¹ Napoaton Jerobaal (inaso Gedeón) tahuëririahuaso' huanirahuaton, ya'ipi piyapi'sa, inarë ya'huëarinsopita', inapitarë pasahuatona. Harod isha anoirinsa' no'tënanquë' ya'huëconpi. Madian no'sa tanponëná, quëparitërin pi'i ya'coninso' parti, ishanaro'sa nicotoanaquë', quëpariti'ipi, inaso More tanan ya'caria. ² Gedeón Señor sha'huitërin: "No'toaro' sontaro'sa ya'huëtërinquën ni'ton, co carin quënso' cataparanhuë', Madian no'sa minsëcaso' marë', ama Israiro'sa ca nitochinachin inahuara ni payatatona', isopochin nonacaiso' marëhuë': Canpoara' chiniro'huinënpoaran, ni cha'ërëhua, tëcacaiso' marëhuë. Iterin. ³ Napoaton iporaso, piyapisa sha'huitëquë na'tai'ina', insosona' ina natanaton, payanaton ropatohuachin, tananpitoco, Galaad, tananquëran ayantai'ina'. Ina natanatoná, cato shonca ca'to huaranca piyapisa payanatoná ropatopi, inapita ayamantapi shonca huaranca quëparitopi. ⁴ Gedeón Señor na'quëranchin itantarin, "Aquëtëhuarë na'con na'con ya'huarin ni'ton. Quëpaquë' i'sha o'oina, inaquë huayantaranquën caraya. Isopita quëmarëquën, pasarin itohuatanquën, quëmarëquën pa'sarin, nicapono coquëmarë isopita pa'sarinhuë, itohuatënquën, co inahuaso' pasarinhuë". ⁵ Napopachiná Gedeóni, quëparin ishaquë' Señor camairin ni'ton, inaso Señor sha'huitërin, "Pi'paitatona' i'sha o'opisopita, ya'ipi nisha chihuincaquë, ni'nira i'sha o'opisopita, ya'ipi nisha chihuincaquë, ninira i'sha o'orinso pochi ni'pisopita', isonatona' o'opisonta'". ⁶ Cara pasa piyapi'sa pi'paitatona' o'opi. Anapita piyapisa'so' isonatona' i'sha o'opi. ⁷ Gedeón Señor sha'huitantarin, "Cara pasa piyapisa pi'paitatona' i'sha o'opisopitarëquën, carinquën cataparanquën, minsëcaso' marë'. Madian no'sa, tananpitëquë', anapita quëmapisa'so tahuërërahuatona', panantaina ya'huëpiquë'". ⁸ Napoaton insopitasona', huayonpisapita, cosharonëna' masahuatona' pihuipisonta mapi. Gedeonso, anapita Israirosa quëmapisa, ya'ipi aparin, anayen anayen quëmapisa nëmëtëquëran tanpotopiquëpa, na'poaponahuë' cara pasa quëmapisarë' quëparitërin. Iporaso nipirinhuë, Madian no'saso tanponëna pëna pënatë pochin quëparitërin, canonamëtë parti. ⁹ Naporo' tashi chachin, Gedeón Señor itapon: "¡Huanirahuaton! Paaton Madian nosa ahuëquë, na'pohuaton carinquën catahuaranquën, inahuaro'sa minsëcaso' marë. ¹⁰ Ni'pirinhuë, ahuëtamaso' tëhuatohuatanso, pamaquë piyapinën parinëquën Furarëquën tanpopa, ¹¹ na'tanquë' inahua tosapiso, ina natanhuatan aquëtëhuarë, achi'iniarinën. Ahuëcaso' marë Madian nosa". Napoaton Gedeonso', Furarë pa'marin, sontaro'sa ninatopiso' tanponënaquë'. ¹² Madian nosa, Amalecitas rosa, isopita piyapiro'sa, mo'topi i'shanaro'sa ni'cotoana' shonsanquë', niacora'piapi; inahuasa sëquërë' na'arinso pochin, chi'toro' tanonën tashirinso' pochin, notoaro sontaro'sa na'api. Camioro'sa nënpita na'con na'con ni'ton co pichichina chinhuën; Inahuaso nipirion no'tohuaro, marë yonsanquë, inotë ya'huërinso pochin na'arin. ¹³ Gedeón nani inaquë cancopachina, a'na quëmapi hua'narinso; cataninso sha'huitarin na'tayatonin. Ina quëmapiso' tëcapon: "¡Niquë! ana huanarahuëso, na'porahuaton ni'nahuë, a'na pan sëpataquëran