¹ وەک من بکەن هەروەک چۆن منیش وەک مەسیح دەکەم! ² ستایشتان دەکەم چونکە لە هەموو بابەتێکدا یادم دەکەن و فێرکارییەکان دەپارێزن وەک چۆن من پێم گەیاندوون. ³ بەڵام دەمەوێت بزانن کە مەسیح سەری هەموو پیاوێکە؛ سەری ژنیش پیاوە، سەری مەسیحیش خودایە. ⁴ هەر پیاوێک نزا بکات یان پێشبینی بکات. بە سەری داپۆشراو، ئەوە شەرمەزاری بەسەر خۆیدا دەهێنێت. ⁵ هەر ژنێک نزا بکات یان پێشبینی بکات، بەبێ داپۆشینی سەری، شەرمەزاری بەسەر خۆیدا دەهێنێت، وەک سەر تاشراوێک. ⁶ ئەگەر ژن سەری دانەپۆشێت، با قژی ببڕێت! بەڵام، ئەگەر بۆ ژن شەرمەزارییە قژی ببڕێت یاخود بیتاشێت، با سەری داپۆشێت. ⁷ ئەمەش لەبەر ئەوەیە کە پیاو نابێت سەری داپۆشێت، چونکە وێنە و شکۆمەندی خودایە. سەبارەت بە ژنیش، ئەو شکۆمەندی پیاوە. ⁸ چونکە پیاو لە ژنەکە وەرنەگیرا، بەڵکو ژنەکە لە پیاوەکە وەرگیرا؛ ⁹ پیاو لە پێناو ژندا بوونی نەبووە، بەڵکو ژن لە پێناو پیاودا بوونی هەبووە. ¹⁰ بۆیە ئافرەت دەبێت دەسەڵات لەسەر سەری بێت، لەبەر فریشتەکان. ¹¹ بەڵام لە پەروەردگاردا ژن بێ پیاو نییە، و پیاویش بێ ژن نییە. ¹² هەروەک چۆن ژن لە پیاو وەرگیراوە، پیاویش لەلایەن ژنەوە تەواو دەکرێت، بەڵام هەموو شتێک لە خوداوەیە. ¹³ کەواتە بۆ خۆتان بڕیار بدەن: ئایا گونجاوە ژن بە سەری دانەپۆشراو نزا بۆ خودا بکات؟ ¹⁴ ئایا سروشت خۆی فێرتان ناکات کە شەرمەزارییە بۆ پیاو کە قژی درێژ بکاتەوە، ¹⁵ لەکاتێکدا ئافرەتێک قژی درێژبێت بۆی جێگای شانازییە، چونکە قژ وەک داپۆشەرێک پێی دراوە. ¹⁶ بەڵام ئەگەر کەسێک بیەوێت ناکۆکی نیشان بدات، نە ئێمە داب و نەریتی وامان هەیە نە کڵێساکانی خوداش! ¹⁷ بۆیە لە سەرمە، بەردەوام بم لە ڕاسپاردنتان بەمە، ستایشتان ناکەم، چونکە کۆبوونەوەکانتان زیانی زیاترە لە سوود. ¹⁸ سەرەتا بیستم، کە کاتێک کۆمەڵەکەت کۆدەبێتەوە، ناتەبایی لە نێوانتاندا دروست دەبێت. ¹⁹ باوڕدەکەم کە ڕاست بێت، بێگومان دەبێت لەنێوانتاندا جیاوازی هەبێت، تاکو شایستەکان لە نێوانتاندا دەربکەون. ²⁰ کاتێک لە یەک شوێن کۆدەبنەوە، کۆنابنەوە بۆ خواردنی خوانی پەروەردگار، ²¹ چونکە هەرکەسێک پێش دەکەوێت بۆ خواردنی ژەمی ئێوارەی خۆی، بۆیە یەکێکیان برسی دەمێنێتەوە، ئەوی تریان دەخواتەوە تا سەرخۆش دەبێت! ²² ماڵتان نییە بۆ خواردن و خواردنەوە؟ یان سووکایەتی بە کڵێسای خودا دەکەن و سوکایەتی بەو کەسانە دەکەن کە هیچیان نییە؟ چیت پێ بڵێم؟ ستایشتان بکەم؟ بۆ ئەمەش ستایشی ئێوە ناکەم! ²³ چونکە ئەوەی بە ئێوەم بەخشیوە لە پەروەردگار وەرمگرتووە. ئەوەیە کە یەشوای پەروەردگار، ئەو شەوەی بە گرتن درا، نانێکی هەڵگرت، ²⁴ سوپاسی کرد، پاشان نانی شکاند و فەرمووی: « ئەمە جەستەی منە کە لە پێناوی ئێوەدا دەشکێت ئەمە بکەن بۆ یادی من». ²⁵ بەهەمان شێوە دوای نانخواردن، جامەکەی هەڵگرت و فەرمووی: «ئەم جامە پەیمانی نوێیە بە خوێنی من ئەمە بکەن و بیخۆنەوە، بۆ یادی من». ²⁶ بۆیە هەرکاتێک ئەم نانەتان خوارد و ئەم جامانەتان خواردەوە، مردنی پەروەردگار ڕادەگەیەنن، تا دەگەڕێتەوە. ²⁷ هەرکەسێک لە نانەکە بخوات، یان لە جامەکەی پەروەردگار بخواتەوە بە شێوەیەکی ناشایستە، تاوانبار دەبێت بەرامبەر بە جەستە و خوێنی پەروەردگار. ²⁸ بەڵام با مرۆڤ خۆی بپشکنێت، پاشان لە نانەکە بخوات و لە جامەکە بخواتەوە. ²⁹ ئەوانەی دەخۆن و دەخۆنەوە ئەگەر جەستەی مەسیح نەناسن خۆیان تاوانبار دەکەن. ³⁰ لەبەر ئەم هۆکارە زۆرێک لە ئێوە لاواز و نەخۆشن، زۆریش وەک نوستوو وان. ³¹ ئەگەر خۆمان دادوەری خۆمان بین، بڕیارمان لەسەر خۆمان نە دەدا. ³² بەڵام، لەبەر ئەوەی دادوەریمان لەسەر کراوە، لەلایەن پەروەردگارەوە تەمبێ دەکرێین بۆ ئەوەی لەگەڵ جیهاندا تاوانبار نەکرێین. ³³ براکانم کاتێک کۆدەبنەوە بۆ خواردن چاوەڕێی یەکتر بن. ³⁴ ئەگەر کەسێک برسی بوو با لە ماڵەوە نان بخوات، بۆ ئەوەی کۆبوونەوەکەتان بۆ دادوەریتان نەبێت. سەبارەت بە پرسەکانی تریش کە هاتم ڕێکیان دەخەم.