¹ Sansonso' Tinatoquë pa'marin. Inaquë nicapon pochin a'na sanapi, quënanin. Inaso a'na Huiristia quëmapi, hui'nin. ² Ina quëran Sansonso' huëantarin. Pa'pin ashin inapita, sha'huitërin:"Tinato ninanoquë Huiristia sanapi, quënanahuë. Paatoma anoyatoco maca'huaso marë'," itërin. ³ Pa'pin, a'shin inapitari, Itapona: "Notohuaro sanapi ya'huërin canpoa huëntonënpoaquë Ya'ipi Israiro huëntonquënta ya'huërin. Nipirinhuë Huiristia sanapi yamanan ti? Co'ta inapitaso co, macahuano'shuë itoprinahuë. Sansoni'so pa'pin itapon: "Ina mini nipirinhuë', Ina nohuantërahuë maca'huaso'. ⁴ Sansonso', Sinioro nohuanton naporapirinhuë' huiristiaro'sa apicaso marë'. pa'pin, a'shin inapitaso', co ina nitotopihuë'. (Huiristiaro'sari naporo tahuëri'sa israiro'sa hua'anëntapi ni'ton, naporin.) ⁵ Sansonso', pa'pin, a'shin, inapitarë chachin Timinato ninanoquë pa'mapi. Ina ninano ya'cariya oparo imino'saquë camapi. Inaquë nicaso', a'nara pa'pini' hui'napishini përaantahuaton niitërin. ⁶ Nipirinhuë, Sinioro Ispiritonëni ya'coancantërin ni'ton, a'na chiporaa'huaya onoarëso pochin nitërin. Niponahuë, naporinso co pa'pin, a'shin, inapita sha'huitërinhuë'. ⁷ Ina quëran pa'sahuaton sanapi nohuantërinso nontoonin. Sansoni nontapon pochin a'paipachina pa'pi payapiro ni'nin. ⁸ A'na tahuëri sanapi macacaso marë' pa'mantahuachina, pa'mapon pochin pëshonin pa'pini tëparinso nicacaso marë'. Ni'comapirinhuë', pa'pini chanatërinso anaquë nino ya'huërin quënanin. ⁹ Nipachina imirin quëran opatahuaton ninoi' ocoirin. Inapotaton papon pochin iroramarin. Pa'pin, a'shin nincantahuaton inapitanta quëtërin irocaiso marë'. Niponahuë pa'pini chanatë quëran ninoi' ocoirinso co sha'huirinhuë'. ¹⁰ Sanson pa'pinso'. sanapi ya'huërinquë pa'marin. Inaquë Sansonso' panca pita ninin. Hui'napi'sa sa'apachinara inachintopiso' ni'ton, naporin. ¹¹ Ina ni'sahuatona sanapi quëmopinënpitaso 30 hui'napisa quëpi ca'tanacaiso marë'. ¹² Sansoni inapita itapon: "Natanco sha'huichinquëma a'na ninocaso nanan. Canchisë tahuëri pita hua'quirinquë inquëma tëranta ninotoma sha'huitohuatamaco, a'naya a'nayanquëma cushma rino pi'shi quëran nipinan quëtaranquëma'. Pitaquë a'mocasonta a'naya a'naya quëtaranquëmanta'. ¹³ Niponahuë co'so no'tëquën sha'huitohuatamacohuë', canpita inapita quëtaramaco," itërin. Itohuachina inapitariso', itapona: "Inta sha'huitëricoi nipachin, natanainquën," itopi. ¹⁴ Itohuachina Sansoni itapon: "Coshatona'pi quëran cosharo pipirin. Chiniquën masho quëran cashi cashin nininso' pipirin. ¿Inta ninorico'? itërin. Itopirinhuë', përarinsopitaso nani cara tahuëri pita hua'quipirinhuë', co nanitopihuë ninocaiso'. ¹⁵ Catapini tahuëri pochin nisapaso', Sanson sa'in itapona: Noyasha nontahuaton Sanson natanquë ninocaso nanan sha'huitërincoiso, ma'sona tapon naporinso' sha'huichinquën, Co'so nipachin quëma ahuiquitarainquën. Tataparionta quëmopinënpitarë chachin inapotarai. ¿Ihuancoiso marë' përamarancoi ti? ¹⁶ Napotohuachinara sanapi'so so'in na'nëtaton itapon: "Quëmaso co no'tëquën nosororancohuë'. Amatëraisopita, ninocaiso nanan sha'huitopiranhuë', ma'sona tapon naporanso', co caso sha'huitërancohuë'," itërin. Sa'ini napotohuachina Sansoni'so itapon: "Tatahuë, mamahuë, co inapita tëranta sha'huitërahuë. Aquëtë huarë' quëmaso', itërin. ¹⁷ Nipachina sanapiso', canchisë tahuëri pita hua'quirinso napo chachin na'nërarin. Pita ta'huantërinso tahuëriso nipirinhuë', apisarinso marë', sha'huitërin huachi. Nani sha'huitohuachina sanapi'so quëmopinënpita sha'huitërin. ¹⁸ Nipachina quëmopinënpitaso, Sanson shahuitopi huachi, co'huara pi'i ya'conyatërasohuë', sha'huitopi: "Ninoi'ichin ya'ipiya quëran cashi cashin, ninin. Pa'pini'achin ya'ipiya quëran chini chiniquën ninin," itopi. Sansoni'so itapon: "Sa'ahuë yatëparama ni'ton, sha'huitërahuë. Ina canpitanta sha'huitërinquëma ni'ton, nitotërama," itërin. ¹⁹ Nipachina Sansonso', Sinioro Ispiritonëni a'nanaya, ya'coancantërin. Ascaron ninanoquë pa'sahuaton 30 ya'huëhuano'sa, tëparin. inapotahuaton a'mopisopita matahuaton canapiso marë', yo'nin. Ina quëran noya no'huitahuaton pa'pin ya'huërinquë, paantarin. ²⁰ Sa'inso', a'na quëmapi, acoantopi. Saapon ca'taninsori, chachin.