¹ Israiro'sa piyapi'saso', co Señoro natëtonaraihuë' co noyahuë' niantapi. Señoro ni'tonënquë, naponin nipi ni'ton Señorori anaintërin, canchisë pi'i madianitaro'sari hua'anëntërin. ² Inapoatona' chiniquën nicatona' madiano'sari aparisitohuachinara'. Israiro'saso' ta'arahuatona', a'na naninquë' a'na naninquë ayanquëtopi huachi. ³ Inapoatona' israiro'saso' nani sha'topiquë, madiano'sari cosharo'nënpita nanquita'api. Ina quëran amaricoro'sa, pi'i huë'ninso parti yáhuë'pisopitanta inapitari israiro'sa sha'topiso' nanquitápi. ⁴ Inahuaso' sontaronëna' apapi, ina no'paquë sha'topiso' ya'ipi cosharonëna' nanquicaiso' marë'. Ya'ipi Gaza iraquë huarë' yanquëtopi. Co tanapitopihuë cosharonëna' israiro'sa macacaiso'. Ohuica, ohuaca', moraro'sa inapita co tanapitopihuë' na'acaso'. ⁵ Inahuaso' inachintopiso, intohuaso' yápapachinara' camiyoquë pa'pi. Huëcaiso' pëinta' ya'huëtopi, napoaton papachinara' quëpapi pa'pi notohuaro piyapi'sa co pichinanhuayanhuë' pa'pi. Sëquërë pochin naapi, camiyoro'santa' na'poinchachin naapi, inapoatona' ya'ipi no'panëna' nanquitopi. ⁶ Inapoatona madiano'sari israiro'sa asanpatopi. Nipachina israiro'saso' Señoro nontopi. ⁷ Inapoatona israiro ninano'so, Señoro nontantapi, madiano'sari aparisitapi ni'ton. ⁸ Señorori aparin a'na piyapinën, israiro'sa ninanonquë sha'huicaso' marë'. Inari itapon: I'so Señoro chachin israiro'sa Yosënën naporin: Egipto quëran ocoyaranquënma' parisitaramaso pëiquëran. ⁹ Egipcioro'santa aparisitapirinanquëmahuë' ocoyaranquëma'. Iporaso' quihuitëranquëmaso' quëtaranquëma', i'so no'pa. ¹⁰ Carinquën napotaranquë, caso' Señoroco canpita Yosënëma'. Carinquë sha'huitaranquën, ama mamanshi chinotëquësohuë' co amoro'santa chinotamaso' ya'huërinhuën, ¿inta no'panënquëso' ya'huëahuaton co yanatëramacohuë', caa nonahuëso'? ¹¹ Señoro anquëninën huë'sahuaton Ofra ninano, nara sonanquë huënsëimarin. Joasëso', (Abiezer huëntohua quëmapi), Joasë hui'nin Gedeonso', naporo chachin trico tonoroyarin opa huino o'ocaiso marë' topoipiquë', ama madiano'sari quënancaiso' marëhuë' po'opi. ¹² Señoro anquëninën ya'notaton itapon: Quëmaso' sontaro nënhuëquën chiniquën cancantëran, Señoro catahuarinquën ni'ton. ¹³ Gedeoni itapon: "Ma'cha Señoro napotërainquë paya Señoro catahuarancoi náporini, co posaitoihuë nimara ¿Onpoatonta' inapochin ya'ipi ninaiso? Intohuata nipachin pa'ninso' noya noya ya'huëcaiso' marë' quihuitërincoiso' topi inahuaso'. Napoaquë huarë co Egipto quëran co ocoirinpoahuë', napoaton Señoro nohuanton, Madiano'sa co aporinpoahuë' topi" ¹⁴ Napohuachinara Señorori ni'sarin quëran itapon: Madiano'sa aparisitarinquënma', nicaponahuë' quëmari minsëaton quëmopinënpitaanta nicha'ëquë'. Chíniquënquën ni'ton nanitapapon. Carinquë chachin camaiaranquën itërin. ¹⁵ Gedeonso' Señoro nonta'ton napotërin. ¿Onpo catahuaita israiro'saso' ni'caya? Ninan quëmopinëhuëpita, Manasese huëntono'sa pa'pi sanpatë ni'pi, inapitaro'co caso cocha cochachin, tatahuë pëinën quëran ninahuë itërin. ¹⁶ Señorori napotërin inaso'. Caroco nisaran quëmaso', noya nanitaparan madian sontaro'sa ahuëcamaso', anichin piyapi ahuëatë canarëso' pochin ya'ipi quëmari minsaran itërin Señorori. ¹⁷ Gedeoni nontaton Señoro napotërin: "Tëhuënchachin nosorohuatancoso' Señoronquën ninanso' anitotoco itërin. ¹⁸ Onpopionta ama isëquëran patocosohuë' ca'a huënantahuato quëmataquë ofrëtanëhuë' apira quësarahuë' anotahuanso marë"'.Señorori itpon: "Inta nipachin carinquënso' ninaranquën quëma huë'nantahuarë itërin Señorori. ¹⁹ Gedeonso pasahuaton a'na chipoahuaya tëparahuaton pomorin. Ina quëran a'na huë'ëtapochin nininquë cato shonca cato quiro pochin tricoromo. Ina quëran pan co'o ahuëpocatopinahuën anpirinso' manin. Ina quëran a'na chipoahuaya pomorinso' masahuaton i'më pochin niniquë noshinën oshira'piarin, inapotaton a'na nara paanca sonamënquë quëparin. ²⁰ Yosë anquënini itapon: Inaso', nosha masahuaton ina quëran pan co ahuëpocatopinahuën masahuaton natëtëquë accorahuaton no'huiquënquë opotëquë itërin. Napotohuachina Gedeonso' ina inachachin ninin. ²¹ Ina quëran Señoro anquëniriso', huaranën masahuaton imirin quëran anquirahuaton no'sha, ina quëran pan ahuëpocatopinahuën inapita Gedeonso' natëtëquë acorinso' i'cantërin. I'cantaton carihuachina ina natëtë quëran pën pochin pipirin. No'sha pan inapita ahuiquitërin naporahuaton Señoro anquënininso' ca'pa ayarin huachi.