¹ Cunkawnah, Bawipa naw, "Akcang kaning pyein nak gui cu shinah hmun ung ng'düi ci gui ung huham awn ng'dang lawk ciah Khanpughi ah uknak kho kä hmuh pha ung shih-nak kä m'dep khai ah amshah om ci" ciah pyein ci. ² Hnüp chuk a ng'pyi kawn ah Jesuh naw, Peter, James, la Johan ni bäng khü gui ne, khomhtung k'hlün ah ami mät bäng ng'khah püi gui ci. Cunung, Bawipa cu ami ma ah a muigup ng'thawng ne, ³ A hluinu cu khomdek ah khan ah a u naw phi cunah mäih ah bawk ne k'khang khai ah kä m'hlu-phäp hlawit vaiah aknui ah bawk ne k'khang lawk ci. ⁴ Elijah la Moses ni phi ami ma ah ng'dang law ni ne Jesuh awn ng'thu ci gui. ⁵ Cunung, Peter naw, "Rabbi, shinah hmun cu keimi ah phäh ah om na phyak ci. Nang Bawipa ka vai tumat, Moses ka vai tumat, Elijah ka vai tumat ci-ah shaum thum kami cawh khai bäi" ciah Jesuh cu pyein nak ci. ⁶ Ngami cu aknui ah kyikyawk u ne, Peter naw a i a pyein vai kä hmat ne cunah a pyein ah kyak ci. ⁷ Cun vai awn, khongmei cu ng'dang law ne ngami gui k'küm gui neta, "Shin cu ka m'yumhni ah ka htakhitui ah kyak ci. Ani ah ng'thu ng'ngai vä" ciah khongmei ungka k'aw ng'thang lawk ci. ⁸ Acunah ng'ghit ung, ami pei hnuma ah teng u sei, Jesuh tumat bäng cu ngami awn a om hmu u ne a hei a u phi kä hmu ba ci gui. ⁹ Cunkawnah khomhtung ungka ami kyum law sang ung, Bawipa naw ami hmuh shüt gui cu Chang ah Htapa shik ci gui ungka kä a thawh ba pha khüh, a u awn phi kä mi m'thein ein vaiah m'cäi gui ci. ¹⁰ Ngami naw phi cunah ng'thu cu ami lu-hnga ung khäm u ne, shik ci gui ungka a thawh ba cicu a i nimä ciah ami mät ngingoi ci gui. ¹¹ Cunkawnah, ngami naw, "Elijah cu ma ne lawk khai ciah Cacim saya gui naw ikyasei ami pyein ma?" ciah Bawipa cu ng'shik ci gui. ¹² Bawipa naw phi, "Elijah cu law ma ne apängvan cawhkyang ba k'cang khai. Cunung, Chang ah Htapa cu khuikha genbainak büiawit ne nawit-heng nak gah khai ciah a ng'guk cu a i hawi ma? ¹³ Cunte, kaning pyein nak gui cu, Elijah cu gawk law pyi ci. Chang naw phi ani ah mawng Cacim ung a ng'guk ah mäih ah ani ah khan ah ami kyaknak hlü ah kyak na pyi ci gui" ciah pyein ci. ¹⁴ Cunkawnah, ngami cu ahei angdüihpüi gui om nak ah ami law ba ung chang k'hli akda naw angdüihpüi gui cu k'cungvong law u ne, Cacim saya gui awn ng'cuh ghep ghep u ne ami na pyein cu hmuk ci gui. ¹⁵ Chang k'hli avan naw Bawipa cu ami hmuh law ung aknui ah cäicam u ne dawng law shi u neta Bawipa cu a gogai mawng ng'shi u ne douchang ci gui. ¹⁶ Bawipa naw phi angdüihpüi gui awn, "Ngami gui awn a i mawngma nei nami ngingoi ma?" ciah ng'shi gui ci. ¹⁷ Cunung chang k'hli ungka tumat naw, "Saya aw, ang ciah kho naw a kaai nak ah ka hta cu nang ah ka law püi ci. ¹⁸ Khokshe naw ani cu a du nak tä ah m'ghuk tawn ne, a m'gong ung a m'shiphom gui lut law sak sei, a m'nyi htui ha m'htep ne k'cai law thei ci. Cunkyasei, na ng'düihpüi gui naw cunah kho cu ami na k'täm tu pe vaiah ka ng'hungpa nak gui pang ungphi, ngami naw kä k'täm hlawit ci gui" ciah pyein ci. ¹⁹ Bawipa naw phi, "O a yumnak kä om ciah ng'shonhta, kei naw nangmi cu igüt kaning om püi gui vai ma? Nangmi igüt sho khai ah kaning ng'ngai pe gui vai ma? Ani cu kei ah law püi vä" ciah pyein ci. ²⁰ Cunung ngami naw akhmaw cu a pei ah ng'khah law püi u sei, cunah kho naw Bawipa a hmuh law ung akhmaw cu a ng'ghit ah dimcawit sak sei, akhmaw cu kyutawn ne a m'gong ung a m'shikphom gui lut law sei ng'tat ci. ²¹ Bawipa naw, akhmaw ah pa awn, "Ani ung shinah a kyak igüt sho püi naw?" ciah ng'shi sei, a pa naw, "Akhmaw yah ge ungka naw ng'tüin ci. ²² Kho naw ani cu a ngon vaiah mei khui ah phi kya, tui khui ah phi kya, a shäng shäng kyukton sak ci. Cunte, nang Bawipa naw ibawh na m'khüt tu vet ah a kyak ung keimi na m'gein gui ne na m'htei gui ä" ciah pyein nak ci. ²³ Jesuh naw phi, "Na m'khüt tu vet ung ciah na pyein ne ma? Yum ciah phäh ah apängvan cu kya hlawit ci" ciah pyein ci. ²⁴ Akhmaw ah pa naw, "Ka yum ci nei. Kä ka yumnak hlawit ung na m'htei ä" ciah a ng'ghit ah ng'hungpa ne pyein ci. ²⁵ Jesuh naw chang k'hli a dawng law cu a hmuh law ung shemshai ciah kho cu cetcam ne, "Awit-ang ne a ng'hnga pang ciah kho, ng'thu kaning m'khän ci. Ani ungka lut law ä. Ng'hlee ne ani ah kyong ah kä na lut ba vai" ciah pyein ci. ²⁶ Cunung khokshe cu vuvik ne akhmaw cu aknui ah dimcawit sak päng neta, lut lawk ci. Akhmaw cu akshi vai süah ng'lat sei, chang van naw, "Ani shik ci" ciah pyein ci gui. ²⁷ Cunte, Jesuh naw akhmaw ah kut cu ven ne, m'thawh sei, thawh lawk ci. ²⁸ Cunkawnah Bawipa cu imkyong ah va lut sei, angdüihpüi gui naw, "Keimi naw cunah khokshe cu ikyasei kä kami k'täm hlawit ma?" ciah a ng'thup ah ng'shik ci gui. ²⁹ Bawipa naw phi, "Cunah mäih kho cu taigü nak awn ah kä kyak ung, ihawkcha phi k'täm ne kä gah hning ah kyak ci" ciah pyein ci. ³⁰ Ngami cu cunah hmun ungka lut law u ne Kalilee kho cu hlun pah ci gui. Cunte, Bawipa naw a u awn phi kä hmat sak hlük ci. ³¹ Ikyaseiciung, Bawipa naw angdüihpüi gui awn m'theimthang gui ne, "Chang ah Htapa cu chang guiah kut kyong ah apnak gah lawk khai. Ngami naw phi ani cu ngon khai gui. Cunte, ami ngon kawnah hnüp thum a ng'lak nak ung ani cu thawh law ba khai" ciah a pyein ah phäh ah kyak ci. ³² Angdüihpüi gui naw cunah ng'thu cu kä mi k'shing tu pang ung phi, Bawipa cu kä ng'shi dat ci gui. ³³ Cunkawnah, ngami cu Kaperanom mango ah gawk ci gui. Imkyong