¹ سەبارەت بە کۆکردنەوەی بەخشین بۆ پیرۆزکراوان، وەک چۆن کڵێساکانی هەرێمی گەلاتیام ڕاسپاردوە، ئێوەش هەروا بکەن. ² لە یەکەم ڕۆژی هەفتەدا، پێویستە هەریەک لە ئێوە ئەوەی لە تواناتاندایە لەو پارەیەی کە بەدەستی دەهێنن بیخەنە لایەک؛ با لای خۆی بیهێڵێتەوە، بۆ ئەوەی لەو کاتەدا کۆنەکرێتەوە کە دێمە لای ئێوە. ³ لە کاتی گەیشتنم، هەرکەسێکتان پێ خۆشە لەوەی پەسەند کراوە کە بە میهرەبانییەوە دابینتان کردووە بیبەن بۆ یۆرشەلایم، دوای ئەوەی نامەیان بۆ دەنێرم. ⁴ ئەگەر بۆم گونجا بوو دەتوانن لەگەڵمدا بێن. ⁵ بەڵام کاتێک بە هەرێمی مەکەدۆنیادا تێدەپەڕم، دێمە لای ئێوە، ⁶ ڕەنگە ماوەیەک لەگەڵتان بەسەر بەرم، یان ڕەنگە تەواوی زستانەکە لەگەڵتان بم پاشان ڕێگەی گەشتەکەم بۆ ئاسان بکەن بۆ هەر شوێنێک کە دەچم. ⁷ نامەوێت ئەمجارە وەک ڕێبوارێک سەردانتان بکەم، هیوادارم ماوەیەکی زۆر لەگەڵتان بمێنمەوە ئەگەر پەروەردگار ڕێگە بدات. ⁸ بەڵام تا ڕۆژی پەنجاهەمین (واتە جەژنی دروێنەی یەهودییەکان) لە ئەفەسۆس دەمێنمەوە. ⁹ چونکە دەرگایەکی گەورە و کاریگەرم بۆ کراوەتەوە، و ئەوانەی دژایەتیم دەکەن زۆرن! ¹⁰ ئەگەر تیمۆساوس گەیشتە لاتان، گرنگی پێبدەن و با لەلاتان دڵنیابێت، چونکە وەک من کاری پەروەردگار دەکات. ¹¹ با کەس بە کەمی نەزانێت، بەڵکو ڕێگەی بۆ ئاسان بکەن تا بە ئاشتی بگەڕێتەوە بۆ لای من، چونکە من چاوەڕێی گەیشتنی ئەوم، لەگەڵ برایان. ¹² سەبارەت بە ئەپۆلۆسی برا، زۆر لێی پاڕامەوە کە یاوەری براکان بێت بۆ هاتنە لای ئێوە. بەڵام، نەیویست ئێستا بێت. بەڵام کاتێک دەرفەتی گونجاوی بۆ ڕەخسا دێتە لاتان. ¹³ بە ئاگابن و وریابن. لە باوەڕدا چەسپاوبن. پیاوبن. بە هێزبن. ¹⁴ وە هەر کارێک دەیکەن، بە خۆشەویستییەوە بیکەن. ¹⁵ بەڵام برایان، ئەم داوایەتان لێ دەکەم: ئێوە بنەماڵەی ستیفاناس دەناسن، نۆبەرەی ئەخایایە، خۆیان تەرخان کردووە بۆ خزمەتکردنی پیرۆزکراوان. ¹⁶ جا ملکەچی ئەوان و کەسانی دیکەی هاوشێوەی ئەوان بن، و هەرکەسێک کە بە کۆششەوە کاریان لەگەڵ دەکەن. ¹⁷ زۆر دڵخۆش بووم بە هاتنی ستیفاناس و فۆرتوناتۆس و ئەخایکۆس. چونکە شوێنی ئێوەیان گرتەوە. ¹⁸ گیانی من و تۆیان بووژاندەوە. شایەنی ئەو جۆرە پێزانینەن! ¹⁹ کڵێساکانی هەرێمی ئاسیا سڵاوتان لێدەکەن. بە گەرمی سڵاوتان لێدەکەن لە پەروەردگاردا، ئەکیلا و پریسکیلا، لەگەڵ کڵێساکەیان کە لە ماڵەکەیاندایە. ²⁰ هەموو براکان سڵاوتان لێدەکەن. بە ماچێکی پاک سڵاو لە یەکتر بکەن. ²¹ سڵاوتان لێدەکەم، من پۆڵس، بە دەستنووسی خۆم. ²² ئەگەر کەسێک پەروەردگاری خۆش نەویست، با «أناثيما» بێت (واتە نەفرەت لێکراو)! «ماراناسا» ( ئەی پەروەردگارمان وەرە)! ²³ بەخششی پەروەردگار یەشوای مەسیح لەگەڵتان بێت! ²⁴ خۆشەویستیم بۆ هەمووتان لە یەشوای مەسیحدا! ئامین.