nininso tanapitëriarin, Madian tanponëntaichin. Nëmëtëquëran tanpotopiso', cantonahuaton chiniquën ya'catahuaton onatërin, na'potahuaton imotërin. Iterin." ¹⁴ A'na quëmapiriso' itapon: "Co inaso nisha hua'naranhuë', inaso nipirinhuë' Gedeón sahuëninën chachin (Joás huininquëran) Israirosa. Señor cataparin minsëcaso' marë, Madian nosa, naporahuaton ya'ipi sontaronënpitarë' chachin". ¹⁵ Gedeón nani huanapiso' natan pachina', naporahuaton canatacasonta. Inaso isonahuaton Yosë chinoterin. Inaso Israiro'sa tanponënaquë' pasahuaton, na'parahuaton itapon: "¡Huënsëco! Señor quëtarinpoa, Madian sontaro'sa minsëcaso' marë". ¹⁶ Inaso cara pasa quëmapisa, pa'tomatahuaton, cara huënton o'coirin, na'potahuaton ya'ipi cornita quëtërapiarin, naporahuaton nopaquëraontá orinanhuaya nipisonta capanantë, inanantëquë nara nëmëtërinquë' sonantahuaton, pomonantëtahuatona ichimitëra'piapi. ¹⁷ Inari inahuaso itapon: "Ca ninahuëso nicatoma nonanco. Ni'co ca nani canconhuato Madian no'sa tanponëna' yonsanquë', canpitanta' ca nina huëso chachin ni'co. ¹⁸ Ca, ya'ipi piyapinëhuë pitaro'co nisaraiso, cornita pihuipatoi, canpitanta chachionta cornita pihuico. Ya'ipinquëma inaquë napoco, naporahuaton chiniquën ya'itatoma, Señor minsëarinquëma Gedeonta minsëarinquëma itico. ¹⁹ Inapochachin Gedeonso, pasa quëmapisarë, inarë' nisapisopita' huë'pi, tanporo'sa yansanquë, nani yonotashi yanisahuaso. Naporahuaton naporo chachin, nani Madian sontaro a'paitonapiro'sa, yani canpiasoi chachin, inahuaso cornëtanëna pihuipi, naporahuaton orinan huayanëna' sëquëpisonta pa'quipi. ²⁰ Cara huëntonosa quëmapiro'sasa, cornëtanëna' pihuipi, naporahuaton orinan huayanëna' pa'quipi. Anapitaso inchinan tanpanënaquëran, yanatëtëro'sa masahuatona' pëshonpi. Inahuaso chiniquë yaitatona, "Señor sahuëninën quëran minsëarinquëma, Gedeonta sahuëninënquëran minsëarinquëma. Itopi". ²¹ Anaya anaya inaranchin, quëmapisa' huanipiran no'pa conirapitopi, na'poaton ya'ipi Madianitas sontaro'saso' ta'api. Inahuaso yaitatona, naporahuatona' pa'pi. ²² Inapitaso cara pasa, tronpitaro'sa pihuipachinará, Señor nohuanton Madian no'saso', inahuara capini, ni tahuërëtahuatona' niahuërapi, napoaton napoichin ta'api. Bet sita quëhuarë, inaso Zerera parti ya'huërinso, naporahuaton Abel Mehola no'pa maninso' naniconinquë', Tabat ya'caria. ²³ Israiro sontaro'saso, Neftalí quëran, Aser quëran, nisahuaton, ya'ipi Manasés quëran, Madianitas sontaro'sa imatona ahuëcaiso marë' imapi. ²⁴ Gedeonso, nanan sha'huinapiro'sa a'pari. ya'ipi Efrain huënton, motopiahuaro'sa pa'tacaiso marë', paponapochin na'pora'api, Madiano'sa ahuëamaso marë pa'maco Jordán naiquë, pëntoinano'sa toshitëco, Bet Bara quëhuarë, inapotoco ama ta'acaiso marëhuë', inapoatona. Efrain sontaro'saso', niyontonahuatona, Jordán nai pëntoinano'sa toshitëpi, Bet Bara quërahuarë', inapoatona' inapitaso, Madian carpirno huininpita, Oreb Zeeb inapita mapi. ²⁵ Masahuatona' Oreb so, Oreb natëtëro'saquë' tëpapi, Zeeb inanta, Zeeb opa topoipinan itopiquë tëpapi, inapoatona' Madiano'sa, imapiquëran, Oreb Zeeb, inapita matëna' Gedeón quëshipi, inaso Jordán nai aquëtëran nisarin.