ah ami om sang ung Bawipa naw angdüihpüi gui awn, "Lam ah a i ah mawng cu ng'nüngsheng u ne nami pyein ma?" ciah ng'shi gui ci. ³⁴ Cunte, ngami cu a i phi kä ciah om ci gui. Ikyaseiciung, a u cu a kükyangpi ah a kyak ah mawng lam ah ami mät gui mat naw mat ng'nüngsheng u ne ami pyein ah hmawk ah kyak ci. ³⁵ Cunung Bawipa cu ngo ne angdüihpüi ghaleigoi cu khü ne, "A u phi akhtükbäih ah a kyak hlü ung, avan ung akhnupibäih ah kya ne, avan ah changshäm ah a kyak vai" ciah pyein ci. ³⁶ Cunkawnah Bawipa naw akhmaw tumat cu khü ne ami ng'lung ung a ng'düi sak päng ah ani cu pawm neta, ³⁷ "Shinah mäih akhmawhta gui ungka tumatmat cu kei ah ng'ming awn douchang ci naw kei na douchang ci. Kei na douchang ci naw kei bäng ah kä kya ne, kei na tüi lawk ciah Bawi phi douchang ci" ciah pyein ci. ³⁸ Johan naw, "Saya aw, nang saya ah na ng'ming awn khokshe gui k'täm ciah chang tumat ka hmu shüt ci. Ani cu keimi awn atäng ah kä ng'läk tuk ciah kyasei, ani cu ka maa na shüt ci" ciah pyein ci. ³⁹ Cunte, Jesuh naw, "Ani cu kä nami maa nak vai. Ikyaseiciung, kei ah ng'ming awn cäicam vai huham a m'dang kawnah kä sho pha sei, kei na pyeimshet ba hlawit khai a u tumat phi kä om ci. ⁴⁰ Nangmi kä ning ng'hnungtuk püi gui cicu kei täng ungka ah kyak ci. ⁴¹ Akcang kaning pyein nak gui cu Bawi Khrit ah angdüihpüi ciah ng'ming düt teng ne nangmi awn tui khap ät ning tu gui ci naw a phu ng'kheng a pi ah phi kä gah ah kä om khai. ⁴² Cunte, kei na yum ciah shinah akhmawhta gui ungka tumatmat ng'kyungtäng sak cicu gawitlung akdämnu a gon ung khäi ne tuinu likim khui ah yukchak ung ani ah phäh ni tuba khai. ⁴³ Na kut naw aning kat sak ah a kyak ung cun cu ghempit ä. Na kut ng'hnih awn kä ng'kem hlawit ciah m'htemei khui ah na lut ah mä, kut tumat awn ghinnak ah na lut tu ung nang ah phäh ni tuba khai. ⁴⁴ Cunah hmun ung m'kyüt phi kä shi ne, mei phi kä ng'kem ci. ⁴⁵ Na khaw naw aning kat sak ah a kyak ung cun cu ghempit ä. Na khaw hnih awn m'htemei khui ah yukchah na gah ah dam ah na khaw tumat awn ghinnak ah na lut tu ung nang ah phäh ah ni tuba ci. ⁴⁶ Cunah hmun ung m'kyüt cu kä shi ne, mei phi kä ng'kem ci. ⁴⁷ Na mik naw aning kat sak ah a kyak ung cun cu k'koih ä. Na mik ng'hnih awn m'htemei khui ah yukchah na gah ah dam ah, na mik tumat awn Khanpughi ah a uknak kho ah na lut tu ung nang ah phäh ah ni tuba ci. ⁴⁸ Cunah hmun ung m'kyüt cu kä shi ne, mei phi kä ng'kem ci. ⁴⁹ Chang van cu mei awn m'shii shumnak gah khai gui. ⁵⁰ M'shii cu nik ci. Cunte, m'shii naw a tuui nak a m'maih ung cun cu a i awn tui-awi ba sak khai ma? Nami mät ung m'shii tuui-awi sak u ne nami mät gui mat la mat ng'ge u ne om vä" ciah pyein ci.