¹ Cunah kho hnüp gui ung chang k'hli akda ng'bum law ba ci gui. Ngami ung ami ei vai kä om sei Jesuh naw angdüihpüi gui cu khü gui ne, ² "Shinah chang k'hli cu ka m'gen gui ci. Ikyaseiciung, ngami naw kho hnüp thum lüng kei awn atäng ah om u ne ngami ung ami ei vai a i phi kä om ci. ³ Ngami ungka amshah cu akthuuk ungka lawk ci guiah kya ne, a i kä m'bei guiah ami im ah tüih ba gui ung, ngami cu lam ah m'cawi gui ne ami k'tha maih khai" ciah pyein na gui ci. ⁴ Angdüihpui gui naw, "Shinah kho ng'yungkaang ah a u naw a hawi ah kaa m'htut cu law püi ne shin gui awn ami phü ah m'bei gui hlawit khai aw?" ciah m'shang ba ci gui. ⁵ Jesuh naw phi, "Nangmi ung ei vai m'htut ichü om naw?" ciah ng'shi gui sei, ngami naw, "M'htut ng'lung khih om ci" ciah pyein ba ci gui. ⁶ Cunung Bawipa naw chang k'hli cu m'dek khan ah ngoh sak gui ne m'htut ng'lung khih cu la ne, abäkhäknak a m'hlümtai kawnah cun gui cu k'bou ne chang k'hli gui awn ami teipai vaiah angdüihpüi gui awn pe gui ci. Angdüihpüi gui naw phi, chang k'hli awn teipai ci gui. ⁷ Ngami gui ung ngahta phi api om sei, ngami guiah phäh ah abäkhäknak a m'hlümtai kawnah, cunah nga gui cun phi ami teipai vaiah pyein ci. ⁸ Chang gui naw ei u ne phü ci gui. Cunkawnah, pawih ba ciah amte gui k'bäm u sei, gang khih lawk ci. ⁹ Cunah hmun ung chang phya phlikip hlawk lawk ci. Cunkawnah, Bawipa naw chang gui cu tüi ba gui ne, ¹⁰ Angdüihpüi gui awn atäng ah ng'hleiko khan ah a ng'ghit ah hangkai ne, Dalmanutha kho guiah hteit ci. ¹¹ Cunung, Pharisee gui cu lut law u ne, Bawipa cu ng'cuh püi u ne, Bawipa ami hleep hlü ah phäh ah khankho ungka cäicam vai cu ng'yoi ci gui. ¹² Bawipa naw a m'lungkyong ah ghäi-ai ne, "Shinah ng'shon naw ikyasei cäicam vai cu a ng'yoih ma? Akcang kaning pyein nak gui cu shin ah ng'shon awn a i cäicam vai phi kä m'dang vai" ciah pyein päng neta, ¹³ Ngami gui nawng shüt gui ne, ng'hleiko khan ah hang kai ba ne capi kam täng ah va ng'kat ci. ¹⁴ Angdüihpüi gui naw m'htut cu ami law püi vai m'hnih u sei, ng'hleiko khan ah ngami ung m'htut tumat bäng om ci. ¹⁵ Cunung Bawipa naw, "Pharisee guiah k'cou la Herod ah k'cou gui cu a thüü ah nami m'htei nak vai" ciah m'cäi gui ci. ¹⁶ Angdüihpui gui naw phi, ngami ung m'htut kä mi sho law ah phäh ah a pyein ah ng'ngai u ne, tumat naw tumat m'hluh ci gui. ¹⁷ Cunah ami pyein Bawipa naw hmat law ne, "M'htut kä nami sho law cu ikyasei mat naw mat nami m'hluh ma? Kä nami k'shinghmat pha ne ma? Nami m'lung gui cu m'li sang ne ma? ¹⁸ Nami mik om lang sei, kä nami hmuk ci ma? Nami k'hnga om lang sei, kä nami ng'ya ne ma? Kä nami shümba ne ma? ¹⁹ M'htut ng'lung hma cu chang phya hmakip ah phäh ah ka k'bou law sang ung m'htut amte ichü cu gang ung akbe ah nami ko ne ma? ciah ng'shi gui sei, ngami naw "Gang Ghaleigoi" ciah m'shang ba ci gui. ²⁰ M'htut ng'lung khih cu chang phya phlikip ah phäh ah ka k'bou sang ung m'htut amte gui cu gang ung akbe ah ichü nami ko ne ma?" ciah ng'shi gui sei, ngami naw, "Gang khih" ciah m'shang ba ci gui. ²¹ Cunkawnah, Bawipa naw, "Kä nami k'shing pha ne ma?" ciah pyein ci. ²² Ngami cu Bethsaida mango ah ami gawk law ung, chang gui naw amik m'dauh tumat cu ng'khah law püi u ne, ani cu a tawk tu vaiah Bawipa cu ng'hungpa nak ci gui. ²³ Bawipa naw amik m'dauh cu a kut ung ven ne, pigo k'pung ah a ng'khah püi kawnah, amik ah khan ah a m'shitui m'sha ne ani ah khan ah a kut taih neta, "Ibawh tumatmat na hmuh naw?" ciah ng'shik ci. ²⁴ Ani naw tä law ne, "Chang gui cu shingdung gui vai süah kya u ne, lam ung ami hteh ka hmuk ci" ciah pyein ci. ²⁵ Cunkawnah, Bawipa naw ani ah mik ah khan ah a kut cu ng'hlee ne taih ba ci. Cunung, ani naw a ng'khai ah hmu ne amik cu a lüng ah ni lawk ci. Apängvan cu a ng'khai ah hmu lawk ci. ²⁶ Bawipa naw phi, "Pigo kyong ah kä lut ein ä" ciah m'cäi ne, ani cu amät ah im ah tüi ba ci. ²⁷ Cunkawnah, Jesuh cu angdüihpüi gui awn atäng ah Caesarea Philippi kho ungka pigo guiah hteit ci. Lam ah angdüihpüi gui awn, "Chang gui naw kei cu a u ah ka kyak ciah na pyein u naw?" ciah ng'shi gui ci. ²⁸ Angdüihpui gui naw phi, "Tuihnim Johan ah na kyak ciah pyein ci gui. Cunte, amshah naw Elijah ah na kyak ciah pyein u ne, amshah naw phi, profet gui ungka tumatmat ah na kyak ciah pyein ci gui" cine pyein ba ci gui. ²⁹ Bawipa naw phi, "Nami mät naw mä kei cu a u ah ka kyak ciah nami na pyein naw?" ciah ng'shi gui sei, Peter naw, "Nang Bawipa cu Bawi Khrit ah na kyak ci" ciah m'shang ba ci. ³⁰ Cunung Bawipa naw ani ah mawng cu a u awn phi kä mi m'thein ein vaiah cet gui ne m'cäi gui ci. ³¹ Cunkawnah, Bawipa naw chang ah Htapa cu khuikha genbainak gui akda büiawit ne, a ghi ng'vai gui, Taigü ng'vai gui la Cacim pyang saya guiah maa nak gah ne ami ngon kawnah, kho hnüp thum ng'lak na sei ghing thawh law ba khai ah mawng cu angdüihpüi gui awn m'theimthang gui ci. ³² Bawipa naw cunah mawngma a ng'khai ah a pyein law ung Peter naw Bawipa cu k'cawi täng ah ng'khah püi ne cunah kä pyein ein ba vaiah pyein nak ci. ³³ Cunte, Bawipa naw ng'hlat ne angdüihpüi gui cu teng ne, Peter cu m'cumcäi neta, "Nang khogam, ka hnu ah ng'nawn ä. Ikyaseiciung, nang naw Khanpughi ah mawngma gui kä k'tungtai na ne, chang guiah mawngma düt na k'tung nak ci" ciah pyein nak ci. ³⁴ Cunkawnah, Bawipa naw angdüihpüi gui mah mah ah chang k'hli cu khü gui ne, "A u naw phi, ka hnu ah ana läk hlü ung amät la mät maa na ne amät ah kutlamtung kawit ne, ka hnu ah ana läk vai. ³⁵ Ikyaseiciung, amät ah ghinnak hun hlük ci naw a ghinnak cu m'di khai. Kei la ng'thu k'ni ah phäh ah amät ah ghinnak di ci naw läi amät ah ghinnak hun khai. ³⁶ Chang naw khomdek alüng a gah ung phi amät ah mümcha a di ung a i ah mawng khai ma? ³⁷ Chang naw a i pe ne amät ah ghinnak mümcha cu hunphyawn ba hlawit khai ma? ³⁸ Ikyaseiciung, shekha ne katnak awn be ciah shinah ng'shon khin ung, a u phi kei la ka ng'thu ah phäh ah a ng'a ung Chang ah Htapa naw phi theing ciah khankhochang gui awn atäng ah amät ah Pa Khanpughi ah bawimang nak awn a kyum law ba ung ani ah phäh ah ng'a khai" ciah pyein ci.