانماندا مرد بەپێی ئەوەی لە تەورتدا هاتووە، ⁴ ئەو نێژرا، و لە ڕۆژی سێهەمدا هەستایەوە بەپێی ئەوەی لە تەوراتدا نووسراوە، ⁵ وە ئەو بۆ پەترۆ دەرکەوت، و پاشان بۆ قوتابییەکانی تریش. ⁶ دوای ئەوە بەیەکەوە بۆ زیاتر لە پێنج سەد برا دەرکەوت کە زۆربەیان لە ژیاندا ماون، و ئەوانی تر مردوون. ⁷ پاشان بۆ یاکۆڤ دەرکەوت، دوای ئەوەش بۆ هەموو نێردراوان. ⁸ پاش هەموویان، بۆ منیش دەرکەوت، وەک ئەوەی مناڵێک بم کە لە کاتێکی هەڵەدا لەدایک بووم! ⁹ چونکە من بچووکترینی نێردراوانم، شایەنی ئەوە نیم پێم بڵێن نێردراو چونکە کڵێسای خودام چەوساندۆتەوە. ¹⁰ بەڵام، بە بەخششی خودا بوومە ئەوەی ئێستام، و ئەو بەهرەیەی کە وەرمگرت بێهودە نەبوو، چونکە لە هەموو نێردراوانی دیکە زیاتر ماندوو بووم. بەڵام ئەوە من نەبووم کارم دەکرد، بەڵکو بەخششی خودا بووم کە لەگەڵمدا بوو. ¹¹ جا من بم یان ئەوان، ئێمە بەم شێوەیە بانگەواز دەکەین، ئێوەش بەم شێوەیە باوەڕتان هێنا. ¹² ئێستا مژدەی ئەوە دەدرێت کە مەسیح لە مردن هەستایەوە، چۆن هەندێکتان دەڵێن هەستانەوەی مردووەکان نییە؟ ¹³ ئەگەر هەستانەوەی مردووەکان بوونی نەبێت، ئەمە مانای ئەوەیە کە مەسیحیش هەڵنەستاوەتەوە! ئەگەر مەسیح هەڵنەستابێتەوە، ¹⁴ بانگەشەی ئێمە بێهودە دەبوو و باوەڕکەشتان بێهودە دەبوو، ¹⁵ ئەو کاتە ئەوە ڕوون دەبۆوە کە ئێمە شایەتحاڵی درۆین بۆ خودا، چوونکە شایەتی ئەوەماندا کە مەسیح لە مردن هەستاوەتەوە، ئەگەر ئەو هەڵنەستایەتەوە ڕاست دەبوو مردووەکانیش هەڵنەدەستانەوە. ¹⁶ بۆیە ئەگەر مردووەکان هەڵنەستێنەوە، ئەوا مەسیحیش هەڵنەستاوەتەوە. ¹⁷ ئەگەر مەسیح هەڵنەستایەتەوە، باوەڕەکەت بێهودە دەبوو، و هەر لە گوناهەکانتدا دەمایتەوە، ¹⁸ ئەگەر وابێت ئەوانەی لەگەڵ مەسیح یەکیان گرت لەناو دەچوون! ¹⁹ ئەگەر هیوامان بە مەسیح تەنها بەم ژیانە سنووردار بووایە، لە هەموو مرۆڤەکان بەدبەختر دەبووین! ²⁰ بەڵام ئێستا مەسیح لە مردن هەستایەوە نۆبەرەی نوستووەکانە. ²¹ بەو پێیەی مردن لە مرۆڤەوە هاتووە، هەستانەوەی مردووەکانیش بە مرۆڤ دەبێت. ²² چونکە هەمووان لە ئادەمدا مردن، هەمووان لە مەسیحدا زیندوو دەکرێنەوە، ²³ بەڵام هەریەکە پلەی تایبەتی خۆی هەیە یەکەم: مەسیح وەک نۆبەرە؛ پاشان کە گەڕایەوە ئەوانەش کە هی خۆین، ²⁴ پاشان کۆتایی دێت کاتێک شانشینی ڕادەستی خودای باوک دەکات دوای ئەوەی هەموو دەسەڵات و هێزێکی لەناوبرد. ²⁵ دەبێت پاشایەتی بکات «تا هەموو دوژمنەکانی بخاتە ژێر پێیەکانیەوە». ²⁶ دوا دوژمن کە لەناو دەچێت مردنە. چونکە «هەموو شتەکانی خستە ژێر پێیەکانیەوە». ²⁷ بەڵام لە وتنی ئەوەی کە هەموو شتەکان ملکەچی بوون، بە ڕوونی خودا بەدەر دەکات کە هەموو شتێکی ملکەچی ڕۆڵەکە کردووە. ²⁸ کاتێک هەموو شتێک لە ژێر دەسەڵاتی ئەودایە، ڕۆڵە خۆی دەخاتە ژێر دەسەڵاتی خوداوە، بەجۆرێک خودا کە دەسەڵاتی بەسەر هەموو شتێکدا بە ڕۆڵەکە بەخشی، بە تەواوی باڵادەست دەبێت بەسەر هەموو شتێک و لە هەموو شتێکدا! ²⁹ ئەگەر ئێستا، هەستانەوە لە مردن نەبێت، ئەوانەی بۆ مردووەکان لە ئاوهەڵدەکێشرێن چی دەکەن؟  ئەگەر مردووەکان بە هیچ شێوەیەک هەڵنەستنەوە، بۆچی خەڵک لە ئاو هەڵدەکێشرێن؟ ³⁰ بۆچی هەموو کاتێک خۆمان دەخەینە مەترسییەوە؟ ³¹ برایان، لەبەر ئەوەی شانازیتان پێوە دەکەم لە یەشوای مەسیحی پەروەردگارماندا، شایەتحاڵی ئەوە دەدەم کە هەموو ڕۆژێک دەمرم! ³² ئەگەر لە ئەفسوس شەڕم لەگەڵ دڕندە کێوییەکان کردبێت و لە هیوای مرۆڤانە زیاترم نەبێ، چیم دەستکەوتووە؟ ئەگەر مردووەکان زیندوو نەکرێنەوە، «با بخۆین و بخۆینەوە، چونکە سبەی دەمرین؟» ³³ بەڕێگەی گومڕایدا مەڕۆن: پەیوەندی خراپ ڕەوشتی باش گەندەڵ دەکات! ³⁴ وەک پێویستە بگەڕێنەوە بۆ ئەوەی ڕاستە و گوناهە مەکەن، چونکە هەندێکتان بە تەواوی بێ ئاگان لە خودا، ئەمە دەڵێم بۆ ئەوەی شەرمەزار بن! ³⁵ بەڵام ڕەنگە کەسێک بڵێت: چۆن مردووەکان هەڵدەستنەوە؟ بە چ جەستەیەک دەگەڕێنەوە؟» ³⁶ ئەی بێ ئاگا! ئەوەی دەیچێنیت تا نەمرێت ناژی. ³⁷ ئەوەی دەیچێنیت ئەو جەستەیە نییە کە سەرهەڵدەدات بەڵکو تەنها دەنکە گەنمێکە بۆ نموونە تۆوێکی تر. ³⁸ پاشان خودا ئەو جەستەیەی پێدەبەخشێت کە خۆی دەیەوێت، هەروەک چۆن هەر جۆرە تۆوێک جەستەی خۆی دەداتێ. ³⁹ هەموو جەستەیەک وەکو یەک نییە بەڵام مرۆڤەکان جەستەیەکیان هەیە و ئاژەڵەکان جەستەیەکی دیکە ماسی جەستەیەکی دیکە و باڵندەکانیش جەستەیەکی دیکەیان هەیە. ⁴⁰ پاشان جەستەی ئاسمانی و جەستەی زەمینی هەیە. بەڵام جەستە ئاسمانییەکان شکۆمەندییان هەیە، جەستە زەمینیەکانیش شکۆمەندییەکی جیاوازیان هەیە. ⁴¹ خۆر شکۆمەندییەکی هەیە، و مانگ شکۆمەندییەکی دیکە، ئەستێرەکانیش شکۆمەندییەکی جیاوازیان هەیە، چونکە هەر ئەستێرەیەک لە شکۆمەندییەکەیدا جیاوازە لە ئەستێرەکەی تر. ⁴² بۆ هەستانەوەی مردووانیش بە هەمان شێوە دەبێت: بە جەستەی فەوتاو دەچێنرێت، بە نەفەوتاوی هەڵدەستێنرێتەوە، ⁴³ بە شەرمەزاری دەچێنرێت، و بە شکۆمەندییەوە هەڵدەستێتەوە، بە لاوازی دەچێنرێت، و بەهێزەوە هەڵدەستێتەوە، ⁴⁴ وەک جەستەیەکی ماددی دەچێنرێت، و وەک جەستەیەکی گیانی هەڵدەستێتەوە. بەو پێیەی جەستەیەکی مادی هەیە، جەستەیەکی گیانیش هەیە. ⁴⁵ بەم شێوەیەش نووسراوە: «مرۆڤی یەکەم، ئادەم، بوو بە گیانێکی زیندوو» بەڵام ئادەمی کۆتایی گیانێکی ژیان بەخشە. ⁴⁶ ​​بەڵام گیانییەکە یەکەم نەبوو، بەڵکو مادییەکە یەکەم جار هات پاشان گیانییەکە: ⁴⁷ مرۆڤی یەکەم لە خۆڵی زەوی درووست بوو؛ سەبارەت بە مرۆڤی دووهەم لە ئاسمانەوە بوو. ⁴⁸ ئەوانەی لە خۆڵن، لەو کەسە دەچن کە لە خۆڵ درووست بووە، ئاسمانییەکانیش لەو کەسە دەچن کە لە ئاسمانەوە هاتووە. ⁴⁹ هەروەک چۆن وێنەی ئەومان وەرگرتوە کە لە خۆڵ دروستکراوە، بەهەمان شێوە وێنەی ئاسمانیش وەردەگرین. ⁵⁰ پاشان برایان، دڵنیاتان دەکەمەوە، کە جەستەی گۆشت و خوێن ناتوانێت ببێتە میراتگری شانشینی خودا، هەروەک چۆن فەوتاو ناتوانێت ببێتە میراتگری نەفەوتاو. ⁵¹ لێرەدا نهێنییەکتان بۆ ئاشکرا دەکەم: ئێمە نامرین، بەڵکو هەموومان دەگۆڕدرێین، ⁵² لە ساتێکدا، بەڵکو لە چاوتروکانێکدا کاتێک دوا کەڕەنا لێدەدرێت. لەبەر ئەوەی کەڕەناکە لێدەدرێت، مردووانیش بێ فەوتان هەڵدەستێنرێنەوە. بەڵام ئێمە دەگۆڕدرێین. ⁵³ چونکە هەر دەبێت ئەم جەستە فەوتاوە نەفەوتاوی بپۆشێت، و لەناوچوو دەبێت نەمری بپۆشێت. ⁵⁴ دوای ئەوەی فەوتاو نە فەوتاوی پۆشی، و لەناوچووش نەمری، ئەو وشەیەی کە نووسرابوو دێتەدی: «مردن لە سەرکەوتندا قووت دەدرێت!» ⁵⁵ ئەی مردن، لەکوێیە، پێوەدانت؟ ئەی مردن، لەکوێیە سەرکەوتنت؟ ⁵⁶ جا پێوەدانی مردن گوناهەیە، هێزی گوناهەش تەوڕاتە. ⁵⁷ بەڵام سوپاس بۆ خودا بە یەشوای مەسیحی پەروەردگارمان سەرکەوتنمان پێدەبەخشێت! ⁵⁸ بۆیە، برا خۆشەویستەکانم، چەسپاو بن و خۆڕاگربن، بەردەوام تێبکۆشن لە کاری پەروەردگاردا، دەزانن کە تێکۆشانتان لە پەروەردگاردا بە فیڕۆ ناڕوات!